މިއަދު އިރުއޮއްސުނު ވަގުތު މާލެ ސަރަޙައްދަށް ވައިގަދަވެ، ކަނޑުގަދަވުމުގެ ސަބަބުން ތިލަފުށީ ނެރުމައްޗަށް ދޯންޏެއް ބަންޑުން ޖަހާލައިފިއެވެ. މިޙާދިސާ ހިނގިއިރު އެ ދޯނީގައި ތިބި 5 މީހުން ކޯސްޓްގާރޑުން ވަނީ ސަލާމަތްކޮށްފައެވެ. އަދި ތިލަފުށީ ފަޅުގައި އަޅާފައި އޮތް 3 ދޯންޏެއްގެ ވައު ކަނޑައިގެންގޮސް ފަރުމައްޗަށް ލައްވުމުގެ ޙާދިސާއެއްވެސް ވަނީ ހިނގާފައެވެ.
މޫސުން ގޯސްވެ ވިއްސާރަވުމުގެ ސަބަބުން މީހުންގެ ފުރާނައަށް ނުރައްކާވާފަދަ ކަނޑުމަތީގެ ތަފާތު ގިނަ ހާދިސާތައް ރާއްޖޭގެ އެކި ސަރަޙައްދުތަކުގައި ހިނގަމުންދާ ކަމަށް މޯލްޑިވްސް ނޭޝަނަލް ޑިފެންސް ފޯސްއިން ވިދާޅުވެއެވެ. ރާއްޖޭގެ ސަރަޙައްދަށް ވައިގަދަވަމުންދާތީ މިވަގުތު ދުރު ރަށްތަކަށް ކުރާ ކަނޑުދަތުރަށް ނުފުރުމަށް މޫސުމާބެހޭ ޤައުމީ އިދާރާއިން ވަނީ ލަފާ ދެއްވާފައެވެ.
އާދަޔާ ޚިލާފަށް ކަނޑުގަދަވުމުގެ ސަބަބުން މާލެއާއި ހުޅުމާލެއާއި އަދި މާލެއާއި ވިލިމާލެއާއި ދެމެދުގެ ފެރީ ދަތުރުތައްވެސް މިއަދު ހަވީރު މެދުކަނޑާލާފައިވެއެވެ. ކަނޑުދަތުރު ކުރަމުންދާ ފަރާތްތަކުންވެސް ބޮޑެތި ކަނޑުތަކަށް ނުނިކުތުމަށްވެސް މޫސުމާބެހޭ ޤައުމީ އިދާރާއިން ލަފާދެއްވެއެވެ.