މިހާރުގެ ސަރުކާރުން ތަންފީޒް ކުރައްވަމުން ގެންދަވާ އިޞްލާޙީ މަސައްކަތްތައް ބޭރުގެ ފަރާތްތަކުން ބަލައިގަންނަ ކަމަށާއި، މި މަސައްކަތުގައި އެހީތެރިވާން މެމްބަރު ޤައުމުތައް ތައްޔާރަށް އޮތްކަމަށް ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.
މިދިޔަ ހަފުތާގައި އެކަމަނާ ސްރީލަންކާއަށް ކުރެއްވި ރަސްމީ ދަތުރުފުޅާ ބެހޭގޮތުން ޕީ.އެސް.އެމްއަށް ދެއްވި އިންޓަރވިއުއެއްގައި ވިދާޅުވީ، އެ ދަތުރުފުޅުގައި ސްރީލަންކާގެ ބޮޑުވަޒީރާއި، ޚާރިޖީ ވަޒީރާއި ސްރީލަންކާގައި ތިއްބަވާ ބޭރުގެ ސަފީރުންނާއި، ޑިޕްލޮމޭޓުންނާ ބައްދަލު ކުރެއްވި ކަމަށެވެ.
އަދި މި ބައްދަލުވުންތަކުގައި ސަރުކާރުންގެ ހިންގެވުން ހަރުދަނާ ކުރެއްވުމަށް ރައީސް ޔާމީނުގެ ގެންގުޅުއްވާ އިޞްލާޙީ ފިޔަވަޅުތަކުގެ ސިޔާސަތާއި އަދި ސިޔާސީ ޕާޓީތަކުގެ މަޝްވަރާއިން ލިބެމުން އަންނަ ކުރިއެރުންތަކާއި، އަދި މި މަޝްވަރާތަކުގައި އދ. އާއި އަދި އެހެނިހެން ފަރާތްތަކުން ވެދެމުން އަންނަ އެހީތެރިކަން އެ ބޭފުޅުންނާ ޙިއްޞާ ކުރައްވާފައިވާ ކަމަށެވެ.
މީގެ އިތުރަށް ޓެރަރިޒަމާ ދެކޮޅަށް ރާއްޖެއިން އަޅަމުން އަންނަ ފިޔަވަޅުތަކުގެ މަޢުލޫމާތު ޙިއްޞާކުރެއްވި ކަމަށް ވިދާޅުވިއެވެ. ދުންޔާ އިތުރަށް ވިދާޅުވީ، ހުރި ގޮންޖެހުންތަކާއެކުވެސް ސަރުކާރުން ކުރައްވާ މަސައްކަތްތައް ބަލައިގަންނަކަމަށް، ސަފީރުންނާއެކު ބޭއްވެވި ބައްދަލުވުންތަކުން ފާހަގަކުރެވިގެން ހިނގައްޖެކަމަށެވެ.
ޚާރިޖީ ވަޒީރު ދުންޔާ މައްމޫން ސްރީލަންކާއަށް ކުރެއްވި ދަތުރުފުޅުގައި، ސިޔާސީ މަޝަރާތަކުގައި ޙަރަކާތްތެރިވެވަޑައިގަތީ، ފިޝަރީޒް މިނިސްޓަރ މުޙައްމަދު ޝައިނީވެސް ބައިވެރިވަޑައިގެންނެވިއެވެ.