މަޖިލިސް އިންތިޚާބުގައި 4 ދާއިރާއަކުން ޢަދާލަތު ޕާޓީގެ ޓިކެޓުގައި ވާދަކުރަން ހުޅުވާލައިފި
-
ކުރިމަތިލާން ހުޅުވާލީ ވައިކަރަދޫ، މަކުނުދޫ، އިނގުރައިދޫގެ އިތުރުން ފެލިދޫ ދާއިރާއަށް
-
މިނޫން ދާއިރާތަކުން ކުރިމަތިލާން ބޭނުންވާ ފަރާތްތަކުން ސިޓީ ފޮނުވުމަށްވަނީ ހުޅުވާލާފައި
-
ސުން ގަޑިއަކީ 23 ޖަނަވަރީ 2023ވާ އަންގާރަ ދުވަހުގެ 16:00
މި އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިޚާބުގައި ޢަދާލަތު ޕާޓީގެ ޓިކެޓުގައި ވާދަކުރުމަށް އެދޭ ފަރާތްތަކުން ޓިކެޓަށް އެދި ހުށަހެޅުމަށް ހުޅުވާލައިފިއެވެ.
ޢަދާލަތު ޕާޓީގެ މަޝްވަރާ މަޖިލީހުގެ 39 ވަނަ ބައްދަލުވުމުން ނިންމާފައިވަނީ 4 ދާއިރާއަކުން އާންމުކޮށް ހުޅުވާލައިގެން ޓިކެޓަށް އެދުމުގެ ފުރުސަތު ދިނުމަށެވެ. އެދާއިރާތަކަކީ ވައިކަރަދޫ ދާއިރާ، މަކުނުދޫ ދާއިރާ، އިނގުރައިދޫ ދާއިރާގެ އިތުރުން ފެލިދޫ ދާއިރާއެވެ. އަދާލަތު ޕާޓީންވަނީ އެޕާޓީގެ ނަމުގައި މިނޫން ދާއިރާއަކަށް ކުރިމަތިލާން ބޭނުންވާ ފަރާތްތަކުން އެފުރުސަތު ހުޅުވާލާފައެވެ.
އަދާލަތު ޕާޓީން ހުޅުވާލި ދާއިރާތަކަށާއި، މިނޫން ދާއިރާތަކަށް ކުރިމަތިލާން ބޭނުންވާ ފަރާތްތަކުންވެސް 23 ޖަނަވަރީ 2023 ވާ އަންގާރަ ދުވަހުގެ 16:00 ގެ ކުރިން އެކަމަށް އެދި ހުށަހެޅުމުގެ ފުރުސަތުވަނީ ހުޅުވާލާފައެވެ.
ޕާޓީން ހުޅުވާލި 4 ދާއިރާއަށް އެދި ފޯމް ހުށަހަޅާނީ ޕާޓީގެ އިދާރާއަށެވެ. އަދި އިތުރު ދާއިރާއަކުން ކުރިމަތިލާން ބޭނުންވާ ފަރާތްތަކުން ޕާޓީގެ އިންތިޚާބީ ކޮމިޓީއަށް އެޑްރެސްކޮށް, ސިޓީ ފޮނުއްވުމަށް އަދާލަތު ޕާޓީންވަނީ އެދިފައެވެ.
އަދާލަތު ޕާޓީގެ އިތުރުންވެސް ސިޔާސީ އެހެން ޕާޓީތަކުންވެސް އަންނަނީ މަޖިލިސް އިންތިޚާބަށް އެޕާޓީތަކުގެ ޓިކެޓްގައި ކުރިމަތިލުމުގެ ފުރުސަތު ހުޅުވާ ޕްރައިމަރީ ބޭއްވުމަށް ތައްޔާރުވަމުންނެވެ.
ރައްޔިތުންގެ މަޖިލިސް އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމަވާފައިވަނީ އަންނަ މާރޗް މަހުގެ 17 ވަނަ ދުވަހުއެވެ