ޤުދުރަތީ މާޙައުލުތަކުން ފުރިހަމަ ގޮތުގައި ނަފާ ލިބޭނީ އެތަންތަން ރަނގަޅަށް ބަލަހައްޓައިގެން: ޠާރިޤް

ރާއްޖޭގެ ޤުދުރަތީ މާޙައުލުން ފުރިހަމަ ގޮތުގައި ނަފާ ލިބޭނީ އެތަންތަން ދެމެހެއްޓެނިވި ގޮތެއްގައި ރައްކާތެރިކޮށް، ބެލެހެއްޓިގެންކަމަށް މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެެވެ.

ވަޒީރު މިހެން ވިދާޅުވީ ކަނޑުތަކުގައި ހިމާޔަތްކޮށްފައިވާ ސަރަހައްދުތައް ބެލެހެއްޓުމުގެ ޕްލޭން އެކުލަވާލުމަށް ކައުންސިލްތައް ތަމްރީންކުރުމުގެ ޕްރޮގުރާމު ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.

ތަމްރީން ޕްރޮގުރާމު ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ޠާރިޤް އިބްރާހިމް ވިދާޅުވީ ރާއްޖޭގެ ޖީޑީޕީގެ 89 އިންސައްތަ ހިއްސާކުރަނީ ޤުދުރަތީ ވަޞީލަތްތަކާއި މާޙައުލުތައް ބޭނުންކޮށްގެން ހިންގާ މަސައްކަތުން ލިބޭ ނަފާގެ މައްޗަށް ކަމަށެވެ. އެގޮތުން ފަތުރުވެރިކަމުގެ ދާއިރާއާއި މަސްވެރިކަމުގެ ދާއިރާއަކީ ރާއްޖޭގެ ޤުދުރަތީ މާހައުލާއި ގުޅިފައިވާ ސިނާއަތްތަކެއްކަން ފާހަގަކުރައްވަމުން ވަޒީރު ވިދަޅުވީ މި ސިނާޢަތްތަކުން ފުރިހަމަގޮތުގައި ރާއްޖެއަށް ނަފާ ލިބޭނީ ޤުދުރަތީ ވަޞީލަތްތަކާއި ހިމާޔަތްކޮށްފައިވާ ޤުދުރަތީ މާޙައުލުތައް ރަނގަޅަށް ބަލަހައްޓައި މެނޭޖްކުރެވިގެން ކަމަށެވެ.

ވަޒީރު ވިދާޅުވީ ތިމާވެށީގެ ގޮތުން ހިމާޔަތްކޮށްފައިވާ ސަރަހައްދުތައް ބަލަހައްޓަން ޕްލޭން އެކުލަވާލުމުގެ މަސައްކަތަށް ކައުންސިލްތައް ތަމްރީންކުރެވުމާއެކު އެފަދަ ތަންތަން މެނޭޖުކޮށް ބަލަހައްޓަން ވުޒާރާއަށް ފަސޭހަވާނެކަމަށެވެ. އަދި ތަމްރީން ދިނުމުގެ މަޤްޞަދަކީ ވުޒާރާއާއި ކައުންސިލްތަކާއި ރައްޔިތުން ގުޅިގެން އެފަދަ ތަންތަން ބެލެހެއްޓުންކަމަށްވެސް ތިމާވެށްޓާބެހޭ ވަޒީރު ވިދާޅުވިއެވެ.

