ސްކޭމް މައްސަލަތަކުގައި ރައްޔިތުންގެ އަތުން 57 މިލިއަން ރުފިޔާ ވަނީ ގެއްލިފައި: ފުލުހުން

2021ވަނަ އަހަރުން ފެށިގެން މިހާތަނަށް، އޮޅުވާލައިގެން ފައިސާ ހޯދުމުގެ މައްސަލަތަކުގައި ދިވެހިންގެ އަތުން 57މިލިއަންވުރެ ގިނަ ރުފިޔާ ގެއްލިފައިވާކަމަށް ފުލުހުންގެ އިކޮނޮމިކް ކްރައިމް ޑިޕަރޓްމަންޓްއިން ވިދާޅުވެއްޖެއެވެ.

އިސްކަންދަރު ކޮށީގައި ބޭއްވި ނޫސްވެރިން ބައްދަލުކުރެއްވުމުގައި ފުލުހުން ވިދާޅުވީ މިދިޔަ އަހަރުގެ ފަހުކޮޅުން ފެށިގެން ޖެނުއަރީ މަހުގެ ނިޔަލަށް އެކަނިވެސް 27 މިލިއަން ރުފިޔާ ރައްޔިތުންގެ އަތުން ގެއްލިފައިވާކަމަށެވެ. ބޭންކުތަކާއި ފުލުހުންނާއި ކަމާގުޅުންހުރި އިދާރާތައް ގުޅިގެން ކުރި މަސައްކަތުން ހޯދިފައިވަނީ މީގެތެރެއިން މިލިއަނެއްހާ ރުފިޔާކަމަށް ފުލުހުން ވިދާޅުވިއެވެ.

ފުލުހުންގެ ހެޑް އޮފް އިކޮނޮމިކް ކްރައިމް ޑިޕަރޓްމަންޓް، ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވީ، 2021ވަނަ އަހަރުން ފެށިގެން މިކަމާއި ގުޅޭ ރެކޯޑްތައް ބަލަހައްޓަން ފެށިފަހުން، އޮޅުވާލައިގެން ފައިސާ ހޯދުމުގެ 28،003 މައްސަލަ ފުލުހަށް ހުށައަޅާފައިވާކަމަށެވެ. މި މައްސަލަތަކުގައި ގެއްލިފައިވާ ފައިސާގެ ޖުމްލަ 57 މިލިއަނުން މައްޗަށް އަރާކަމަށް އަބްދުﷲ ރަޝީދު ވިދާޅުވިއެވެ. މީގެތެރޭގައި 64ލައްކަ ޑޮލަރުވެސް ހިމެނޭކަމަށް އޭނާ ވިދާޅުވިއެވެ.

"2023ވަނަ އަހަރު 1087 މައްސަލަ ހުށައެޅި. 2023ވަނަ އަހަރު 971 މައްސަލަ. 2023ގައި މައްސަލަ މަދުނަމަވެސް، ގިނަ ފައިސާ ފޭރިފައިވަނީ އެ އަހަރު. މީގެތެރޭގައި ގިނައީ އެކައުންޓް ހެކްކޮށްގެން އެއް އެކައުންޓުން އަނެއް އެކައުންޓަށް ފައިސާ ޖަމާކުރުން." ފުލުހުންގެ ހެޑް އޮފް އިކޮނޮމިކް ކްރައިމް ޑިޕަރޓްމަންޓް، ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވިއެވެ.

ފުލުހުން ވިދާޅުވީ ޑިޖިޓަލް ވަސީލަތްތައް މެދުވެރިކޮށް ކުރާ ސްކޭމްގެ ތެރޭގައި ފްލެޓާއި ބިމާއި ގުޅޭ ފައިސާގެ މުޢާމަލާތާއި، އެކި ކަހަލަ ޕްރޮމޯޝަންތައް ހިންގުމުގެ ނަމުގައާއި އޮންލައިން ވިޔަފާރިތަކާއި ޑޮލަރުގެ މުވާމަލާތްތައްތަކުން އޮޅުވާލައިގެން ފައިސާ ހޯދުން ހިމެނޭކަމަށެވެ.

ސްކޭމްގެ މައްސަލަތައް އަވަހަށްށް ދެނެގަނެ، މިފަދަ މައްސަލަތަކަށް ކަމާގުޅުންހުރި އިދާރާތަށް ގުޅިގެން ޙައްލުކޮށްދުމަށް "ސްކޭމް ސެންޓަރ"އެއް ޤާއިމުކުރުމަށް ނިންމަވާފައިވާކަމަށް އަބްދުﷲ ރަޝީދު ވިދާޅުވިއެވެ. މަރޗް މަހު އެ މަސައްކަތް ފަށާ، މިއަހަރުގެ ތެރޭގައި ސެންޓަރު ޤާއިމުކުރުމަށް މަސައްކަތް ކުރައްވަމުންދާކަމަށް އޭނާ ވިދާޅުވިއެވެ.

"މިއީ ކަމާގުޅުންހުރި އިދާރާތައް އެއް ފުރާޅެއްގެ ދަށުން މަސައްކަތްކުރެވޭނެ ގޮތް ހެދުމަށް ހަދާ ތަނެއް. އޭރުން މައްސަލަ އަވަހަށް ދެނެގަނެވި، ފައިސާ ރިކަވަރ ކުރުމަށް އަވަސް ފިޔަވަޅުތައް އެޅޭނެ. އަދި މިފަދަ ބޮޑެތި ސްކޭމްތައް ހިނގަން އުޅޭކަން ކުރިއާލާ ދެނެގަނެވި، ފިޔަވަޅު އެޅުން އަވަސްކުރުންވެސް ހިމެނެއެވެ. ފުލުހުންގެ ހެޑް އޮފް އިކޮނޮމިކް ކްރައިމް ޑިޕަރޓްމަންޓް، ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވިއެވެ.

ސްކޭމްގެ މައްސަލަތަކަށް އާއްމުން ހޭލުންތެރިކުރުމަށްވެސް ފުލުހުން އަންނަނީ ގިނަ މަސައްކަތްކެއް ކުރަމުންނެވެ. އެގޮތުން ނެބަހުޑް ޕޮލިސްގެ އެހީގައި މަޢުލޫމާތު ޙިއްސާކުރުމާއި އަދި ހޭލުންތެރިކަން އިތުރުކުރުމުގެ އެކިކަހަލަ ޕްރޮގްރާމްތައް ބޭންކްތަކާއި ގުޅިގެން ހިންގުން ހިމެނެއެވެ.