ޓެރެސްޓީރިއަލް ބްރޯޑްކާސްޓިން ޕްރޮޖެކްޓު ބާރަށް ކުރިއަށް؛ 12 ރަށުގެ އިމާރާތުގެ މަސައްކަތް ނިމިއްޖެ

ކާރިސާގެ މަޢުލޫމާތާއި ޢާއްމު މަޢުލޫމާތު ވަގުތުން ވަގުތަށް ފޯރުކޮށްދިނުމަށް ޖަޕާނުގެ އެހީގައި ރާއްޖޭގައި ޤާއިމުކުރާ ޑިޖިޓަލް ޓެރެސްޓީރިއަލް ބްރޯޑްކާސްޓިންގެ މަޝްރޫޢޫގައި ހިމެނޭ އިމާރާތްތައް އެޅުމުގެ މަސައްކަތުގެ ބޮޑު ބައެއް ނިމިފައިވާކަމަށް ޕަބްލިކް ސާވިސް މީޑިއާ، ޕީއެސްއެމްގެ މެނޭޖިންގް ޑިރެކްޓަރ ޒީނާ ޒާހިރު ވިދާޅުވެއްޖެއެވެ.

ޕީއެސްއެމްގެ މެނޭޖިން ޑިރެކްޓަރު މިހެން ވިދާޅުވީ "ޑިޖިޓަލް ޓެރެސްޓީރިއަލް ޓެލެވިޜަން ބްރޯޑްކާސްޓިން އޮޕަރޭޝަން ކެޕޭސިޓީ އިމްޕްރޫވްމަންޓް ޕްރޮޖެކްޓް"ގެ މަޝްރޫޢުގެ 11ވަނަ ޖޮއިން ކޮމިޓީ ބައްދަލުވުމުގައެވެ.

ޖަޕާނުގެ ހިލޭ އެހީގެ ދަށުން ކުރިއަށްގެންދާ "ޑިޖިޓަލް ޓެރެސްޓީރިއަލް ޓެލެވިޜަން ބްރޯޑްކާސްޓިން އޮޕަރޭޝަން ކެޕޭސިޓީ އިމްޕްރޫވްމަންޓް ޕްރޮޖެކްޓް"ގެ ޢަމަލީ މަސައްކަތް ސަރުކާރުން ހަވާލުކުރައްވާފައިވަނީ ޕަބްލިކް ސަރވިސް މީޑިއާ ޕީއެސްއެމްއާއެވެ. މި މަޝްރޫއަކީ ފޮރިން މިނިސްޓްރީ، ފިނޭންސް މިނިސްޓްރީ، ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ، މޯލްޑިވްސް މީޓިއޮރޮލޮޖިކަލް ސެންޓަރ، ކޮމިއުނިކޭޝަން އޮތޯރިޓީ އޮފް މޯލްޑިވްސް، ބްރޯޑްކާސްޓިން ކޮމިޝަން އަދި ޕީއެސްއެމް ގުޅިގެން ކުރިއަށްގެންދާ މަޝްރޫޢުއެކެވެ.

މިމަޝްރޫޢުގެ މައުލޫމާތު ހިއްސާ ކުރުމަށް މިއަދު މެންހެޓަން ބިޒްނަސް ސްކޫލުގައި ބޭއްވި ޖޮއިންޓް ކޯޑިނޭޝަން ބައްދަލުވުމުގައި ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވީ، މި މަޝްރޫޢުގެ މަސައްކަތް ނިންމައި ހަވާލު ކުރުމަށް ހަމަޖެހިފައިވަނީ މުއްދަތު އިތުރުކޮށްދީފައިވާ ކަމަށެވެ. އެގޮތުން މިހާރު މަޝްރޫއުގެ މަސައްކަތް ނިންމުމަށްފަހު ހަވާލު ކުރަން ހަމަޖެހިފައިވާ ތާރީޚަކީ 2026 ވަނަ އަހަރުގެ ޖުލައި މަހުގެ ނިޔަލަށްކަމަށް ޕީއެސްއެމްގެ މެނޭޖިންގ ޑިރެކްޓަރު ވިދާޅުވިއެވެ.

