ނިލަންދެ އަތޮޅު ދެކުނުުބުރީ މީދޫގައި ހިއްކާފައިވާ ބިމުގެ ލޭންޑު ޔޫސް ޕްލޭން ނުވަތަ ބިން ބޭނުން ކުރަން ކައުންސިލުން ނިންމާފައިވާގޮތަށް އެބިން ބޭނުންކުރެވޭނެ ގޮތް ހައްދަވާ ދެއްވާފައިވާކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، މީދޫ ބިން ހިއްކުމުގެ މަޝްރޫޢުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އާބާދީގައި 1364 މީހުން ދިރިއުޅޭ މީދޫގެ ބޮޑު މިނަކީ 11 ހެކްޓަރެވެ. ސަރުކާރުގެ ބަޖެޓުން 12 މިލިއަން ޑޮލަރު ޚަރަދުކުރައްވައިގެން ސަރުކާރުންވަނީ އެރަށުގައި ގާތް ގަނޑަކަށް 20 ހެކްޓަރުގެ ބިން ހިއްކާ ދެއްވާ، ރިވެޓްމެންޓް ޖަހާ ދެއްވާފައެވެ. ރިވެޓްމެންޓު ޖެހުމަށް 27 މިލިއަން ރުފިޔާ ސަރުކާރުގެ ބަޖެޓުން ޚަރަދު ކުރައްވާފައިވެއެވެ. މީދޫގެ ބިން ހިއްކުމުގެ މަޝްރޫޢުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، ކައުންސިލުން ހުށައަޅުއްވާފައިވާގޮތަށް މީދޫގެ ހިއްކާފައިވާ ބިން ބޭނުންކުރެވޭނެގޮތަށް ސަރުކާރުން ހަމަޖައްސަވާ ދެއްވާފައިވާކަމަށެވެ.
މީދޫ ކައުންސިލް ވަނީ އެރަށުގައި ހިއްކާފައިވާ ބިމުގައި ބޯހިޔާވަހިކަމުގެ މަޝްރޫޢުތައް ކުރިއަށް ގެންދިއުމަށް ނިންމަވާފައެވެ. ރައީސްގެ ވާހަކަފުޅުގައި މީދޫއަށް ދިމާވެފައިވާ އެންމެ ބޮޑު ދައްޗަކީ ނަރުދަމާ ނިޒާމްގެ މައްސަލަކަން ފާހަގަކުރައްވާ މި އަހަރުގެ ތެރޭގައި އެކަމަށް ދާއިމީ ޙައްލެއް ލިބިގެންދާނެކަމަށް ވިދާޅުވިއެވެ. ރައީސް ޔާމީންގެ ވާހަކަފުޅުގައި ޒުވާނުންގެ އުއްމީދާއި ގުޅިފައިވަނީ ގެދޮރުވެރިކަންކަން ފާހަގަކުރައްވާ، މީދޫގައިވެސް އެ މަޝްރޫޢު ކުރިއަށް ގެންދެވޭނެކަމަށް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި މިހާރު ރާއްޖޭގައި އޮތް ޑިމޮކްރަސީގެ މައްޗަށްވެސް އަލިއަޅުއްވާލައްވާ ވާހަކަފުޅު ދެއްކެވިއެވެ. ރައީސް ޔާމީން ވިދާޅުވީ، ރާއްޖޭގައި މިވަގުތު މިއޮތީ ޑިމޮކްރަސީގެ އެންމެ ރަނގަޅު ނިޒާމްކަމަށާއި، ޑިމޮކްރަސީގެ ސަބަބުން ޤާނޫނީ ބާރު އެންމެންގެ މައްޗަށް ހިނގުމަށް ފުރުޞަތު އެބައޮތްކަމަށެވެ. އަދި ޑިމޮކްރަސީގެ ދަށުން ބާރުތައް ވަކިވެ ބެހިފައިވާކަމަށް ވިދާޅުވިއެވެ.
ރާއްޖޭގެ ޝަރުޢީ ދާއިރާއާއި ގުޅޭ ގޮތުންވެސް ރައީސް ޔާމީން ވާހަކަފުޅު ދެއްކެވިއެވެ. ރައީސް ވިދާޅުވީ، ރާއްޖޭގެ ސުޕްރީމް ކޯޓުން ކުރާ ޙުކުމްތަކާއި މެދު އިދިކޮޅު ފަރާތްތަކުން ސުވާލު އުފައްދަނީ، އެފަރާތްތަކުގެ މަސްލަހަތު އޮތް ވަކި ފަރާތްތަކަކާއި ދެކޮޅަށް ޙުކުމެއް އައިސްދާނެތީކަމަށެވެ. މަރުގެ ޙުކުމް ތަންފީޒުކުރުމާއި ދެކޮޅަށް ދައްކާ ވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ، މަރުގެ ޙުކުމް ތަންފީޒް ކުރެއްވުމަށް މި ސަރުކާރުން ބާރު އަޅަނީ، އިންސާނުންގެ ފުރާނައަކީ ކަރާމާތް ލިބިގެންވާ އެއްޗަކަށްވާތީ ފުރާނާއިގެ ކަރާމާތް ދެމެހެއްޓުމަށްކަމަށެވެ.
މި ރަސްމިއްޔާތުގައި މީދޫ ދާއިރާގެ މެމްބަރު އަޙްމަދު ސިޔާމް ވިދާޅުވީ މިހާރު ރާއްޖެއަށް އަންނަމުންދާ ޢުމްރާނީ ތަރައްޤީއަކީ މި ސަރަހައްދުގެ ޤައުމުތަކުގެ އިތުރުން އިރުމަތީ އެޝިޔާވެސް ނުދެކޭވަރު ކުރިއެރުމެއްކަަމަށެވެ. ސިޔާމް ވިދާޅުވީ ރާއްޖެއަކީ ވަސީލަތްތައް މަދު ބިން ކުޑަ ޤައުމެއްކަމަށާއި، އެހެންކަމުން ރާއްޖޭގެ ރައްޔިތުންނަކީ އިޤްތިޞާދުކުރަން ދަންނަ ބަޔަކަށް ވާންޖެހޭކަމަށެވެ.
މި ރަސްމިއްޠާތުގައި މީދޫގެ ބިންހިއްކުމަށް ސަރުކާރުން ކުރެއްވި މަސައްކަތްޕުޅު ފާހަގަކުރައްވާ މީދޫ ރައްޔިތުންގެ ފަރާތުން ރައީސުލްޖުމްހޫރިއްޔާ ޢަބްދުﷲ ޔާމީނަށާއި، މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދަށް ހަނދާނީ ފިލައެއް އެރުވިއެވެ.