ޔަހޫދީ އަސްކަރިއްޔާއިން ޣައްޒާގެ މެދުތެރޭގައި ހުންނަ އަލް މަޣާޒީ ރެފިއުޖީ ކޭމްޕަށް ވައިގެ ޙަމަލާއެއްދީ 70 މީހުން ޝަހީދުކޮށްލައިފިއެވެ.
ޙަމަލާތަކުގައި ޒަޚަމްވި މީހުން ވަނީ މަޣާޒީ ކައިރީގައި ހުންނަ އަލް އަޤްޞާ ހޮސްޕިޓަލަށް ގެންގޮސްފައެވެ. އެ ޙަމަލާގައި ޝަހީދުވި މީހުންގެ ތެރޭގައި 12 އަންހެނުންނާއި 7 ކުޑަކުދިން ހިމެނެއެވެ. އެ ޙަމަލާގައި ޝަހީދުވި މީހުންގެ ޢަދަދު އަދިވެސް އިތުރުވާނެ ކަމަށް ބެލެވެއެވެ.
ފަލަސްތީނުގެ ރެޑް ކްރެސެންޓް ސޮސައިޓީން ބުނާ ގޮތުގައި ޔަހޫދީން ވައިގެ ޙަމަލާތަކުގެ ސަބަބުން މަޣާޒީއާއި އިތުރު ދެ ރެފިއުޖީ ކޭމްޕެއް ކަމަށްވާ އަލް ބުރެއިޖް އާއި އަލް ނިސެއިރާތުގެ މައި މަގުތައް ބަންދުވެ، އެމްބިއުލާންސްތަކާއި ކުއްލި ޙާލަތްތަކުގައި ޙަރަކާތްތެރިވާ ފަރާތްތަކުގެ މަސައްކަތްތަކަށް ވަނީ ހުރަސްއެޅިފައެވެ.
މަޣާޒީ ރެފިއުޖީ ކޭމްޕަށް މީގެކުރިން ވެސް ޔަހޫދީންގެ ޙަމަލާތައް އަމާޒުވެފަވެއެވެ. އެ ޙަމަލާތަކުގައި 30އަށްވުރެ ގިނަ މީހުން ވަނީ ޝަހީދުކޮށްލައިފައެވެ. މަޣާޒީ ކޭމްޕަށް އެންމެ ފަހުން ދިން ޙަމަލާއާ ގުޅިގެން ޣައްޒާގައި ވެރިކަންކުރާ ޙަމާސުން ނެރުނު ބަޔާނެއްގައި ބުނީ އެ ޙަމަލާއަކީ ބިރުވެރި ޤަތުލުޢާންމެއް ކަމަށާއި އެއީ ހަނގުރާމައިގެ އައު ޖަރީމާއެއް ކަމަށެވެ. އެ ޙަމަލާގެ އިތުރުން ޣައްޒާގެ ޚާން ޔޫނިސްސަށް ޔަހޫދީން ދިން ޙަމަލާއެއްގައި ފަލަސްޠީނުގެ އަށް މީހުން ވަނީ ޝަހީދުވެފައެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް ދެމުންދާ ޢުދުވާނީ ޙަމަލާތަކުގައި މިހާތަނަށް 20،000އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ޙަމަލާތަކުގައި ޒަޚަމްވި މީހުންގެ ޢަދަދު ވަނީ 50،000އަށްވުރެ މަތިވެފައެވެ.