ތިންހާސް ހަތްސަތޭކަ ފަސްދޮޅަސް އެއް ދަރިވަރުންނާއެކު މި އަހަރުގެ އޭ ލެވެލް އިމްތިޙާނު މިއަދު ފަށައިފިއެވެ.
މިއަހަރުގެ މަތީ ސާނަވީ އިމްތިޙާނުގައި ރާއްޖޭގެ 45 ސްކޫލަކުން އިމްތިޙާންގައި ބައިވެރިވެއެވެ. އޭގެ ތެރޭގައި އެޗްއެސްސީ މާއްދާތައް ހަދާ 1870 ދަރިވަރުން ހިމެނޭކަމަށް އެޑިޔުކޭޝަން މިނިސްޓްރީން ހާމަކުރައްވައެވެ. ރާއްޖޭގެ އޭލެވެލް ހަދާ ހުރިހާ ސްކޫލެއްގައިވެސް އިމްތިޙާނު ފަށާފައިވާއިރު ފުރަތަމަ އިމްތިޙާނެއްގެ ގޮތުން އޮތީ އެޗްއެސްސީ އިސްލާމް މާއްދާއެވެ.
ދޮޅުމަސް ދުވަހަށް ދިގު ދެމިގެންދާ އިމްތިޙާން ނިމޭނީ އަންނަ ޖޫންމަހުގެ 28 ވަނަ ދުވަހުއެވެ. މިއަދު ފެށި އޭލެވެލް އަދި އެޗްއެސްސީ އިމްތިޙާނުގައި ބައިވެރިވަނީ 2014 ވަނަ އަހަރުގެ މެއި/ޖޫންގައި ކިޔަވަން ފެށި ދަރިވަރުންނެވެ.
މި އިމްތިޙާން ވެގެންދާނީ މެއި އަދި ޖޫންމަހު އޭލެވެލް އިމްތިޙާން ބާއްވާނެ އެންމެފަހު ފަހަރަށެވެ. މިއަހަރަށްފަހު އޭލެވެލްގެ އިމްތިޙާން ބޭއްވުމަށް ހަމަޖެހިފައިވަނީ އޮކްޓޯބަރު އަދި ނޮވެމްބަރުމަހުއެވެ.