މޯލްޑިވްސް މީޓިއޮރޮލޮޖިކަލް ސަރވިސްއިން ޑްރާފްޓް ކުރަމުންދާ މޫސުމާބެހޭ ޤާނޫނަށް ބޭނުންވާ ލަފަޔާއި އިރުޝާދު ހޯދުމަށް ބާއްވާ ފަހު ބައްދަލުވުން ފަށައިފިއެވެ.
ކަމާ ގުޅުންހުރި ދާއިރާތަކާއެކު ކުރިޔަށްގެންދާ މިބައްދަލުވުމަކީ މޫސުމާ ބެހޭ ޤާނޫނު ވުޖޫދަށް ގެނައުމަށްޓަކައި ކުރަމުންދާ މަސައްކަތްތަކުގެ ދަށުން ސްޓޭކް ހޯލްޑަރުންގެ ޚިޔާލުހޯދާ އިތުރަށް ރަނގަޅުކުރަން ބޭނުންވާ ކަންތައްތައް ރަނގަޅުކުރުމަށް ކުރިޔަށްގެންދާ ވޯކްޝޮޕެއްކަމަށް މޯލްޑިވްސް މީޓިއޮރޮލޮޖިކަލް ސަރވިސްގެ، ޖެނެރަލް ކްލައިމެޓޮލަޖީގެ ޑެޕިއުޓީ ޑިރެކްޓަރ ޖެނެރަލް ޑރ ޒާހިދު ވިދާޅުވިއެވެ.
ޑރ ޒާހިދު ވިދާޅުވީ ޤާނޫނު ޑްރާފްޓް ކުރުމުގެ މަސައްކަތް ކުރަމުން ދަނީ ބޭރުގެ ކޮންސަލްޓެންޓަކާއި ރާއްޖޭގެ ކޮންސަލްޓެންޓެއްގެ އެހީތެރިކަމާއެކުގައިކަމަށެވެ. ޑރ ޒާހިދު ވިދާޅުވީ މި ޑްރާފްޓްގައި ރާއްޖޭގެ މޫސުން ކުރިޔަށް ލަފާކުރުމުގައި ގެންގުޅެންޖެހޭ ސްޓޭންޑަޑްތަކާއި، މޫސުމީ ކަންތައްތައް ރާއްޖޭގައި ތަރައްޤީކުރުމަށް ބޭނުންވާ ވަސީލަތްތައް ހޯދުންފަދަ ކަންތައްތަކަށް ބަލާލާފައިވާނެކަމަށެވެ.
މޯލްޑިވްސް މީޓިއޮރޮލޮޖިކަލް ސަރވިސް އިން ބުނީ ޤާނޫނު ޑްރާފްޓް ކުރުމުގެ މަސައްކަތުގެ ކޮންސަލްޓެންސީ ހަވާލުކޮށްފައިވަނީ 60 ދުވަހަށްކަމަށާއި، އެގޮތުން މިހާރު ކުރިޔަށްދަނީ މިކަމުގެ ފަހު ބައްދަލުވުންކަމުގައެވެ.
މި މަސައްކަތު ބައްދަލުވުމުގައި 35 ފަރާތަކުން ބައިވެރިވެއެވެ.