ރާއްޖެ ތަރައްޤީޤެ ދުވެލި ހަލުވި މިނެއްގައި ކުރިއަރާދާއިރު، އަޅުގަނޑުމެންގެ މުޖުތަމަޢު ކޮރަޕްޝަނަށް ހޭލާ ފާރަވެރިވެގެން ތިބުމަށް ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މުޙައްމަދު ލަތީފް އެދިވަޑައިގެންފިއެވެ.
އެމަނިކުފާނު މިކަމަށް އެދިވަޑައިގަތީ ޤައުމީ އެންޓި ކޮރަޕްޝަން ދުވަސް ފާހަގަކުރުމަށް ފުވައްމުލަކުގައި ބޭއްވި ޖަލްސާ ޝަރުފުވެރިކޮށްދެއްވާ ވާހަކަފުޅުދައްކަވަމުންނެވެ. ޤައުމީ އެންޓި ކޮރަޕްޝަން ދުވަސް ފުރަތަމަ ފަހަރަށް ފާހަގަކޮށްފައިވަނީ މިދިޔަ އަހަރުއެވެ. މިއަހަރު އެންޓި ކޮރަޕްޝަން ދުވަސް ފާހަގަކުރުމަށް ފުވައްމުލަކުގައި ބޭއްވެވި ޖަލްސާ ޝަރަފުވެރިކޮށްދެއްވާ ވާހަކަފުޅުދައްކަވަމުން ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މުޙައްމަދު ލަތީފް ވިދާޅުވީ، ކޮރަޕްޝަނާ ދެކޮޅަށް މަސައްކަތް ކުރަން ފުރަތަމަ ފަށަންވީ ފަރުދުންގެ ފަތިންކަމަށާއި ރާއްޖޭގެ ތަޢުލީމީ ދާއިރާގެ ތެރޭގައިވެސް ކޮރަޕްޝަނާ ދެކޮޅަށް ކުރެވޭ މަސައްކަތް ހިމަނަންޖެހޭ ކަމަށެވެ.
ޗާންސެލަރ ޑރ ލަތީފް ދެއްކެވި ވާހަކަފުޅުގައި، ސަރުކާރުގެ އެކި އިދާރާތަކުގައި ޚިދުމަތް ދޭން ތިބި ފަރާތްތަކުންނާއި ޚިދުމަތް ލިބިގަންނަ ފަރާތްތަކުން ނަޒާޙަތްތެރިކަމުގެ މިންގަނޑުގެ ތެރެއިން އަމަލުކުރުމަށް އަޒުމް ކަނޑައަޅަންޖެހޭ ކަމަށް ވިދާޅުވިއެވެ. ޗާންސެލަރގެ ވާހަކަފުޅުގައި، ދުނިޔޭގެ ތަރައްޤީވެ ކުރިއަރާފައިވާ ބޮޑެތި ޤައުމުތަކުން މިއަދު އެހިސާބަށް ދެވުނު މައިގަނޑު ސަބަބުތަކުގެ ތެރޭގައި ޤައުމުގައި ކޮރަޕްޝަނަށް ޖާގަ ނުދިނުން ހިމެނޭ ކަމަށާއި އޭގެ އެންމެ ބޮޑު މިސާލަކީ ސިންގަޕޫރު ކަމަށް ފާހަގަކުރައްވާ އެޤައުމުގައި ކަންކަން ހިނގަމުންދާ ގޮތުގެ މައްޗަށް އަލިއަޅުއްވާލެއްވިއެވެ.
މި ޖަލްސާގައި ވާހަކަދައްކަވަމުން އެންޓި ކޮރަޕްޝަން ކޮމިޝަންގެ ރައީސް ޙަސަން ލުތުފީ ވިދާޅުވީ، އޭސީސީން މަސައްކަތްކުރަމުން ގެންދަނީ ބޮޑެތި ގޮންޖެހުތަކަކާއެކު ކަން ފާހަގަކުރެއްވިއެވެ. އެގޮތުން ކޮމިޝަން ހުށަހެޅޭ މައްސަލަތަށް ބަލާ ތަޙްޤީޤްކުރުމުގައި ޤާނޫނީ ހުރަސްތަށް ކުރިމަތިވަމުންދާ ކަމަށް ލުތުފީ ފާހަގަކުރެއްވިއެވެ. ލުތުފީގެ ވާހަކަގައި، ކޮމިޝަނަށް ހުށަހެޅޭ ކޮރަޕްޝަންގެ މައްސަލަތަށް ބަލާ ތަޙުޤީޤްކޮށް، އެކަން ކުރި މީހަކަށް ހަމައެކަނި އަދަބު ދީގެން ކޮރަޕްޝަންގެ ވަބާ މިޤައުމުން ފޮހިވިގެންނުދާނެ ކަން ފާހަގަކުރެއްވިއެވެ.
މިރަސްމިއްޔާތުގައި ފުވައްމުލަކު އަތޮޅު ކައުންސިލްގެ ރައީސް ދެއްކެވި ވާހަކަގައި، ނަޒާޙަތްތެރިކަން ގުޅިފައިވަނީ އަޚްލާޤާ ތަރުބިއްޔަތުގެ މައްޗަށް ކަމަށް ވިދާޅުވިއެވެ.
ޤައުމީ އެންޓި ކޮރަޕްޝަން ދުވަސް ފާހަގަކުރުމަށް ބޭއްވެވި ޖަލްސާގައި، އޭސީސީގެ ތަފާސް ހިސާބު ފޮތް ނެރުމާއި، ކޮމިޝަނަށް މައްސަލަ ހުށަހަޅާ ފަރާތްތަކުގެ ޙިމާޔަތާ ރައްކާތެރިކަމާ ގުޅޭ ގޮތުން ވިސްލްބްލޯވ ކުރުމާބެހޭ ޤަވާއިދު ނެރުމާއި، އޭސީސީގެ ބިތުފަންގި ބްލެޓިންގެ ދެވަނަ އަދަދު ވަނީ ނެރެފައެވެ. މީގެ އިތުރުން އެންޓި ކޮރަޕްޝަން ދުވަސް ފާހަގަކުރުމަށް ހިންގި ސްކޫލް ކުދިންގެ ކުއިޒް މުބާރާތާއި، ޤުރުއާން މުބާރާތާއި، ކުއިޒް މުބާރާތުން ވަނަވަނައަށް އައި ފަރާތްތަކަށް ވަނީ ހަނދާނީ ލިޔުން ޙަވާލުކޮށްފައެވެ. މި ޖަލްސާގައި އެންޓި ކޮރޮޕްޝަން ބޯޑުގައި ގިނަ ދުވަސް މަސައްކަތްކުރި ފަރާތްތަކަށްވެސް ވަނީ ހަނދަނީ ފިލާ ދީފައެވެ. ޤައުމީ އެންޓި ކޮރަޕްޝަން ދުވަސް ފާހަގަކުރަނީ އެޕްރީލް މަހުގެ އެކާވީސް ވަނަ ދުވަހުއެވެ.