ޣައްޒާގެ މުސްލިމުންނަށް ޔަހޫދީން ޖައްސަމުންދާ ނިކަމެތި ހާލުން އެ މީހުން ސަލާމަތް ކުރެވޭނެ ގޮތްތަކާ ގުޅޭ ގޮތުން މިޞްރުގެ ރައީސް ޢަބްދުލް ފައްތާޙް އަލް-ސީސީއާއި އީރާނުގެ ރައީސް އިބްރާހީމް ރައީސީ މަޝްވަރާ ކުރައްވައިފިއެވެ. ފުރަތަމަ ފަހަރަށް ފޯނުން ގުޅުއްވައި ކުރެއްވި މަޝްވަރާތަކުގައި، ދެ ޤައުމުގެ ދެމެދުގައި ގުޅުން އަލުން ގާއިމު ކުރުމާ ގުޅޭ ގޮތުން ދެ ބޭފުޅުން ވާހަކަފުޅު ދައްކަވާފައިވެއެވެ.
ހުސްވި ނޮވެންބަރު މަހު ސަޢޫދީ ޢަރަބިއްޔާގެ ރިޔާޟުގައި ބޭއްވި ޢަރަބި ލީގާއި އިސްލާމީ ޤައުމުތަކުގެ ބައްދަލުވުމުގެ ހަވާސާގައި ވެސް ދެ ބޭފުޅުން ބައްދަލު ކުރައްވާފައިވެއެވެ. އަދި، ދެ ޤައުމުގެ ދެމެދުގައި ގުޅުންތައް ބަދަހި ކުރުމާ ގުޅޭ ގޮތުން މަޝްވަރާ ކުރައްވާފައިވެއެވެ. އެއީ، އެ ދެ ބޭފުޅުން ބައްދަލު ކުރައްވާފައިވާ ފުރަތަމަ ފަހަރު ކަން ފާހަގަ ކޮށްލަން ޖެހެއެވެ.
ސީސީއަށް ފޯނުން ގުޅުއްވައި ދެއްކެވި ވާހަކަފުޅުގައި، ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާން ހުއްޓުމަށް ބޭނުންވާ ހުރިހާ އެހީތެރިކަމެއް ފޯރުކޮށްދޭން އީރާނުން ތައްޔާރަށް އޮތް ކަމުގައި ރައީސީ ވިދާޅުވެފައިވާ ކަމުގައި އީރާނުގެ މީޑިޔާއިން ރިޕޯޓު ކުރެއެވެ.
މިޞްރާއި އީރާނާ ދެމެދު ސިޔާސީ ގުޅުން ކަނޑައިލާފައި ނެތް ނަމަވެސް، ދެ ޤައުމުގެ ދެމެދުގައި ގިނަ ކަންތައްތަކަކާ ގުޅިގެން ދެބަސްވުންތައް ވަނީ އުފެދިފައެވެ. ދެ ބޭފުޅުންގެ ދެމެދުގައި ބޭއްވި މަޝްވަރާތަކާ އެކު، ދެ ޤައުުމުގެ ދެމެދުގައި އޮތް ނުތަނަވަސް ކަމަށް ކޮންމެ ވެސް ވަރެއްގެ ފިނި ކަމެއް ލިބިފައިވާ ކަން ފެނިގެން ގޮސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
ސަޢޫދީ ޢަރަބިއްޔާގެ އިތުރުން ޢަރަބި ލީގުގެ ބައެއް ޤައުމުތަކުން އީރާނާ އެކު އަލުން ސިޔާސީ ގުޅުން ގާއިމު ކޮށްފައިވާއިރު، މިޞްރުން ވަނީ ޤަޠަރާ ދެމެދު އުފެދުނު ދެބަސްވުންތައް ހައްލު ކޮށްފައެވެ. އަދި، ތުރުކީވިލާތާ އެކު ވެސް އަލުން ސިޔާސީ ގުޅުން ގާއިިމު ކޮށްފައެވެ. ސަޢޫދީ ޢަރަބިއްޔާއިން އީރާނާ އެކު އަލުން ސިޔާސީ ގުޅުން ގާއިމު ކޮށްފައި ވަނީ މި އަހަރުގެ ކުރީކޮޅެވެ. އެ ކަމުގައި މެދުވެރިއެއްގެ ދައުރު އަދާ ކޮށްފައި ވަނީ ޗައިނާއިން ކަން ފާހަގަ ކޮށްލަން ޖެހެއެވެ.