ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތް ނައްތާލެވެންދެން ހަނގުރާމަ ކުރިއަށް ގެންދާނެ ކަމަށް ޔަހޫދިންގެ ހަރުކަށި ބޮޑުވަޒީރު ބުންޔާމިން ނަތަންޔާހޫ ވަޢުދުވެވަޑައިގެންފިއެވެ. އޭނާ އެ ގޮތަށް ވިދާޅުވެފައި ވަނީ ހަނގުރާމަ ހުއްޓާލުމަށް ދުނިޔޭގެ އެކި ކަންކޮޅުތަކުން ގޮވާލައި އަޑުތައް ގަދަވެފައިވާ ދަނޑިވަޅެއްގައެވެ. އަދި ހަނގުރާމައިގައި އެމެރިކާގެ ނުސީދާ ބައިވެރިވުން އިތުރުވަމުންދަނިކޮށެވެ.
ޣައްޒާއަށް ވަޑައިގެންނެވުމަށްފަހު ޔަހޫދީންގެ ވެރިކަންކުރާ ލިކޫދް ޕާޓީއަށް ނިޞްބަތްވާ މަޖިލީސް މެންބަރުންނާ ވާހަކަދައްކަވަމުން ނަތަންޔާހޫ ވިދާޅުވީ ޙަމާސުން ރަހީނުކޮށްފައިވާ ޔަހޫދީން ސަލާމްތް ކުރެވޭނީ އެ ޖަމާޢަތް ނައްތާލައިގެން ކަމަށެވެ. އަދި ހަނގުރާމަ ހުއްޓާލުމުގެ ވިސްނުމެއް ޔަހޫދީން ނުގެންގުޅޭ ކަމަށާއި ޙަމަލާބަދަލުކުރުން ހުއްޓޭނެ ހަމައެކަނި ގޮތަކީ ޙަމާސް އަމާންދިނުން ނޫނީ އެ ޖަމާޢަތް ނެތިދިއުން ކަމަށް އޭނާ ވިދާޅުވިއެވެ.
އޮކްޓޫބަރު މަހުގެ ހަތްވަނަ ދުވަހުން ފެށިގެން ޔަހޫދީ އިސްތިޢުމާރީ ފައުޖުން ޣައްޒާއަށް ދެމުންދާ ޙަމަލާތަކުގައި 20،700 މީހުން ޝަހީދުވެފައިވެއެވެ. އޭގެ ތެރެއިން 250 މީހުން ޝަހީދުވީ ފާއިތުވި 24 ގަޑިއިރުގެ ތެރޭގައެވެ.
ޣައްޒާއާ ދެކޮޅަށް ހިންގަމުންދާ ހަނގުރާމައިގެ ބޮޑެތި ޖަރީމާތައް ހުއްޓުވުމަށް ބައިނަލްއަޤްވާމީ މުޖުތަމަޢު ނުކުޅެދިފައިވާ ދަނޑިވަޅެއްގައި ލުބުނާނުގެ ޙިޒްބުﷲ ޖަމާޢަތާއި ޔަމަނުގެ ޙޫޘީ ޖަމާޢަތާއި ޢިރާޤާއި ސޫރިޔާގެ ހަނގުރާމަވެރި ޖަމާޢަތްތަކުން ވަނީ ޔަހޫދީންނާއި އެމެރިކާއާ ދެކޮޅަށް ތެދުވެފައެވެ. އެ ގޮތުން ޙިޒްބުﷲ އަދި ޙޫޘީން ވަނީ ޔަހޫދީންނާ ދެކޮޅަށް ސީދާ ޙަމަލާތަކެއް ދީފައެވެ. އަދި ޙޫޘީން ވަނީ ރަތް ކަނޑުގައި ދަތުރުކުރާ ޔަހޫދީންނާ ގުޅުން އޮންނަ އާގުބޯޓުފަހަރަށް ޙަމަލާ ދޭން ފަށައިފައެވެ. އެ ޙަމަލާތައް ހުއްޓުވުމަށް އެމެރިކާގެ މަނަވަރުތައް ވަނީ ރަތް ކަނޑަށް ފޮނުވައިފައެވެ.
އޭގެ އިތުރުން އެމެރިކާއިން ހުއްޓުމެއް ނެތި ޔަހޫދީންނަށް މަދަދު ދެމުން ދާތީ ޢިރާޤާއި ސޫރިޔާގައި ޙަރަކާތްތެރިވާ އެމެރިކާގެ ސިފައިންނާ އަމާޒުކޮށް ގިނަ ޢަދަދެއްގެ ޙަމަލާތަކެއް ވަނީ ދީފައެވެ. އެ ގޮތުން އެންމެ ފަހުން ޢިރާޤުގުގެ އިރްބީލްގައި ހުންނަ އެމެރިކާގެ އަސްކަރީ މަރުކަޒަކަށް އިރާނާ ގުޅުން އޮންނަ ހަނގުރާމަވެރި ޖަމާޢަތަކުން ދިން ޙަމަލާއެއްގައި އެމެރިކާ ސިފައިންގެ ދެ މީހުން ވަނީ ޒަޚަމުވެފައެވެ. ރައްދުގައި އެމެރިކާއިން ވަނީ ހަނގުރާމަވެރިންގެ މަޤާމުތަކަށް ވައިގެ ޙަމަލާތަކެއް ދީފައެވެ. އޮކްޓޫބަރު މަހުގެ ހަތްވަނަ ދުވަހުގެ ފަހުން ޢިރާޤާއި ސޫރިޔާގައި ޙަރަކާތްތެރިވާ އެމެރިކާގެ ސިފައިންނާ އަމާޒުކޮށް ސަތޭކައަށްވުރެ ގިނަ ޙަމަލާ ދީފައިވާ ކަމަށް އެމެރިކާއިން ބުނެއެވެ. އެ ޙަމަލާތައް ދީފައިވަނީ މިސައިލާއި ޑްރޯން ބޭނުންކޮށްގެންނެވެ.