ޗައިނާއާއި ރާއްޖޭގެ ގުޅުން ބިނާވެފައި އޮތީ ވަރަށް ވަރުގަދަ ބިންގަލެއްގެ މައްޗަށް: ރައީސް

ޗައިނާއާއި ރާއްޖޭގެ ގުޅުން ބިނާވެފައި އޮތީ ކައްޗަށް އެޅިފައި އޮތް ބިންގަލެއްގެ މައްޗަށް ނޫންކަމަށާއި އެއީ ވަރަށް ވަރުގަދަ ބިންގަލެއްގެ މައްޗަށް ބިނާވެފައި އޮތް ޒަމާންވީ ގުޅުމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ ޗައިނާއަށް ކުރެއްވި ފުރަމާނަ ދަތުރުފުޅުގެ ތެރެއިން އެޤައުމުގެ ޓީވީ ޗެނަލްއަކަށް ދެއްވި ޚާއްސަ ބަސްތީގަތުމެއްގައެވެ.

ޗައިނާގެ ޓީވީ ޗެނަލްއަކަށް ދެއްވި ޚާއްސަ ބަސްތީގަތުމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ މި ވޭތުވެދިޔަ ދިގު ތާރީޚުގައި ޗައިނާގެ ސަރުކާރުން ރާއްޖެއަށް އެކި ގޮތްގޮތުން އެހީތެރިކަން ފޯރުކޮށްދީފައިވާކަން ފާހަގަކުރައްވާފައެވެ. އެގޮތުން ޗައިނާއާއި ރާއްޖެއާ ދެމެދު 1972 ސިޔާސީ ގުޅުން ޤާއިމްކުރި ހިސާބުން ފެށިގެން މިހާތަނަށްވެސް ރާއްޖޭގެ ތަރައްޤީއަށް އެކި ގޮތްގޮތުން ޗައިނާ އެހީތެރިކަން ފޮރުކޮށްދެމުންދާކަން ރައީސް ފާހަގަކުރެއްވިއެވެ.

ރައީސް ވިދާޅުވީ ޗައިނާއިން ޤާއިމްކޮށްފައިވާ ބެލްޓް އެންޑް ރޯޑް އިނީޝިއޭޓިވްގެ ސަބަބުން ދެ ޤައުމުގެ ގުޅުން އިތުރު ހަރުފަތަކަށް ގޮސްފައިވާކަމަށެވެ. އަދި ރާއްޖެއާއި ޗައިނާއަކީ އެއް ޤައުމު އަނެއް ޤައުމަށް އިޙްތިރާމް ކުރާ ޤައުމެއްކަމަށާއި ޗައިނާއަކީ ޤައުމުގެ ކުޑަބޮޑުމިނަށް ބެލުމެއްނެތި ރާއްޖޭގެ އިސްތިޤްލާލަށް ފުރިހަމައަށް ތާއީދުކުރާ ޤައުމެއްކަމަށްވެސް ރައީސުލްޖުމްހުރިއްޔާ ވިދާޅުވިއެވެ.

ރައީސް ވިދާޅުވީ ޗައިނާއަކީ ރާއްޖޭގެ ދާޚިލީ ކަންތައްތަކާއި ބެހޭނެ ޤައުމެއް ނޫންކަމަށާއި މި ސަބަބުތަކާހުރެ ރާއްޖެއާއި ޗައިނާއާ ދެމެދު ވަރުގަދަ ގުޅުމެއް އުފެދިފައިވާކަމަށް ރައީސް ވިދާޅުވިއެވެ. ރައީސް ވިދާޅުވީ ޗައިނާއާއި ރާއްޖޭގެ ގުޅުން ބިނާވެފައި އޮތީ "ކައްޗަށް އެޅިފައި އޮތް ބިންގަލެއްގެ" މައްޗަށް ނޫންކަމަށާއި އެއީ ވަރަށް ވަރުގަދަ ބިންގަލެއްގެ މައްޗަށް ބިނާވެފައި އޮތް ޒަމާންވީ ގުޅުމެއްކަމަށެވެ. އެހެންކަމަުން ދެ ޤައުމުގެ ގުޅުން ނުކެނޑި ކުރިއަށް އޮތްތަނުގައިވެސް އެ ގުޅުން އިތުރަށް ވަރުގަދަވާނެކަމަށް ޤަބޫލުފުޅުކުރައްވާކަމަށް ރައީސް ވިދާޅުވިއެވެ.

