ދުނިޔޭގެ ޞިއްޙަތު ޖަމިއްޔާއިންދޭ އެވޯޑްތަކަށް ކުރިމަތިލާން ދިވެހިންނަށް ހުޅުވާލައިފި

ދުނިޔޭގެ ޞިއްޙަތު ޖަމިއްޔާއިންދޭ އެވޯޑުތަކަށް ކުރިމަތިލާން ޞިއްޙީ ދާއިރާގައި މަސައްކަތްކުރާ ދިވެހިންނަށް ހުޅުވާލައިފިއެވެ.

ޞިއްޙީ ވުޒާރާގެ އިޢުލާނެއްގައި ވިދާޅުވީ ދުނިޔޭގެ ޞިއްޙަތު ޖަމިއްޔާއިން ބާއްވާ ވޯލްޑް ހެލްތު އެސެމްބްލީގައި ކޮންމެ އަހަރަކުވެސްދޭ އެވަރޑުތަކަށް ކުރިމަތިލުމުގެ ފުރުސަތު މިހާރު ހުޅުވާލާފައިވާ ކަމަށެވެ. މި އެވަރޑުތަކަކީ އަންނަ އަހަރު ބާއްވާ ވޯލްޑް ހެލްތު އެސެމްބްލީގައި ދޭން ހަމަޖެހިފައިވާ އެވަރޑުތަކެކެވެ. މިގޮތުން 5 އެވޯޑަކަށް ކުރިމަތިލާން ޞިއްޙީ ވުޒާރާއިން ވަނީ ދިވެހިންނަށް ހުޅުވާލާފައެވެ.

މި އެވޯޑުތަކަށް ކުރިމަތިލެވޭނީ ޞިއްޙަތު ޖަމުއިއްޔާގެ މެންބަރު ޤައުމުތަކުގެ ތެރެއިން ކޮންމެ ޤައުމަކުންވެސް އެކަކަށް، ނުވަތަ ޖަމިއްޔާއަކަށެވެ.

ޞިއްޙީ ވުޒާރާއިން ވިދާޅުވީ އެވޯޑުތަކަށް ކުރިމަތިލާ މީހުންގެ ތެރެއިން ރާއްޖޭގެ ފަރާތުން ވާދަކުރާނެ މީހަކު ހޮވުމުގައި އެމީހަކު ކޮށްފައިވާ މަސައްކަތްތަކާއި ހުށައަޅާ ލިޔެކިޔުންތަކަށް ރިޢާޔަތްކުރެވޭނެ ކަމަށެވެ.

ޞިއްޙީ ވުޒާރާގެ އިޢުލާނުގައިވަނީ އެވޯޑުތަކަށް ޝައުޤުވެރިވާ ދިވެހިން އަންނަ ސެޕްޓެންބަރުމަހުގެ 1 ވަނަ ދުވަހުގެ މެންދުރު 12:00 ގެ ކުރިން ޞިއްޙީ ވުޒާރާއަށް ނަން ހުށަހަޅަންޖެހޭކަމަށެވެ.

ޞިއްޙަތު ޖަމިއްޔާއިންދޭ އެވަރޑުތައް:

• ސަސަކަވާ ހެލްތު ޕްރައިޒް
• ޔުނައިޓެޑް އަރަބް އެމިރޭޓްސް ހެލްތު ފައުންޑޭޝަން ޕްރައިޒް
• ސްޓޭޓް އޮފް ކުވައިތު ހެލްތު ޕްރޮމޯޝަން ފައުންޑޭޝަން، "ހިޒް ހައިނެސް ޝައިޚް ޞަބާޙް އަލް-އަޙްމަދް އަލް-ޖާބިރް އަލް-ޞަބާޙް ޕްރައިޒް ފޮރ ދަ ޕްރޮމޯޝަން އޮފް ހެލްތީ އޭޖިންގ"
• ޑރ. ލީ ޖޮންގ-ވޫކް މެމޯރިއަލް ޕްރައިޒް ފޮރ ޕަބްލިކް ހެލްތު
• ނެލްސަން މަންޑެލާ އެވޯޑު ފޮރ ހެލްތު ޕްރޮމޯޝަން

ޞިއްޙީ ވުޒާރާއިން އެވޯޑްތަކަށް ކުރިމަތިލާން ބޭނުންވާ ފަރާތްތަކުން އެ ވުޒާރާގެ އީމެއިލް [email protected] މެދުވެރިކޮށް ފޯމު ހުށައެޅޭނެ ކަމަށެވެ. އަދި މިކަމާ ގުޅިގެން އިތުރު މަޢުލޫމާތު ހޯދަން ބޭނުންނަމަ، ވުޒާރާގެ ނަންބަރު 3014375 އަށް ގުޅުމުން މަޢުލޫމާތު ލިބޭނެކަމަށް އެ ވުޒާރާއިން ބުނެއެވެ.

އެވަރޑުތައް ދޭން ހަމަޖެހިފައިވަނީ އަންނަ އަހަރު ސްވިޓްޒަލޭންޑްގެ ޖެނީވާގައި އޮންނަ 78 ވަނަ ވޯލްޑް ހެލްތު އެސެންބްލީގައެވެ. މީގެ ކުރިން ބޭއްވި އެސެންބްލީތަކުގައި ދިވެހިރާއްޖެއިން ވަނީ ބައެއް އެވޯޑުތައް ޙާސިލްކޮށްފައެވެ. އެގޮތުން ދިވެހިރާއްޖޭގެ ޖަމިއްޔާތަކުން 5 ފަހަރަކު ޞިއްޙަތު ޖަމިއްޔާއިންދޭ އެވަރޑުތައް ހޯދާފައިވެއެވެ.

އެންމެ ފަހުން ރާއްޖެއަށް މިފަދަ އެވޯޑެއް ލިބުނީ 2013 ވަނަ އަހަރު ރާއްޖޭގެ ޑަޔަބެޓިސް ސޮސައިޓީ އޮފް މޯލްޑިވްސްއަށެވެ. އެއީ ޑރ. ލީ ޖޮންގ-ވޫކް މެމޯރިއަލް ޕްރައިޒް ފޮރ ޕަބްލިކް ހެލްތު އެވަރޑްއެވެ.

ދުނިޔޭގެ ޞިއްޙަތު ޖަމުއިއްޔާއިން ވިދާޅުވާ ގޮތުގައި މި އެވަރޑުތައް ދިނުމުގެ މަޤުޞަދަކީ ޞިއްޙީ ދާއިރާގައި މަސައްކަތްކުރާ ފަރާތްތަކުން ހޯދައި ކާމިޔާބީތަކުގެ އަގުވަޒަން ކުރުމެވެ. މި އެވަރޑުތައް ދޭނީ ވަކިވަކި ފަރާތްތަކަށާއި ދާއިރާއަށް އެހީދޭ ފަރާތްތަކަށާއި ޞިއްޙީ ދާއިރާ ކުރިއަރުވައި، ޞިއްޙީ ޚިދުމަތް ފޯރުކޮށްދޭ ޖަމިއްޔާތަކަށެވެ.