ހުޅުމާލޭގައި ފުލުހުން އިތުރުކޮށް ފުލުހުންގެ ޚިދުމަތް މިހާރަށްވުރެ ފުޅާ ކުރައްވައި ހުޅުމާލޭގެ ރައްކާތެރިކަން ދަމަހައްޓަން މަސައްކަތް ކުރައްވާނެކަމުގައި ކޮމިޝަނަރ އޮފް ޕޮލިސް އަޙްމަދު ޢަރީފް ވިދާޅުވެއްޖެއެވެ.
ހުޅުމާލޭގައި ފުހުލުންގެ މަސައްކަތްތައް ބައްލަވާ ލެއްވުމަށް ހުޅުމާލެއަށް ވަޑައިގެން ފުލުހުންނާ ބައްދަލު ކުރައްވައި ކޮމިޝަނަރ އޮފް ޕޮލިސް ދެއްކެވި ވާހަކަފުޅުގައި، ހުޅުމާލޭގައި މީހުން އިތުރުވެ އާބާދީ ބޮޑުވަމުންދާއިރު ފުލުހުންގެ ދައުރު ފުޅާ ކުރުމަކީ މުހިއްމު ކަމެއްކަން ފާހަގަ ކުރެއްވިއެވެ. އަދި މާލެއިން އެކިއެކި ގުރޫޕްތައް ހުޅުމާލެއަށް އައިސް ޖިނާޢީ ކުށްތަކަށް އަރައިގަތުމަށް މަސައްކަތްކުރާކަން ފާހަގަ ކުރެވެމުންދާ ކަމަށާއި އެކަންކަމަށް ފުލުހުން ވަރަށް ބޮޑަށް ހޭލައި ތިބެންޖެހޭކަން ކޮމިޝަނަރ އޮފް ޕޮލިސް ފާހަގަ ކުރެއްވިއެވެ. img:http://s2.psmnews.mv/images/660x400/14606222337094.jpg|ޕޮލިސް ކޮމިޝަނަރ ފުލުހުންނާ ބައްދަލުކުރައްވަނީ - ފޮޓޯ: ޕޮލިސް މީޑިއާ
ކޮމިޝަނަރ އޮފް ޕޮލިސް ވިދާޅުވީ ފުލުހުންގެ ވަޒީފާއަށް ވަންނަ ފުލުހުންގެ ތެރެއިން ބަޔަކު ހުޅުމާލެއަށް ފޮނުވައި ހުޅުމާލޭގައި ފުލުހުންގެ ޕްރެޒެންސް އިތުރު ކުރައްވަން މަސައްކަތް ކުރައްވާނެ ކަމަށެވެ. ހަމަ އެއާއެކު ހުޅުމާލޭގައި ސީސީޓީވީ ކެމެރާ ހަރުކުރުމަށް ކަމާބެހޭ ފަރާތްތަކާއެކު މަޝްވަރާކޮށް އެމަސައްކަތް ކުރިޔަށް ގެންދަވާނެ ކަމުގައި ވިދާޅުވިއެވެ. img:http://s4.psmnews.mv/images/660x400/14606222758193.jpg|ޕޮލިސް ކޮމިޝަނަރ ފުލުހުންނާ ބައްދަލުކުރައްވަނީ - ފޮޓޯ: ޕޮލިސް މީޑިއާ
ހުޅުމާލޭގައި މަސައްކަތްކުރާ ފުލުހުންނާ ބައްދަލުކުރައްވައި ކޮމިޝަނަރ އޮފް ޕޮލިސް ވިދާޅުވީ ފުލުހުން މަސައްކަތް ކުރަމުންދަނީ އެކަށޭނަ ވަޞީލަތްތައް ނެތި އެހެނަސް ލިބިހުރި ވަޞީލަތެއްގެ ބޭނުން އެންމެ ފުރިހަމަ ގޮތުގައި ހިފައިގެންކަން ކޮންމެ ފުލުހަކުވެސް ހަނދާން ކުރަންޖެހޭނެ ކަމަށެވެ. ހަމައެހެންމެ ހުރިހާ ވަޞީލަތެއް ފުރިހަމަ ވުމަކީ ފަސޭހަ ކަމެއް ނޫންކަން ފާހަގަ ކުރައްވައި ކޮމިޝަނަރ އޮފް ޕޮލިސް ވިދާޅުވީ އިޚްލާޞްތެރިކަމާއެކު ކޮންމެ ފުލުހަކުވެސް މަސައްކަތް ކުރަމުންދާއިރު ވަޞީލަތް ނެތުމުގެ އިޙްސާސް މަދުވާނެ ކަމަށެވެ. img:http://s2.psmnews.mv/images/660x400/14606224589980.jpg|ޕޮލިސް ކޮމިޝަނަރ ހުޅުމާލޭގައި ޢިމާރާތް ކުރަމުންދާ ފްލެޓްތަކުގެ މަސައްކަތް ބައްލަވާލައްވަނީ - ފޮޓޯ: ޕޮލިސް މީޑިއާ
ފުލުހުންނާއެކު ބޭއްވި ބައްދަލުވުމުގައި ކޮމިޝަނަރ އޮފް ޕޮލިސް ވަނީ ކޮންމެ ފުލުހަކުވެސް ރައްޔިތުންނާ ގުޅިގެން ރައްޔިތުންގެ ބޭނުންތަކަށް އިސްކަންދީގެން މަސައްކަތް ކުރުމަށް އެދިވަޑައިގެންފައެވެ. މިއާއެކު ކޮންމެ ފުލުހަކުވެސް ޚިދުމަތުގައި ދެމިހުންނައިރު ދީނީ ގޮތުން ފުރިހަމަކުރަންޖެހޭ ކަންކަމަށް ފަރުވާތެރިވުމަށް ނަސޭޙަތްތެރިވެވަޑައިގަތެވެ. img:http://s1.psmnews.mv/images/660x400/14606223151654.jpg|ޕޮލިސް ކޮމިޝަނަރ ފުލުހުންނާ ބައްދަލުކުރައްވަނީ - ފޮޓޯ: ޕޮލިސް މީޑިއާ
ކޮމިޝަނަރ އޮފް ޕޮލިސްގެ މި ބައްދަލުވުމުގައި ފުލުހުންގެ ފަރާތުން ކޮމިޝަނަރ އޮފް ޕޮލިސްއަށް ހުށަހެޅި ސުވާލުތަކަށް ޖަވާބުދެއްވިއެވެ.