މިއަހަރުގެ ކުޑަކުދިންގެ ދުވަސްކަމަށްވާ، މެއިމަހުގެ ދިހަވަނަ ދުވަހު ޕީއެސްއެމްގެ މުވައްޒަފުން، މަސައްކަތަށް ޙާޟިރުވާއިރު، މުވައްޒަފުންގެ 18 އަހަރު ނުފުރޭ ދަރިން ގޮވައިގެން ޙާޟިރުވާ ގޮތަށް ހަމަޖައްސައިފިއެވެ.
ވަރަށް ބުރަކޮށް އަދި ވަރަށް ގިނަ ވަގުތު ޢާއިލާއާ ވަކިން މަސައްކަތް ކުރަންޖެހޭ ޕީއެސްއެމްގެ މުވައްޒަފުންގެ ދަރިން ކުންފުނީގެ މަސައްކަތުގެ މާޙައުލުގައި ހެނދުނު 8 ން ހަވީރު 6 އާއި ހަމައަށް ޙަރަކާތްތެރިވާގޮތަށް ވަނީ ހަމަޖެހިފައެވެ. އަދި ކުންފުނީގެ މަސައްކަތުގެ މާޙައުލު ބަލާލުމުގެ ފުރުޞަތު މުވައްޒަފުންގެ 18 އަހަރު ނުފުރޭ ދަރިންނަށް ދިނުމަށްވެސް ވަނީ ކަނޑައެޅިފައެވެ. އަދި ކުންފުނީގެ ޓީވީ ބިލްޑިންގާ ރޭޑިއޯ ބިލްޑިންގގައިވެސް މިކަން ހިނގަމުންދާނެއެވެ.
މީގެ އިތުރަށް ކުޑަކުދިންގެ ބްރޯޑްކާސްޓްކުރުމުގެ ދުވަހު، މުވައްޒަފުން އޮފީހުގެ މަސައްކަތަށް ޙާޟިރުވާނީ ސްމާރޓް ކެޝުއަލް ހެދުމުގައި ކަމަށްވެސް ވަނީ ޕީއެސްމްގެ މެނޭޖްމަންޓުން ނިންމާފައެވެ.
މިއަހަރުގެ ކުޑަކުދިންގެ ދުވަސްކަމަށްވާ، މެއިމަހުގެ 10 ވަނަ ދުވަސް، ކުޑަކުދިންގެ ބްރޯޑްކާސްޓްކުރުމުގެ ދުވަހުގެ ގޮތުގައި ފާހަގަކުރުމަށް ޕީއެސްއެމްއިން ނިންމައި އެކަމަށް އަންނަނީ ތައްޔާރުވަމުންނެވެ. އެދުވަހުގެ ކޮންޓެންޓް ކުޑަކުދިންނަށް ވަރަށް ބޮޑަށް ޚާއްޞަކުރުމަށް ވަނީ ކަނޑައެޅިފައެވެ. އަދި ޚަބަރާއި ޕްރޮގްރާމްތައް ހުށަހެޅުމުގައި ކުޑަކުދިންގެ މުހިންމު ދައުރެއް ފެނިގެންދާނެއެވެ. އެދުވަހު ދިވެހިރާއްޖޭގެ އަޑާއި ޓީވީ މޯލްޑިވްސްއިން ގެނެސްދޭ ޚަބަރާއި ރިޕޯޓްތައް ތައްޔާރުކުރާނީވެސް ކުޑަކުދިންގެ ބޮޑު ދައުރަކާއި ބައިވެރިވުން އޮންނަ ގޮތަށެވެ. މި ކަމުގެ ތައްޔާރީތަކުގައި ސްކޫލްތަކާއި ކުދިންގެ ބެލެނިވެރިންގެ ބޮޑު އެއްބާރުލުމެއް ލިބެމުން އެބަދެއެވެ.