ގުރައިދުއަށް ރައީސް ދެއްވި ޔަޤީންކަން، އެއަރޕޯޓުގެ ޢަމަލީ މަސައްކަތް މިއަހަރު ފަށާނެ!

ކޮޅުމަޑުލު ގުރައިދޫގައި އެއަރޕޯޓެއް ތަރައްޤީކުރުމުގެ ޢަމަލީ މަސައްކަތް މިއަހަރު ތެރޭގައި ފަށްޓަވާނެކަމަށް ރައީސުލްޖުމްހޫރިްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އަތޮޅުތަކަށް ކުރައްވާ ފުރަތަމަ ދަތުރުފުޅުގައި ގުރައިދޫއަށް ވަޑައިގެން ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސް ވިދާޅުވީ، އިންތިޚާބު ކާމިޔާބުކުރެއްވުމަށްފަހު އެންމެ ފުރަތަމަ ގުރައިދޫއަށް ވަޑައިގަތުމަކީ ލިބިވަޑައިގެންނެވި ޚާއްޞަ އުފަލެއްކަމަށެވެ. ރައީސް ވެވަޑައިގެންނެވި ވަޢުދުފުޅުތައް ތެދުވެރިކަމާ އިޚްލާސްތެރިކަމާއެކު ހަގީގަތަކަށް ހައްދަވައިދެއްވާނެކަމުގެ ޔަޤީންކަން ދެއްވަމުން ރައީސް ވަނީ ރަށުން ދެންނެވި ހޫނު މަރުޙަބާއަށް ޝުކުރު އަދާކުރައްވާފައެވެ.

ރައީސް ވިދާޅުވީ ކެމްޕެއިން ވަޢުދުތައް ފުއްދުމަށް ޚާއްޞަ ޕްލޭނެއްގެ ދަށުން މަސައްކަތްކުރައްވަމުން ގެންދަވާކަމަށެވެ. އެޕްލޭންގެ ދަށުން ކަނޑައެޅި 14 ހަފްތާގެ ތެރެއިން 9 ހަފްތާގެ ކަންކަން މިހާރު ޙާސިލްކުރެވިފައިވާކަމަށާއި، 14 ހަފްތާވާއިރު ކަނޑައަޅާފައިވާ ހުރިހާ ކަމެއް ހާސިލް ކުރައްވާނެކަމަށެވެ.

ރައީސް ވިދާޅުވީ އިންތިގާލީ މަރުހަލާގައި ލިބިވަޑައިގެންނެވި ކުޑަ ވަގުތުކޮޅުގައިވެސް ބޭނުންފުޅުވި ބައެއް ކަންކަން ބަޖެޓުގައި ހިމެނުއްވި ކަމަށާއި, އެގޮތުން ފުށި ދިއްގަރުފަޅު ހިއްކުމަށް ފައިސާ ހިމެނުއްވިކަމަށެވެ. އަދި ރައްޔިތުންނަށް ފައިދާކުރާނެ އެ މަޝްރޫޢުގެ ފައިސާ މަޖިލީހުން އުނިކުރައްވާފައިވާކަން ފާހަގަކުރައްވަމުން ރައީސް ވިދާޅުވީ ފައިސާ އުނިކުރި ނަމަވެސް އެ މަޝްރޫޢުވެސް މިހާރު ފަށްޓަވާފައިވާކަމަށެވެ.

ރައީސް ވިދާޅުވީ މިގޮތަށް ބަޖެޓުގައި ފައިސާ ކަނޑައަޅާފައި ނެތް މަޝްރޫޢުތައްވިޔަސް ރައްޔިތުންނަށް ފައިދާކުރާނެ ކަންކަން ކުރެއްވުމަށް އިސްކަން ދެއްވާނެކަމަށެވެ. އެގޮތުން މިއަހަރު މިރަށުގެ އެއަރޯޓުގެ ޢަމަލީ މަސައްކަތް ފަށްޓަވާނެ ކަމަށް ރައީސް ވިދާޅުވިއެވެ. ގުރައިދޫއަށް އެކަން ކޮށްދެއްވާނެކަމުގެ ޔަޤީންކަން ދެއްވާކަމަށާއި، އޭގެއިތުރުން ވެވަޑައިގެންފައިވާ އެހެން ވަޢުދުތައްވެސް ފުއްދަވާނެކަމަށް ރައީސް ވިދާޅުވިއެވެ. އެގޮތުން ހޮސްޕިޓަލާއި އެނޫންވެސް ކަންކަން ކުރައްވާނެކަމަށެވެ.