"ގްލޯބަލް ބަޔޯޑައިވަރސިޓީ ފްރޭމްވަރކްގެ ދަށުން ކޮންސަވޭޝަން އޮން ބަޔޮލޮޖިކަލް ޑައިވަރސިޓީ ކޮންވެންޝަނުން ކަނޑައަޅާފައި އެބައޮތް 2030 ވަނަ އަހަރުގެ ކުރިން ދުނިޔޭގެ 30 އިންސައްތައަކީ ހިމާޔަތްކޮށްފައިވާ ސަރަހައްދަކަށް ހެދުމަށް. އަޅުނގަނޑުމެންވެސް ރާއްޖޭގައި ހުރި މުހިންމު ސަރަހައްދުތައް ހިމާޔަތްކުރުމުގެ މަސައްކަތް ބަޔޯޑައިވަރސިޓީ ފްރޭމްވަރކްގެ ދަށުން މިދަނީ ކުރަމުން." ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖޭގައި ޙިމާޔަތްކޮށްފައިވާ ސަރަހައްދުތަކުގެ ތެރެއިން ރަނގަޅަށް ބެލެހެއްޓެނީ 5 ސަރަހައްދެއް ކަމަށާއި އެއީ ހިމާޔަތްކޮށްފައިވާ ސަރަހައްދުތަކުގެ 2 އިންސައްތަކަމަށެވެ. އަދި ހިމާޔަތްކޮށްފައިވާ 91 ސަރަހައްދެއް ރަނގަޅަށް ނުބެލެހެއްޓޭކަންވެސް ވަޒީރު ވިދާޅުވިއެވެ.

ވަޒީރު ވިދާޅުވީ ހިމާޔަތްކޮށްފައިވާ ސަރަަހައްދުތައް ބަލަހައްޓަން ޕްލޭނެއް އެކުލަވާލުމަށް ކައުންސިލްތައް ތަމްރީންކުރުމުގެ ދެ ޕްރޮގުރާމެއް ރާއްޖޭގެ 2 ސަރަހައްދެއްގައި ކުރިއަށް އޮތްތަނުގައި ކުރިއަށްގެންދާނެކަމަށެވެ.

ހިމާޔަތްކޮށްފައިވާ ކަނޑުގެ ސަރަހައްދުތައް ބެލެހެއްޓުމުގެ ޕްލޭންތަކެއް އެކުލަވާލުމަށް ކައުންސިލްތައް ތަމްރީންކުރަނީ އިނގިރޭސިވިލާތުގެ އޯޝަން ކަންޓްރީ ޕަރޓްނާޝިޕް ޕްރޮގުރާމުގެ ދަށުންނެވެ. މި ޕްރޮގުރާމަށް ފަންޑު ކުރަނީ އިނގިރޭސި ސަރުކާރުންނެވެ. މި ތަމްރީން ޕްރޮގުރާމަކީ ހިމާޔަތްކޮށްފައިވާ ކަނޑުގެ ސަރަހައްދުތައް މެނޭޖްކުރުމާ ބެހޭގޮތުން ހިންގާ ފުރަތަމަ ޕްރޮގުރާމެވެ.

ތިމާވެށްޓާބެހޭ ވުޒާރާއިން ވިދާޅުވީ މި ޕްރޮގުރާމްގައި ބައިވެރިވަނީ ހިމާޔަތްކޮށްފައިވާ 91 ސަރަހައްދެއް ކައިރީގައި އޮންނަ ރަށްތަކުގެ ކައުންސިލް އިދާރާގެ މުވައްޒަފުންނެވެ. އަދި ތަމްރީން ޕްރޮގުރާމުތަކުގައި މިހާތަނަށް މެނޭޖްމެންޓް ޕްލޭން ހަދާފައިނުވާ 3 ސަރަހައްދަކަށް ޕްލޭނެއް ހެދޭނެކަމަށްވެސް ވަޒީރު ވިދާޅުވިއެވެ.

މި ތަމްރީންތައް ކުރިއަށްގެންދަނީ 1 ދުވަހުގެ މުއްދަތަކަށެވެ. މީގެ ދެވަނަ ޕްރޮގުރާމް މިއަހަރުގެ ތެރޭގައި ރާއްޖޭގެ ދެކުނުގެ އަތޮޅުތަކަށް ޚާއްސަކޮށްގެން ބާއްވާނެކަމަށްވެސް ތިމާވެށްޓާއި ހަކަތައާބެހޭ ވުޒާރާއިން ވިދާޅުވެއެވެ.