ޔަހޫދީ ސިފައިން ފަލަސްޠީނުގެ ޢާންމުންތަކެއް ޝަހީދުކޮށްލި މައްސަލައެއް ތަހުޤީޤު ކުރަން އދން ގޮވައިލައިފި

ޔަހޫދީ ސިފައިން ޣައްޒާގައި ހިންގަމުންދާ ލާއިންސާނީ ޢުދުވާނުގެ ތެރެއިން ފަލަސްޠީނުގެ ޢާންމުންގެ ބަޔަކަށް ބަޑިން ޙަމަލަދީ އެ މީހުން ޝަހީދު ކޮށްލި މައްސަލަައެއްގެ ފުރިހަމަ ތަހުޤީޤެއް ހިންގުމަށް އދން ގޮވައިލައިފިއެވެ. އދގެ އިންސާނީ ޙައްޤުތަކާ ބެހޭ އޮފީހުން ބުނީ، ޔަހޫދީ ސިފައިން ދިން ޙަމަލާތަކުގައި ފަލަސްޠީނުގެ ޢާންމުންގެ 11 މީހުން ޝަހީދު ކޮށްލާފައިވާ ކަމަށާއި އެއީ ހަނގުރާމައިގެ ކުށެއްގެ ގޮތުގައި ބެލޭނެ ކަމުގައެވެ. އަދި އެ ޙަމަލާގެ މިނިވަން ތަހުޤީޤެއް ހިންގަން ޖެހޭނެ ކަމުގައި ވެސް އެ އިދާރާއިން ބުންޏެވެ.

"މި ހާދިސާގެ މިނިވަން އަދި ފުރިހަމަ ތަހުޤީޤެއް [ޔަހޫދީންގެ] އަސްކަރިއްޔާއިން ހިންގަން ޖެހޭނެ. އަދި، ތުހުމަތުތައް ސާބިތުވެއްޖެ ނަމަ، އެ އަމަލު ހިންގުމުގައި ބައިވެރިވި ހުރިހާ ސިފައިންނާ ދެކޮޅަށް ހަރުކަށި ފިޔަވަޅު އަޅައި، އެ މީހުން އިންސާފުގެ ކުރިމައްޗަށް ހާޒިރު ކުރަން ޖެހޭނެ. އަދި، މި ފަދަ އަމަލުތައް ތަކުރާރު ވިޔަ ނުދިނުމަށް ފިޔަވަޅުތަކެއް އަޅަން ޖެހޭނެ،" އދގެ އިންސާނީ ޙައްޤުތަކާ ބެހޭ ކޮމިޝަނަރުގެ އޮފީހުން ނެރުނު ބަޔާނެއްގައި ބުންޏެވެ.

މަންޒަރު ފެނުނު މީހުން ބުނީ، ޔަހޫދީ ސިފައިންގެ މި ޢަމަލު ހިންގާފައި ވަނީ ޢާންމުން ދިރިއުޅޭ ޢިމާރާތެއްގެ ތެރޭގައި ކަމުގައެވެ. އަދި، އެ ޢިމާރާތުގައި ދިއިރުޅޭ އަންހެނުންނާއި، ފިރިހެނުންނާއި ކުޑަކުދިން ވަކި ކުރުމަަށްފަހު، އަންހެނުންނާއި ކުޑަކުދިންގެ ކުރިމަތީގައި 11 ފިރިހެނުން ޝަހީދު ކޮށްލާފައިވާ ކަމުގައެވެ. ޝަހީދު ކޮށްލާފައި ވަނީ އުމުރުން 20 އަހަރާއި 30 އަހަރާ ދެމެދު މީހުންތަކެއް ކަމުގައި ވެސް މަންޒަރު ފެނުނު މީހުން ބުންޏެވެ.

ޔަހޫދީންގެ މި ރަޙުމުކުޑަ ޢަމަލު ހިންގާފައި ވަނީ ޣައްޒާ ސިޓީގެ ރިމާލް އަވަށުގައި ހުންނަ އަލް-ޢުދްވާ ޢާއިލާ ދިރިއުޅޭ ގޭގައެވެ. "އެ މީހުންނަށް [ޔަހޫދީ ސިފައިންނަށް] އަޅުގަނޑުމެން ފެނުމުން، އަޅުގަނޑުގެ އަންހެނުންގެ ބޭބެ އެ މީހުންނަށް ސާފުކޮށްދިން އަޅުގަނޑުމެންނަކީ ޢާންމުންގެ ބަޔެއް ކަން. ނަމަވެސް، ޔަހޫދީ ސިފައިން ވަޤުތުން އޭނާގެ ގަޔަށް ބަޑިޖަހައި، އޭނާ ޝަހީދުކޮށްލި،" ޔަހޫދީންގެ ޢުދުވާނުން ސަލާމަތްވި މީހަކު ނޫސްވެރިންނަށް ކިޔައިދިނެވެ.

އެއަށްފަހު ޔަހޫދީ ސިފައިން ވަނީ އަލް-ޢުދްވާ ޢާއިލާގެ މެންބަރުން ދިރިއުޅޭ ގެޔަށް ވަދެ، އެ ގޭގައި ދިރިއުޅޭ ހުރިހާ ފިރިހެނުން ޝަހީދު ކޮށްލާފައެވެ. މި ޢުދުވާނުގެ ތެރޭގައި، އެ ގޭގައި ދިރިއުޅޭ އަންހެނުންނާއި ކުޑަކުދިންނަށް ވެސް ޔަހޫދީ ސިފައިން އަނިޔާ ކޮށްފައިވާ ކަމުގައި މަންޒަރު ފެނުނު މީހުން ބުނެއެވެ.

މި ހާދިސާގެ ފުރިހަމަ ތަހުޤީޤެއް ހިންގުމަށް އދން ގޮވައިލާފައިވާއިރު، ދޯހާ އިންސްޓިޓިއުޓް ފޯ ގްރެޖުއޭޓް ސްޓަޑީޒްގައި އެސިސްޓެންޓް ޕްރޮފެސަރެއްގެ މަޤާމު ފުރުއްވާ ތާމިރު ޤަރްމޫޠު ވިދާޅުވީ، މިއީ ޔަހޫދީ ސިފައިން ހިންގާފައިވާ ގަތުލުއާންމެއް ކަން ސާފު ކަމުގައެވެ. ނަމަވެސް، މި ކަމުގެ މިނިވަން ތަހުޤީޤެއް ހިންގުމަށް ޝަރުޠު ހަމަވާ އެއްވެސް އިދާރާއަކަށް ޣައްޒާއަށް ވަނުމުގެ ހުއްދަ ނެތް ކަމުގައި އޭނާ ވިދާޅުވިއެވެ. މި ހާދިސާއާ ގުޅޭ ގޮތުން ވާހަކަ ދައްކަން ޔަހޫދީ ފައުޖުން ދަނީ ދެކޮޅު ހަދަމުންނެވެ.