ޢާޒިމާގެ ފައިސާގެ މައްސަލައެއް ކޯޓުގައި ރަޖިސްޓްރީކުރެވިފައެއް ނުވޭ: ސިވިލް ކޯޓު

ޢާއިޝަތު އާޒިމާ ޝަކޫރުގެ ފައިސާގެ މައްސަލައެއް ކޯޓުގައި ރަޖިސްޓްރީ ކުރެވިފައި ނުވާ ކަމަށް ސިވިލް ކޯޓުން ހާމަކުރައްވައިފިއެވެ.

ސިވިލް ކޯޓުން މިކަން ހާމަކުރައްވާފައިވަނީ ރާއްޖޭގެ އޮންލައިން ނޫހެއްގައި "އާޒިމާ ފްލެޓް ގަންނަން ކުންފުންޏަކުން ދިން 1.9 މިލިއަން ރުފިޔާ ނުދައްކައިގެން އިތުރު ދަޢުވާއެއް" މިސުރުޚީގެ ދަށުން ލިޔެފައިވާ ޚަބަރާ ގުޅިގެން ނެރުއްވި ނޫސްބަޔާނެއްގައެވެ.

ސިވިލް ކޯޓުގެ ބަޔާނުގައިވަނީ ޕްލެޓިނަމް ރިއަލް އެސްޓޭޓް ޕްރައިވެޓް ލިމިޓެޑްގެ ފަރާތުން ޢާއިޝަތު އާޒިމާ ޝަކޫރުގެ މައްޗަށް ދަޢުވާކޮށް ސިވިލް ކޯޓަށް މައްސަލައެއް ހުށަހެޅިފައިވާ ކަމަށާއި މިމައްސަލައާއި ގުޅިގެން 9 ޖެނުއަރީ 2024ވަނަ ދުވަހަށް މައްސަލައިގެ ޙުކުމް ކުރުމުގެ އަޑުއެހުމަށް ތާވަލުކުރެވިފައިވާ ކަމަށް ބުނެ ޚަބަރު ފަތުރާފައިވީނަމަވެސް މިފަދަ މައްސަލައެއް ސިވިލް ކޯޓުގައި ރަޖިސްޓްރީ ކުރެވިފައިނުވާކަމަށެވެ. އަދި މިމައްސަލައިގެ ލިޔެކިއުންތަކެއް ކަމަށް ބުނެ އޮންލައިން ނޫހުގައި ބަޔާންކޮށްފައިވާ ލިޔެކިއުންތަކަކީ ޞައްހަ ލިޔެކިއުންތަކެއް ނޫން ކަމަށެވެ.

ސިވިލް ކޯޓުގެ ބަޔާނުގައިވަނީ ރައްޔިތުންގެ ކުރިމަތީގައި ކޯޓާމެދު ނުބައި ތަސައްވުރެއް އުފެދޭގޮތަށް އަދި ކޯޓުގެ ލިޔުންތައް ކަމަށް ބުނެ ޞައްހަ ނޫން ލިއުންތަކެއް ތައްޔާރުކޮށް ކޯޓުގެ އަގު ވެއްޓޭގޮތަށް ކުރާ މިފަދަ ނޭދެވޭ އަމަލުތައް ހަރުކަށި އިބާރާތުން ކުށްވެރިކުރައްވާފައެވެ. އަދި މިފަދަ އަމަލުތަކަކީ ކޯޓުގެ ޙުރުމަތް ކެނޑުމުގެ ޢަމަލެއް ކަމުގައި ބަލައި އެފަރާތްތަކާމެދު ޤާނޫނީ އިމުގެތެރެއިން އެޅެންހުރި އެންމެ ހަރުކަށި ފިޔަވަޅު އަޅުއްވާނެ ކަމަށް ސިވިލް ކޯޓުގެ ބަޔާނުގައިވަނީ ވިދާޅުވެފައެވެ.