ޔަހޫދީން ލުބްނާނުގެ ވެރިރަށް ބެއިރޫތަށް ރަޙުމު ކުޑަ ޑްރޯން ޙަމަލައެއްދީ ޙަމާސް ޖަމާޢަތުގެ އިސްވެރިއެއް ޝަހީދުކޮށްލައިފިއެވެ. ބެއިރޫތުގެ ދެކުނުގައިވާ ސަރަޙައްދަކަށް ދިން މި ޙަމަލާގައި ޝަހީދުކޮށްލާފައި ވަނީ ޞާލިޙް އަލް-ޢާރޫރީއެވެ. އޭނާ ޝަހީދުކޮށްލަން ދިން ޙަމަލާގައި އޭނާގެ އިތުރުން ދެ މީހަކު ޝަހީދުކޮށްލައި، އިތުރު ބަޔަކު ޒަޚަމުކޮށްލާފައިވެއެވެ.
ޢާރޫރީއަކީ ޣައްޒާގައި ވެރިކަން ކުރާ ޙަމާސް ޖަމާޢަތުގެ ނައިބު ލީޑަރެކެވެ. އޭނާ ޝަހީދުކޮށްލަން ޑްރޯން ޙަމަލަ ދިން ވަޤުތު އޭނާއާ އެކު ޙަމާސްގެ ހަތިޔާރު އެޅި ގޮފި - ޢިއްޒުއްދީން އަލް-ޤައްސާމް ބްރިގޭޑްސްގެ އިތުރު ދެ ވެރިން ތިބި ކަމުގައިވެއެވެ.
ލުބްނާނުގެ ވަޤުތީ ބޮޑުވަޒީރު ނަޖީބް މީޤާތީ ވަނީ ޔަހޫދީން ބެއިރޫތަށް ދީފައިވާ ޙަމަލަ އެންމެ ހަރުކަށި އިބާރާތުން ކުށްވެރި ކުރައްވާފައެވެ. އަދި، މިއީ ކުރިމަތިލުމެއް ފެށުމުގެ ބޭނުމުގައި ޔަހޫދީން ދީފައިވާ ޙަމަލައެއްގެ ގޮތުގައި އޭނާ ސިފަ ކުރެއްވިއެވެ. "ހަނގުރާމައެއް ފެށުމުގެ އިޚްތިޔާރު އޮތީ ޔަހޫދީންގެ އަތުގައިކަން ދުނިޔޭގެ ހުރިހާ ކަންކޮޅެއްގައި އެންމެން ދަނޭ. އެ ކަން ހުއްޓުވެން އޮތް ހަމައެކަނި ގޮތަކީ ]ޔަހޫދީންގެ] ޢުދުވާންތަކަށް ނިމުމެއް ގެނައުން،" އޭނާ ވިދާޅުވިއެވެ.
އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާންތައް ފެށުމާ ގުޅިގެން ލުބްނާނުގައި ހަރަކާތްތެރިވާ ހަތިޔާރު އެޅި ޙިޒްބުالله ޖަމާޢަތުގެ ސެކްރެޓަރީ-ޖެނެރަލް ޙަސަން ނަޞްރުاللهއާއި ޢާރޫރީ ބައްދަލު ކުރައްވާފައިވެއެވެ. އެ ބައްދަލުވުމާ އެކު ޙިޒްބުاللهން ވަނީ ފަލަސްޠީނުގެ މުސްލިމުންގެ ޙައްޤުތައް ޙިމާޔަތް ކުރަން ހަތިޔާރު އުފުލައި، ޔަހޫދީންގެ ރަށްތަކާއި ސިފައިންނަށް ޙަމަލަދޭން ފަށާފައެވެ.
ޔަހޫދީންގެ ޢުދުވާނާ ގުޅޭ ގޮތުން ވާހަކަފުޅު ދައްކަވަމުން ނަޞްރުالله ވަނީ ލުބްނާންގެ ރައްޔިތަކަށް އަމާޒުކޮށް، ނުވަތަ ލުބްނާނުގައި ދިރިއުޅޭ ބޭރު ޤައުމެއްގެ ރައްޔިތަކަށް އަމާޒުކޮށް ޔަހޫދީން ޙަމަލައެއް ދީފި ނަމަ، އެ ކަމުގެ ނަތީޖާ ހިތިވާނެ ކަމަށް ވިދާޅުވެ ޔަހޫދީންނަށް ވަރުގަދަ އިންޒާރެއް ވެސް ދެއްވާފައެވެ. އަދި، އެ ފަދަ އެއްވެސް ޢަމަލެއް ބަލައިނުގަންނާނެ ކަމުގައި ވެސް އޭނާ ވިދާޅުވިއެވެ.
މަސްރަޙު ދިރާސާ ކުރާ ފަރާތްތަކުން ގަބޫލު ކުރާ ގޮތުގައި، ބެއިރޫތަށް ޑްރޯން ޙަމަލައެއް ޔަހޫދީން ދިނުމަކީ، ބޮޑު ހަނގުރާމައެއްގެ ވިލާތައް ބޯމަތިވަމުންދާ ކަމުގެ ނިޝާނެކެވެ. ޢާރޫރީ ޝަހީދު ކޮށްލުމުން ޙަމާސުން އެ ކަމުގެ ބަދަލު ހިފާނެކަން ކަށަވަރެވެ. އަދި، ލުުބްނާނުގައި މި ޢަމަލު ހިންގުމާ އެކު، ޙިޒްބުاللهން ވެސް ޔަހޫދީންނާ ދެކޮޅަށް ހިންގަމުންދާ އަސްކަރީ ޙަރަކާތް އިތުރަށް ވަރުގަދަ ކުރާނެ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ.