ސްރީލަންކާގައި ދިރިއުޅޭ ދިވެހިން އިސްނަގައިގެން މިނިވަން ދުވަސް ކުލަގަދަކޮށް ފާހަގަކޮށްފި

ސްރީލަންކާގައި ހުންނަ ދިވެހިރާއްޖޭގެ ހައި ކޮމިޝަނާއި ސްރީލަންކާގައި ދިރިއުޅޭ ދިވެހިން އިސްނަގައިގެން މިއަހަރުގެ މިނިވަން ދުވަސް ކުލަގަދަކޮށް ފާހަގަކޮށްފިއެވެ.

މިނިވަން ދުވަހުގެ ހަރަކާތްތައް ސްރީ ލަންކާގައި ފަށާފައިވަނީ ހައި ކޮމިޝަނުން އިސްނަގައިގެން ބޭއްވި ދިދަ ނެގުމުގެ ރަސްމިއްޔާތަކުންނެވެ. މި ރަސްމިއްޔާތުގައި ދިވެހި ސަރުކާރުން ސްރީލަންކާއަށް ކަނޑައަޅުއްވާފައި ހުންނަވާ ސަފީރު މަސްއޫދު އިމާދު ބައިވެރިވެވަޑައިގެންނެވިއެވެ.

Flag hoisting ceremony held at the High Commission of Maldives on the occasion of 59th Anniversary of Independence Day of the Maldives🇲🇻 @MoFAmv
“ދިވެހީންގެ އަމިއްލަވަންތަކަން،ދިވެހީންގެ މިނިވަންކަން” pic.twitter.com/wPBt4YLIku

— Maldives in SriLanka (@MDVinSriLanka) July 26, 2024

މީގެ އިތުރުން މިނިވަން ދުވަސް ފާހަގަކުރުމަށް މިމަހުގެ 27 ވަނަ ދުވަހު، ސްރީލަންކާގައި ދިރިއުޅޭ ދިވެހިން އިސްނަގައިގެން ހަވީރެއް ވަނީ ބާއްވާފައެވެ. މި ހަވީރު ބާއްވާފައިވަނީ ސްރީލަންކާގައި ހުންނަ މޯލްޑިވްސް ސެންޓަރ ސޯސަންވިލާގައެވެ.

ސްރީލަންކާގައި ހުންނަ ދިވެހި ހައި ކޮމިޝަނުން މަޢުލޫމާތު ދެއްވި ގޮތުގައި 27 ވަނަ ދުވަހު އޮތް ހަވީރު ފެށީ ސްރީލަންކާގައި ދިރިއުޅޭ ދިވެހިނަށް މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރާއްޖޭގެ ޑިޕްލޮމެޓިކް މިޝަންތަކާއި ރާއްޖޭން ބޭރުގައި ދިރިއުޅޭ ދިވެހިންނަށް ފޮނުއްވެވި މެސެޖަކުން ކަމަށެވެ.

މި ހަވީރުގައި ސްރީލަންގައި ކިޔަވާ ދިވެހި ދަރިވަރުންގެ ސަގާފީ ހުށައެޅުންތަކެއްވެސް ކުރިއަށްދިޔަކަމަށް ހައި ކޮމިޝަނުން މަޢުލޫމާތު ދެއެވެ. އަދި ހަވީރު ސައެއްވެސް ބޭއްވިކަމަށް މަޢުލޫމާތު ދެއްވިއެވެ.

މިނިވަން ދުވަސް ކޮންމެ އަހަރަކުވެސް ރާއްޖޭގައި ފާހަގަކުރަނީ އިނގިރޭސީންގެ ޙިމާޔަތުން ރާއްޖެއަށް މިނިވަންކަން ލިބުމުންނެވެ. ރާއްޖެ މިނިވަންވީ އިނގިރޭސި ސަރުކާރާއި ދިވެހި ސަރުކާރާ ދެމެދު ސޮއިކުރެވުނު މިނިވަންކަމުގެ އެއްބަސްވުމަކާ ގުޅިގެންނެވެ. މި އެއްބަސްވުމުގައި ސޮއިކުރެވުނީ 1965 ވަނަ އަހަރުގެ ޖުލައިމަހުގެ 26 ވަނަ ދުވަހުއެވެ.