އޮސްޓްރޭލިއާގެ ސަރުކާރުން ރާއްޖެއަށް ކަނޑައެޅި އާ ސަފީރު، މިސްޓަރ ބްރައިސް ޑޭވިޑް ހަޗަސަން، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް މިއަދު އަރުއްވައިފިއެވެ.
މި ބައްދަލުކުރެއްވުމުގައި، ދިވެހިރާއްޖެއާއި، އޮސްޓްރޭލިއާއާ ދެޤައުމުގެ ދެމެދުގައި އޮތް ދުވަސްވީ އެކުވެރި ގުޅުން އެކި ދާއިރާތަކުން އިތުރަށް ބަދަހި ކުރެއްވުމާ ބެހޭގޮތުން މަޝްވަރާ ކުރެއްވިއެވެ. އަދި ރާއްޖޭގެ އިންސާނީ ވަޞީލަތްތައް ތަރައްޤީކުރުމަށް އޮސްޓްރޭލިއާ ސަރުކާރުން ފަހިކޮށްދޭ ފުރުޞަތުތަކައްޓަކައި އެ ސަރުކާރަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ. އަދި މީގެ ސަބަބުން ދެޤައުމުގެ ރައްޔިތުންގެ މެދުގައިވާ ގުޅުން އިތުރަށް ބަދަހިވެގެންދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާއާއި، އޮސްޓްރޭލިއާގެ އާ ސަފީރު ވަނީ ދުނިޔެއަށް ކުރިމަތިވެފައިވާ ޓެރަރިޒަމްގެ ޢަމަލުތައް ހުއްޓުވުމަށްޓަކައި ހުރިހާ ޤައުމަކުންވެސް އެއްބާރުލުން ދިނުމުގެ މުހިންމުކަމުގެ މައްޗަށް ވާހަކަފުޅުދައްކަވާފައެވެ.