ކްރިމިނަލް ކޯޓުގެ ޝަރީޢަތްތައް ނުހިނގާތީ ޕްރޮސިކިއުޓަރ ޖެނެރަލްގެ ކަންބޮޑުވުން

މިދިޔަ ހޮނިހިރު ދުވަހު މާލެއަށް ބޯކޮށް ވާރޭވެހި ޝަރީޢަތްތައް ނުހިންގޭ ވަރަށް ކްރިމިނަލް ކޯޓުގެ ޢިމާރާތަށް ގެއްލުންވުމާއި ގުޅިގެން ޝަރީޢަތްތައް ހިންގުން މަޑުޖެހިފައިވާތީ ޕްރޮސިކިއުޓަރ ޖެނެރަލް ހުސައިން ޝަމީމް ކަންބޮޑުވުން ފާޅުކުރައްވައިފިއެވެ.

ޕްރޮސިކިއުޓަރ ޖެނެރަލްގެ އޮފީހުން ވިދާޅުވީ މިމައްސަލަ ހައްލުކޮށްދެއްވައި، ކޯޓުގެ މަސައްކަތް ބާރަށް ކުރިއަށް ގެންދެވޭނެ ވަޞީލަތްތައް ހަމަޖައްސަވައި ދެއްވުމުގެ ޒިންމާ ދައުލަތުގެ ކަމާބެހޭ އެންމެހާ އިދާރާތަކުން އަދާކޮށްދެއްވުމަށް ޕްރޮސިކިއުޓަރ ޖެނެރަލް އިލްތިމާސް ކުރައްވާފައިވާ ކަމަށެވެ. އަދި ކޯޓުގެ ވަޞީލަތްތައް ރަނގަޅު ކޮށްދެއްވުމަށްވެސް ޕްރޮސިކިއުޓަރ ޖެނެރަލް އިލްތިމާސް ކުރައްވާކަމަށް އެ އޮފީހުން ވިދާޅުވިއެވެ.

ޕްރޮސިކިއުޓަރ ޖެނެރަލްގެ އޮފީހުން ހާމަކުރެއްވި ގޮތުގައި ކްރިމިނަލް ކޯޓުގެ އެހީތެރިކަން ލިބިގެން، ރަށްރަށުގެ މެޖިސްޓްރޭޓް ކޯޓުތަކުގައި ޝަރީޢަތްތައް ހިންގަނީ ޢާންމު ގޮތެއްގައި ހަފްތާއަކު އެއް ދުވަހުއެވެ. އެހެންނަމަވެސް އެދުވަސް ފިޔަވައި، އެހެން ދުވަސްދުވަހުވެސް ރަށްރަށުގެ މެޖިސްޓްރޭޓް ކޯޓުތަކުގައި ހުރި މައްސަލަތައް ކުރިއަށް ގެންދެވޭނޭ އިންތިޒާމު ހަމަޖެހިފައިވާ ކަމަށްވެސް ޕްރޮސިކިއުޓަރ ޖެނެރަލްގެ އޮފީހުން ވިދާޅުވެއެވެ. އެހެންކަމުން އެމައްސަލަތައް ބާރަށް ހިންގުމަށްވެސް ޕްރޮސިކިއުޓަރ ޖެނެރަލް ވަނީ އެދިވަޑައިގެންފައެވެ.

ކްރިމިނަލް ކޯޓު މިހާރު ހިންގަމުން އަންނަ ޢިމާރާތް ބައުވެ އެ ޢިމާރާތުގެ ބައެއް މިދިޔަ އަހަރުން ފެށިގެން ވަނީ ބޭނުންކުރުން ހުއްޓާލާފައެވެ. އަދި އެ ކޯޓު ވަގުތީގޮތުން ހިންގުން ހުޅުމާލެއަށް ބަދަލުކުރުމުގެ މަސައްކަތް ފެށިނަމަވެސް އެ މަސައްކަތް އަދިވެސް ނިމިފައެއް ނުވެއެވެ.