ޓްރޮފީގެ ޑިޒައިނަށް ބަދަލު ގެނެސް، މަޓާޓޯ މޯލްޑިވްސް ޓްރެވަލް އެވޯޑްސްގެ އާ ޓްރޮފީ ތަޢާރަފްކޮށްފިއެވެ.
އަދި މިއާއެކު މިއަހަރުގެ މަޓާޓޯ މޯލްޑިވްސް ޓްރެވަލް އެވޯޑަށް ނަން ހުށަހެޅުމުގެ ފުރުޞަތުވަނީ ހުޅުވާލާފައެވެ. ހޮޓެލް ޖެންގައި ބޭއްވި ޙާއްޞަ ރަސްމިއްޔާތެގައި މަޓާޓޯ މޯލްޑިވްސް ޓްރެވަލް އެވޯޑްސްގެ އާ ޓްރޮފީ އަދި އާ ލޯގޯ ތަޢާރަފްކޮށްދެއްވީ މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަންގެ މެނޭޖިންގ ޑިރެކްޓަރ މުޙައްމަދު ހާރިސްއެވެ. img:http://s1.psmnews.mv/images/660x400/14639968833660.JPG|މަޓާޓޯ ޓްރެވަލް އެވޯޑް - ފޮޓޯ: މަޓާޓޯ
މި ރަސްމިއްޔާތުގައި ވަނީ މާޓާޓޯ ޓްރެވަލް އެވޯޑްސްގެ އޮފިޝަލް ހޮޓެލް ޕާޓްނަރަކަށް ހޮޓެލް ޖެން ހަމަޖައްސައި އެކަމާގުޅޭ އެއްބަސްވުމުގައި ސޮއިކޮށްފައެވެ. މިއަހަރުގެ މަޓާޓޯ ޓްރެވަލް އެވޯޑްސްއާ ގުޅޭގޮތުން މީޑިއާއަށް މަޢުލޫމާތުދެއްވަމުން މާޓާޓޯގެ ރައީސް ޢަބްދުﷲ ޤިޔާސް ވިދާޅުވީ މިއަހަރުގެ އެވޯޑް ޝޯ ތަފާތު ގޮތަކަށް ކުރިއަށް ގެންދިޔުމަށް ރާވަމުން އަންނަކަމަށާއި، އެގޮތުން މިއަހަރުގެ އެވޯޑް ޝޯ ދެދުވަހުގެ އިވެންޓެއްގެ ގޮތަށް ކުރިއަށް ގެންދިޔުމަށް ރާވަމުން އަންނަކަމަށް ޤިޔާސް ވިދާޅުވިއެވެ.
މަޓާޓޯ މޯލްޑިވްސް ޓްރެވަލް އެވޯޑްސްއަށް ނަން ހުށަހެޅުމުގެ ފުރުޞަތު ހުޅުވާލާފައިވަނީ އަންނަ މަހުގެ ނިޔަލަށެވެ. މިއަހަރުގެ މަޓާޓޯ ޓްރެވަލް އެވޯޑްސް ދިނުމަށް ހަމަޖެހިފައިވަނީ 36 ކެޓަގަރީއަކުންނެވެ. ނަން ހުށަހެޅޭނެ ކެޓަގަރީތަކާ ގުޅޭގޮތުން މަޢުލޫމާތުދެއްވަމުން މަޓާޓޯގެ ސެކެރެޓަރީ ޖެނެރަލް އިބްރާހީމް މުނާޒު ވިދާޅުވީ މިއަހަރުގެ ޓްރެވަލް އެވޯޑްސްއަށް އައު 5 ކެޓަގަރީއެއް ތަޢާރަފްކޮށްފައިވާ ކަމަށެވެ.
މިއަހަރުގެ މޯލްޑިވްސް ޓްރެވަލް އެވޯޑްސް އިންތިޒާމްކުރާނީ ތިންކް އެޑްވަރޓައިޒިންގްގެ ފަރާތުންނެވެ. މިއީ މަޓާޓޯއިން މޯލްޑިވްސް ޓްރެވަލް އެވޯޑްސް ބާއްވާ ފަސްވަނަ އަހަރެވެ.