ޓީއެމްއޭއިން ލަގްޒަރީ ސީ ޕްލޭންގެ ޚިދުމަތް ތައާރަފްކޮށްފި

ޓްރާންސް މޯލްޑިވިއަން އެއަރވޭސް، ޓީއެމްއޭއިން އެއަރކޮންޑިޝަން ކޮށްފައި ހުންނަ ލަގްޒަރީ ސީ ޕްލޭންގެ ޙިދުމަތް ރާއްޖެއަށް ތައާރަފްކޮށްފިއެވެ.

މިކަމަށްޓަކައި މިއަދު ޓީއެމްއޭ ޓަރމިނަލް ބިލްޑިންގގައި ބޭއްވި ޙާއްސަ ރަސްމިއްޔާތެއްގައި އެއަރކޮންޑިޝަންޑް ލަކްޒަރީ ސީ ޕްލޭންގެ ޙިދުމަތް އިފްތިތާޙްކޮށްދެއްވީ މޯލްޑިވްސް އެއަރޕޯޓްސް ކޮމްޕެނީ، އެމްއޭސީއެލްގެ މެނޭޖިންގ ޑިރެކްޓަރ އާދިލް މޫސާއެވެ. ޓީއެމްއޭއިން ދެމުން އަންނަ ސީ ޕްލޭންގެ ޙިދުމަތުގެ ފެންވަރު ރަގަޅު ކުރުމަށް އެ ކުންފުނިން ކުރަމުން އަންނަ މަސައްކަތުގެ ދަށުން، ތައާރަފްކޮށްފައިވާ އެއަރ ކޮންޑިޝަން ކޮށްފައި ހުންނަ 8 ގޮނޑީގެ މި ލަގްޒަރީ ސީ ޕްލޭންއަށް ލިބޭ ތަރުޙީބަށް ބެލުމަށްފަހު ކުރިއަށް އޮތްތަނުގައި މީގެ ސީ ޕްލޭންތައް އިތުރު ކުރުމަށް ވިސްނާފައިވާ ކަމަށް ޓީއެމްއޭއިން މައުލޫމާތުދެއެވެ. img:http://s4.psmnews.mv/images/660x400/14606293359141.jpg|ޓީއެމްއޭއިން އެއަރ-ކޮންޑިޝަން ސީޕްލޭން ޚިދުމަތް ރާއްޖެއަށް ތަޢާރަފްކުރުން - ފޮޓޯ: ޕީއެސްއެމް ނިއުސް

ޓީއެމްއޭގެ އެއަރކޮންޑިޝަން ކޮށްފައި ހުންނަ ލަކްޒަރީ ސީ ޕްލޭންގެ ޙިދުމަތް ރާއްޖެއަށް ތައާރަފްކުރުމަށްޓަކައި ބޭއްވި ރަސްމިއްޔާތު ޝަރަފްވެރިކޮށްދެއްވާ، އެމްއޭސީއެލްގެ މެނޭޖިންގެ ޑިރެކްޓަރ އާދިލް މޫސާ ވިދާޅުވީ އިބްރާހިމް ނާސިރު އިންޓަރނޭޝަނަލް އެއަރޕޯޓު ތަރައްޤީވެގެންދާއިރު އެއަރޕޯޓާއި އެއް ވަރަށް ޓީއެމްއޭވެސް ތަރައްޤީވެގެންދާނެ ކަމަށް ޤަބޫލްފުޅުކުރައްވާ ކަމަށެވެ. އަދި ޓީއެމްއޭ ރީލޮކޭޓު ކުރުމުގެ މަސައްކަތް ވަރަށް އަވަހަށް ފެށިގެންދާނެ ކަމަށްެވެސް އާދިލް މޫސާ ވިދާޅުވިއެވެ. img:http://s4.psmnews.mv/images/660x400/14606293160264.jpg|ޓީއެމްއޭއިން އެއަރ-ކޮންޑިޝަން ސީޕްލޭން ޚިދުމަތް ރާއްޖެއަށް ތަޢާރަފްކުރުން - ފޮޓޯ: ޕީއެސްއެމް ނިއުސް

މި ރަސްމިއްޔާތުގައި ޓީއެމްއޭގެ ސީއީއޯ، އޭ.ޔޫ.އެމް ފައުޒީ ވިދާޅުވީ ރާއްޖޭގެ ފަތުުރުވެރިކަން ކުރިއެރުވުމަށްޓަކައި ޓީއެމްއޭގެ ސީ ޕްލޭންގެ ޙިދުމަތުގެ ފެންވަރު އިތުރަށް ރަގަޅު ކުރައްވަމުން ގެންދަވާނެ ކަމަށެވެ. ޓީއެމްއޭގައި ޖުމްލަ 45 ސީ ޕްލޭން އޮވެއެވެ. އަދި އަހަރެއްގެ ތެރޭ ޓީއެމްއޭގެ ސީޕްލޭންގެ ޙިދުމަށް ހޯދާ ފަރާތްތަކުގެ އަދަދު މިލިއަނަކާއި ގާތްކުރެއެވެ.