" ޗައިނާއާއި ރާއްޖޭގެ ގުޅުން ޤާއިމްކުރެވިފައިވަނީ އެކުވެރިކަމާއި އިތުރުބާރުގެ މައްޗަށް. ދެ ޤައުމުގެ އެކުވެރި ބިންގަލަކީ ވަރަށް ވަރުގަދަ ބިންގަލެއް. ދެ ޤައުމުގެ ގުޅުން ނުކެނޑި ވަރުގަދަވާނެކަމަށް ޤަބޫލުކުރަން. މި ކުރެވުނު އެއްބަސްވުންތަކުގެ ސަބަބުންވެސް ދެ ޤައުމަށް ފައިދާވެ ގުޅުން ވަރުގަދަވާނެ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ ޗައިނާގެ ރައީސް ޝީޖިން ޕިން އަކީ ޤައުމު ހިންގުމުގައި ރައްޔިތުންގެ ލާބައާއި މަންފާ އިސްކޮށްގެން ކުރިއަށް ވަޑައިގަންނަވާ ރައީސް އެއްކަމަށެވެ. އަދި ޗައިނާގެ ރައީސްގެ ބެލުމުގެ ދަށުން އެ ޤައުމުގެ އިޤްތިޞާދު އައު އުސްމިންތަކަކަށް ގޮސްފައިވާކަންވެސް ރައީސް ފާހަގަކުރެއްވިއެވެ. ރައީސް ވިދާޅުވީ ރާއްޖެއިން ހާސިލް ކުރަން ބޭނުންވާ ކަންތައްތައް ހާސިލް ކުރުމަށް ޗައިނާ ސަރުކާރުން އެހީވެދޭނެ ކަމުގެ ޔަޤީންކަން އެ ރައީސް ޝީޖިން ޕިން ދެއްވާފައިވާކަމަށެވެ.

ރައީސް ވިދާޅުވީ ރާއްޖެއަކީ އިޤްތިޞާދީ ގޮތުން ބާރުވެރިވެ، ރައްޔިތުން އުއްމީދުކުރާ ގޮތަށް ކުރިއަށްދާ ޤައުމަކަށް ހެއްދެވުމަކީ އެމަނިިކުފާނުގެ ތަސައްވުރުކަމަށެވެ. އަދި އެ ތަސައްވުރުގެ ތެރެއިން ތަރައްޤީވެފައިވާ ދުނިޔޭގެ އެހެން ޤައުމުތަކާ ގުޅިގެން އަދި އެއްހަމައެއްގައި މަސައްކަތްކުރާ ޤައުމަކަށް ރާއްޖެ ބަދަލުކޮށްލަން ބޭނުންފުޅުވާކަމަަށްވެސް ރައީސް ވިދާޅުވިއެވެ.

މިމަހުގެ 7 އިން 13 އަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއާއި އެމަނިކުފާނުގެ އަނބިކަނބަލުން ޗައިނާއަށް ކުރެވި ދަތުރުފުޅަކީ އެ ޤައުމުގެ ރައީސް ޝީ ޖިންޕިންގެ ދަޢުވަތަކަށް ކުރެއްވި ދަތުރުފުޅެވެ. އަދި މިއީ މަގާމާއި ހަވާލުވެވަޑައިގަތުމަށްފަހު ރައީސުލްޖުމްހޫރިއްޔާ ކުރެއްވި ފުރަތަމަ ފުރަމާނަ ދަތުރުފުޅުވެސްމެއެވެ.