ގުޅިފައިވާ ދުނިޔެއެއް ބިނާކުރުމަށް ނާމުން އިސްދައުރެއް އަދާކުރުމަށް ރާއްޖެއިން ގޮވާލައިފި

ގުޅިފައިވާ ދުނިޔެއެއް ބިނާކުރުމަށް ނޮން އެލައިން މޫވްމަންޓު، ނާމުން އިސްދައުރެއް އަދާކުރުމަށް ދިވެހިރާއްޖެއިން ގޮވާލައިފިއެވެ. ރާއްޖެއިން މިގޮތަށް ގޮވާލާފައިވަނީ ޔުގަންޑާގެ ކަމްޕާލާގައި މިހާރުކުރިއަށްދާ ނާމްގެ މިނިސްޓަރުންގެ ބައްދަލުވުމުގައި ޚާރިޖީ ވަޒީރު މޫސާ ޒަމީރު ދެއްވި ތަޤްރީރުގައެވެ.

ވަޒީރުގެ ތަޤްރީރުގައި ވަނީ ނާމަކީ އުއްމީދީ ޖަމްޢިއްޔާއެއް ކަމަށާއި، ތަފާތު ވިސްނުންތަކާއި، ސިޔާސަތުތަކާއި، ކާރިސާތަކުގެ ވަގުތުގައި ހަރުދަނާ ކަމާއި ސާބިތުކަން ދައްކާފައިވާ ޖަމްޢިއްޔާއެއް ކަމަށް ވިދާޅުވިއެވެ. އަދި މިހާރު ކުރިމަތިވެފައިވާ ތަފާތު މައްސަލަތާކައި ގޮންޖެހުންތަކަށް އަހުލުވެރިވެ ބައިނަލްއަޤްވާމީ މުޖްތަމަޢުގައި ޖަމްޢިއްޔާގެ މުހިންމުކަން ސާބިތުކޮށްދީ ހަރުދަނާކުރަންޖެހޭ ކަމަށްވެސް ވިދާޅުވިއެވެ. އެގޮތުން މިކަންތައްތައް ކުރުމަށްޓަކައި 3 ކަމެއް ވަޒީރުވަނީ ހުށަހަޅުއްވާފައެވެ. އެއީ ނާމުން މިހާރު މަސައްކަތް ކުރުމުގައި ގެންގުޅޭ އުސޫލް ބަދަލުކުރުމާއި، މަޝްވަރާގެ އުސޫލް އިސްކުރުމާއި، ބައިނަލްއަޤްވާމީ ހިންގުމުގެ އުސޫލްތަކަށް ބަދަލުގެނައުމުގައި ނާމުން އިސްދައުރެއް އަދާކުރުމެވެ. އޭގެތެރޭގައި އދ އާއި އެޖަމްއިއްޔާގެ ދަށުން ހިންގާ އެހެން ގުނަވަންތައް އިސްލާހްކުރުން ހިމެނޭ ކަމަށް ޚާރިޖީ ވަޒީރު ޒަމީރު ވިދާޅުވިއެވެ.

ވަޒީރުގެ ތަޤްރީރުގައިވަނީ ފަލަސްޠީނުގެ މިނިވަން ދައުލަތެއް ޤާއިމްކުރުމަށް ކުރަމުންދާ މަސައްކަތަށް ރާއްޖޭގެ ފުރިހަމަ ތާޢީދު އޮތްކަން ވެސް ފާހަގަކުރައްވާފައެވެ.

ވަކިފަރާތަކަށް ނުޖެހޭ ޤައުމުތަކުގެ ޖަމްޢިއްޔާ ނުވަތަ ނޮން އެލައިން މޫވްމަންޓް، ނާމް އުފައްދާފައިވަނީ 1961 ވަނަ އަހަރުއެވެ. އެޖަމްއިއްޔާގައި 120 މެމްބަރު ޤައުމު ހިމެނެއެވެ. އެޖްމައިއްޔާގެ މެމްބަރު ޤައުމަކަށް ރާއްޖެވީ 1976ވަނަ އަހަރުއެވެ.