ދުޅަހެޔޮ ސިއްޙަތަކަށް ބާރުއެޅުމުގެ ގޮތުން އެލައިޑް އިންޝުއަރަންސް ކޮމްޕެނީއިން ''ލައިފް އެންޑް ހެލްތު'' ފެސްޓިވަލެއް ބާއްވަން ނިންމައިފިއެވެ.
މިފެސްޓިވަލްގެ އަމާޒަކީ ދުޅަހެޔޮ ޞިއްޙަތެއްގައި ހުރުމުގެ މުހިންމުކަން އަންގައިދިނުމާއި ރަނގަޅު ލައިފްސްޓައިލެއް ޚިޔާރުކުރުމުގެ މުހިންމުކަމާމެދު ޙޭލުންތެރިކަން އިތުރުކޮށް މަޢުލޫމާތު ފޯރުކޮށްދިނުން ކަމަށް އެލައިޑުން މަޢުލޫމާތުދެއެވެ.
ފެސްޓިވަލާ ބެހޭ މަޢުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެލައިޑް އިންޝުއަރަންސްގެ މެނޭޖިންގ ޑިރެކްޓަރ އަޙުމަދު އަމީލް ވިދާޅުވީ، ލައިފް އެންޑް ހެލްތް ފެސްޓިވަލްގައި ހަތް ޕާރޓްނަރުންގެ ބައިވެރިވުމަށް ހަމަޖެހިފައިވާ ކަމަށާއި ފެސްޓިވަލް ބޭއްވުމަށް ހަމަޖެހިފައިވަނީ މިމަހުގެ ހަތާވީސް، އަށާވީސް މިދެދުވަހު ރަސްފަންނުގައި ކަމަށެވެ.
މިފެސްޓިވަލްގައި މިހާތަނަށް 7 ފަރާތަކުން ސްޓޯލްތަށް ބައިވެރިކޮށްފައިވާއިރު، ފެސްޓިވަލްގައި، އެކުއާ އެރޮބިކްސް ކަހަލަ ތަފާތު ޙަރަކާތްތައް ކުރިޔަށް ގެންދިއުމަށް ވަނީ ރޭވިފައެވެ. މިފެސްޓިވަލްގައި ޑައިބެޓީސް އެސޯސިއޭޝަނުން ބޮޑީ މާސް އިންޑެކްސް ރޭޓް ބެލުމާއި، ހަކުރު ޓެސްޓު ކުރުމަށް ހަމަޖެހިފައިވާ ކަމަށް އެފަރާތުން މަޢުލޫމާތު ދެއްވައެވެ.
މިފެސްޓިވަލް ބޭއްވުމަށް ހަމަޖެހިފައިވަނީ އާންމުކޮށް ހުޅުވާލައިގެން ކަމަށްވެސް އެލައިޑުން މަޢުލޫމާތު ދެއެވެ. އެ ކުންފުނިން މިފަހަރުގެ ފެސްޓިވަލް މި ބާއްވަނީ ދެއަހަރުގެ މެދުކެނޑުމަކަށް ފަހުގައެވެ. މިއީ ލައިފް އެންޑް ހެލްތް ފެސްޓިވަލް އެލައިޑުން ބާއްވާ 3 ވަނަ ފަހަރެވެ.
މިފެސްޓިވަލްގައި މުނިފޫހިފިލުވުމުގެ ޙަރަކާތްތަކާއި ކުޑަކުދިންނާއި ގުޅޭ ޚާއްސަ ޙަރަކާތްތަށް ކުރިޔަށް ގެންދިއުމަށް ވަނީ ހަމަޖެހިފައެވެ. މީގެ އިތުރުން މޯލްޑިވިއަން އައިޑޮލްގެ ބައިވެރިންގެ ހުނަރުތައް ފެނިގެންދާނެ ކަމަށްވެސް އެލައިޑުން މަޢުލޫމާތު ދެއްވާއެވެ. މިހާތަނަށް މި ފެސްޓިވަލްގައި ބައިވެރިވެފައިވާ ޕާރޓްނަރުންނަކީ ހެލްތް ޕްރޮޓެކްޝަން އެޖެންސީ، މޯލްޑިވިއަން ބްލަޑް ސަރވިސް، ޑައިބެޓިކްސް ސޮސައިޓީ އޮފް މޯލްޑިވްސް، އެސްޓީއޯ، ޓޯޓަލް ފިޓްނަސް ގްރޫޕް، ހީޓް ހެލްތް އެންޑް ފިޓްނެސް އަދި ގްލޯ ފިޓްއެވެ.