ޣައްޒާގެ ދެކުނުގައި އޮންނަ ރަފަޙަށް ޔަހޫދީ ސިފައިން ދިން ރަޙުމު ކުޑަ ޙަމަލަތަކެއްގައި ފަލަސްޠީނުގެ 20 މީހުން ޝަހީދު ކޮށްލައިފިއެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން ދީފައިވާ މި ޙަމަލަތައް އަމާޒު ކޮށްފައި ވަނީ ޢާންމުން ދިރިއުޅޭ ތިން ޢިމާރާތަށެވެ. މި ޙަމަލާގައި އެ ތިން ޢިމާރާތް ވަނީ ސުންނާފަތިކޮށް، ބިމާ ހަމަ ކޮށްލާފައެވެ.
ޔަހޫދީ ފައުޖުން ދެމުންދާ ޙަމަލަތައް ފަހަކަށް އައިސް އަމާޒު ކުރަމުން ދަނީ ރަފަޙަށެވެ. ޣައްޒާގެ އެހެން ސަރަޙައްދުތަކަށް ދެމުން ދިޔަ ވަރުގަދަ ޙަމަލަތަކުން ސަލާމަތްވާން އެތަކެއް ސަތޭކަ ހާސް ބަޔަކު ވަނީ ރަފަޙަށް ދަތުރު ކޮށްފައެވެ. ސަބަބަކީ، އެއީ މިޞްރާ ގުޅޭ ސަރަޙައްދީ ރޮނގު ކައިރީގައި އޮންނަ ރަށަކަށް ވެފައި، އެ ރަށަށް ޙަމަލަ ނުދޭނެ ކަމަށް ޔަހޫދީ ފައުޖުން މީގެ ކުރިން ބުނެފައިވުމެވެ.
"ފައިސާގެ އަގެއް ނެތް. އެއްވެސް އެއްޗެއް ގަންނަން ލިބޭކަށް ނެތް. އަހަރުމެން ކޮންމެ ރެޔެއް ހޭދަ ކުރަމުން މި ދަނީ ބިރުވެރި ކަމާއި ނާމާން ކަމުގައި. ދުވާލު ހަތަރުދަން ހޭދަކުރަނީ ކާއެތި ކޮޅެއް ހޯދަން. އަހަރުމެން މިހާރު ވަރުބަލި ވެއްޖެ. އަހަރުމެން ބޭނުމީ ސުލްޙަ. ޔަހޫދީންގެ މެދުކެނޑުމެއް ނެތް ޙަމަލަތައް ހުއްޓައިލަން. އަހަރުމެންނަށް ކަމެއް ކޮށްދޭން ބޭނުމިއްޔާ، ޔަހޫދީންގެ ޙަމަލަތައް ހުއްޓުވައިދީ،" ރަފަަޙަށް ވަގުތީ ގޮތުން ދިރިއުޅުން ބަދަލު ކޮށްފައިވާ ހަތަރު ކުދިންގެ ބައްޕައެއް ބުންޏެވެ.
ރަފަޙަށް ވަރުގަދަ ޙަމަލަތަކެެއް ދެމުންދާ މި ދަނޑިވަޅުގައި، ރަފަޙާ އިންވެގެން އޮންނަ ޚާން ޔޫނުސްގައި ޙަމާސް ޖަމާޢަތުގެ މުޖާހިދުންނާއި ޔަހޫދީ ފައުޖުގެ ސިފައިންނާ ދެމެދު ދަނީ ވަރުގަދަ ކުރިމަތިލުންތަކެއް ހިނގަމުންނެވެ. ޔަހޫދީންގެ އަސްކަރީ ޓޭންކުތަކާއި މަތިންދާބޯޓުތަކުން ދަނީ އެ ސަރަޙައްދަށް އަމާޒުކޮށް ވެސް ވަރުގަދަ ޙަމަލަތަކެއް ދެމުންނެވެ.
މި ޢުދުވާނުގެ ދަށުން ޔަހޫދީ ފައުޖުން ވަނީ ޣައްޒާގެ އުތުރުގައި އޮންނަ ކަމާލް ޢަދްވާން ހޮސްޕިޓަލަށް ރޭޑު ޖަހައި، އެ ތަނުގެ ތެރޭގައި ވެސް ޢުދުވާންތައް ހިންގާފައެވެ. ޔަހޫދީ ފައުޖުގެ ޙަމަލަތަކުގައި އެ ތަން ސުންނާފަތި ކޮށްލާފައިވާއިރު، އެ ތަނަން ބޭނުން ނުކުރޭ ވަރަށް ހަލާކު ކޮށްލާފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާއިން ބުނެއެވެ. އަދި، އެ ތަނުގައި ތިބި ބަލިމީހުންނާއި ކުޑަކުދިން އެހެން ސަރަޙައްދަކަށް ބަދަލު ކޮށްލާފައިވާ ކަމުގައި ވެސް އެ ޖަމާޢަތުން ބުންޏެވެ.
"[ޔަހޫދީ ފައުޖުން] މިހެން ހޮސްޕިޓަލްތައް ސުންނާފަތި ކުރަމުންދާ މަންޒަރު ބަލަން ތިބެވޭކަށް ނެތް،" ޣައްޒާގައި ހުންނަ އެ ޖަމާޢަތުގެ އިސް އޮފިޝަލެއް ކަމުގައިވާ ރިޗަރޑް ޕީޕަރކޯން ވިދާޅުވިއެވެ. ޚާން ޔޫނުސްގައި ހުންނަ އަލް-ނާޞިރު ހޮސްޕިޓަލުގައި މި ވަގުތު ޢާންމުންގެ 4,000 އަށްވުރެ ގިނަ މީހުން ރައްކާތެރިކަން ހޯދަމުންދާ ކަމުގައި އޭނާ ވިދާޅުވިއެވެ. އަދި، އެ ތަނުގައި ޢުދުވާންތައް ހިންގަން ޔަހޫދީ ފައުޖުގެ ސިފައިން ތައްޔާރުވަމުންދާ ކަމުގައި ވެސް އޭނާ ވިދާޅުވިއެވެ.
އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު 19,543 އަށް އަރާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަކުރެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 52,000 އަށް އުފުލިފައިވާއިރު، އެ މީހުންނަށް ފަރުވާދޭނެ ގޮތެއް، އަދި ވަޞީލަތެއް ވެސް ޣައްޒާގައި މި ވަގުތު ނެތެވެ. އަދި، ޔަހޫދީން ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 7,000 މީހެއްގެ ހަށިގަނޑު ތާށިވެފައިވާ ކަމުގައި ވެސް ޣައްޒާގެ އޮފިޝަލުން ވިދާޅުވިއެވެ.