މިމަޝްރުޢޫގެ ދަށުން ރާއްޖޭގެ 20 އަތޮޅުގައި ނެޓްވޯކް ޤާއިމް ކުރުމަށް ބޭނުންވާ ޓަވަރުތަކާއި އިމާރާތްތައް އަޅާނެއެވެ. އެގޮތުން މިހާރު 19 އަތޮޅެއްގެ މަސައްކަތް ފަށައި 12 ރަށެއްގެ މަސައްކަތް ނިމިފައިވާކަން ޕީއެސްއެމްއިން ހާމަކުރެއެވެ.

"މި 19 ރަށުގެ ތެރެއިން 12 ރަށެއްގެ އިމާރާތުގެ މަސައްކަތް އެއްކޮށް މިހާރު ވަނީ ނިމިފައި. މިހާރު ނުފެށިވާ ބ. އޭދަފުށީގެ މަސައްކަތް ކައުންސިލާއި އަދި ގުޅުންހުރި އިދާރާތަކާއި އެކު ކުރެވުނު މަޝްވަރާތަކަށް ފަހު މި ހަފްތާ ތެރޭގައި ފެށޭނެ" ޕީއެސްއެމްގެ އެމްޑީ ޒީނާ ވިދާޅުވިއެވެ.

ޕީއެސްއެމް އިން ވިދާޅުވީ، މިމަސައްކަތުގެ ކޮންސްޓްރަކްޝަން މަސައްކަތްތައް އަދި ބައެއް ރައްތަކުގައި ކުރިއަށްދާއިރު، މިހާރު ވަސީލަތްތައް ހޯދުމުގެ މަސައްކަތްތައް ފެށިފައިވާ ކަމަށެވެ. އަދި ބަޖެޓުގެ ތާށި ކަމާއިއެކުވެސް މާލީ ވުޒާރާއާއި އެހެން އިދާރާތަކާއި ގުޅިގެން މިމަސައްކަތް ނުހުއްޓި ކުރިއަށް ގެންދަން މަސައްކަތް ކުރަމުންދާ ކަމަށް ވިދާޅުވިއެވެ.

ކުއްލި ޙާލަތްތަކުގައި މަޢުލޫމާތު އެލަރޓްގެ ގޮތުގައި ޓީވީއާއި ޑިޖިޓަލް ވަސީލަތްތަކަށް ފޮނުވުމާއި، އަދި މުހިންމު ޢާއްމު މަޢުލޫމާތު ރައްޔިތުންނާ ހަމައަށް ވަގުތުން ފޮނުވޭނެ ނިޒާމެއް މުޅި ރާއްޖޭގައި ޤާއިމުކުރުމަކީ މި ޕްރޮޖެކްޓްގެ މައިގަނޑު މަޤްޞަދެވެ.

މިޕްރޮޖެކްޓުގެ ތެރެއިން ރާއްޖޭގަ މީހުން ދިރިއުޅޭ ރަށްރަށުގެ އާބާދީގެ %92 ކަވަރުކުރާއިރު، ޖަޕާނުގެ ގްރާންޓް ޕްރޮޖެކްޓުގެ ދަށުން މިޚިދުމަތް ނުލިބޭ ސަރަޙައްދުތަކަށް، ސަރުކާރުގެ އެހީގައި މިނިޒާމު ޤާއިމުކުރުމަށްވެސް މަސައްކަތްކުރަމުންދާ ކަމަށް ޕީއެސްއެމުން ވަނީ ކުރިން ހާމަކޮށްފައެވެ.

މިޕްރޮޖެކްޓް ކުރިއަށްދާގޮތުގެ މަޢުލޫމާތު ޙިއްސާކުރުމަށް ކަމާގުޅުން ހުރި އިދާރާތަކުގެ މެދުގައި ކޮންމެ 6 މަހަކުން އަންނަނީ ބައްދަލުވުން ބާއްވަމުންނެވެ. އެގޮތުން މީގެ 10 ވަނަ ބައްދަލުވުން މި އަހަރު ޖެނުއަރީ މަހު ވަނީ ކުރިއަށް ގެންގޮސްފައެވެ.

ޖަޕާން ސަރުކާރުގެ އެހީގައި ކުރިއަށް ގެންދާ މި ޕްރޮޖެކްޓުގެ ޢަމަލީ މަސައްކަތް ފެށީ 2022 ވަނަ އަހަރުއެވެ.