"ދުވަހަކުވެސް ރާއްޖޭގެ އިޤްތިޞާދު ވައްޓާނުލާ މިންވަރަށް ވަނީ ވައްޓާލާފައި. އޭގެން އަރައިގަތުމަށް ޤައުމު ކުރިއަށް ގެންދިއުމަށް އިޤްތިޞާދީ އަދި ރައްޔިތުންނަށް ފައިދާވާނެގޮތަށް ކުދި އަދި މެދުފަންތީގެ ވިޔަފާރި ކުރިއަށް ގެންދާނެ ވާހަކަ ދެންނެވިން" ރައީސުލްޖުމްހޫރިއްޔާ ވިދާޅުވިއެވެ.

އިޤްތިޞާދީ ހާލަތު ރަނގަޅުކުރުމަށް ގިނަ މަސައްކަތްތަކެއް އެބަހުރިކަމަށާއި, ހަމަމިއާއެކު ފަށަންހުރި ގިނަ މަޝްރޫޢުތަކެއް އެބަހުރިކަމަށްވެސް ވިދާޅުވިއެވެ.

"ދެން މިރަށުގައި ކުރަންހުރި ކަންކަންވެސް އަޅުގަނޑު ކުރާނަން. އެކަމު އެބަޖެހޭ ރައްޔިތުންނާ، ކައުންސިލް އަދި ރައްޔިތުންގެ މަޖިލީސް މެދުވެރިކޮށް މަޝްވަރާކުރަން. އެއީ ކުރަން ހުރި ކަންކަން ތަރުތީބުކުރަން. އެ ތަރުތީބުކުރީމަ އެނގޭނީ ކޮންކަމެއްކަން ފުރަތަމަ ކުރަންވާނީ. އެއަރޕޯޓާއެކު އެހެންކަންކަންވެސް ފުރިހަމަކުރާނަން."ރައީސުލްޖުމްހޫރިއްޔާ ވިދާޅުވިއެވެ.

ރައީސް ވަނީ ކުރީ ސަރުކާރު ނިމިގެން ދިޔައިރު ޤައުމުގެ ޙާލަތު އޮތްގޮތުގެ މައްޗަށްވެސް އަލިއަޅުއްވާލައްވާފައެވެ. އެގޮތުން ޤައުމުގެ ދަރަނި އިތުރުވެ ކުންފުނިތަކުގެ ޙާލަތު ވަރަށް ބޮޑަށް ދަށަށްގޮސްފައިވާކަމަށް ވިދާޅުވިއެވެ. ކުންފުނިތަކުގައި އެތައް ސަތޭކަ މިލިއަން ރުފިޔާގެ ނުދައްކާ ބިލްތައް އެބަހުރިކަމަށާއި، މިކަންކަމަކީވެސް ހަމައަކަށް އަޅުވަންހުރި ކަންކަންކަމަށް ރައީސް ވިދާޅުވިއެވެ. ރައީސްގެ ވާހަކަފުޅުގައި މިއީ ޤައުމުގެ އާމްދަނީ އިތުރުކުރަން ޖެހިފައިވާ ވަގުތެއްކަން ފާހަގަކުރެއްވިއެވެ.

ރައީސް ވަނީ އެމަނިކުފާނު ތުރުކީ ވިލާތަށާއި، ޗައިނާއަށް ކުރެއްވި ދަތުރުފުޅުން ރާއްޖެއަށް ބޮޑު ފައިދާއެއްކުރާނެކަމަށް ވިދާޅުވެފައެވެ. އަދި މިމަހުވެސް އިތުރު ދަތުރުފުޅެއް ކުރައްވަން ހަމަޖެހިފައިވާކަން ފާހަގަކުރައްވާ ރައީސް ވަނީ އެ ދަތުރުފުޅަށްފަހު މުޅި ރާއްޖޭގެ ހުރިހާ ރަށަކަށް ވަޑައިގަތުމަށް ދަތުރުފުޅެއް ފައްޓަވާނެކަމަށެވެ.

ރައީސް ވިދާޅުވީ ކުރިއަށް އޮތީ ހުރިހާ ރައްޔިތުންނަށްވެސް އުފާވެރި ދުވަސްތަކެއްކަމަށެވެ.