ވިނަރެސް ފުލެޓުތަކުގެ އެކްސެސް ކޮންޓްރޯލް ސިސްޓަމްތައް އަލުން ބޭނުންކުރަން ފަށަނީ

ވިނަރެސް ފްލެޓުތަކުގައި ހަރުކޮށްފައި ހުރި އެކްސެސް ކޮންޓްރޯލް ސިސްޓަމްތައް ރަނގަޅުކޮށް މިމަހު އަލުން ބޭނުންކުރަން ފަށާނެކަމަށް ހައުސިން ޑިވެލޮޕްމެންޓް ކޯޕަރޭޝަން، އެޗްޑީސީން ބުނެފިއެވެ.

އެޗްޑީސީން ކުރި ބުނެފައިވަނީ ފްލެޓުތަކުގެ ދޮރުތަކުގައި ހަރުކޮށްފައި ހުރި އެކްސެސް ކޮންޓްރޯލް ސިސްޓަމްތަކަށް ލިބިފައިވާ ގެއްލުންތައް މަރާމާތުކުރުމަށްފަހު މިމަހުގެ 11 ގައި އަލުން ބޭނުންކުރަން ފެށުމަށް ހަމަޖެހިފައިވާ ކަމަށެވެ.

އެކްސެސް ކޮންޓްރޯލް ސިސްޓަމަކީ ފްލެޓަކަށް ވަންނަ ދޮރުގައި ހަރުކޮށްފައި ހުންނަ އިލެކްޓްރޯނިކް ޑިވައިސްއެކެވެ. މިޑިވައިސްތައް ހަރުކޮށްފައި ހުންނަ ދޮރެއް ހުޅުވޭނީ އެ ދޮރެއް ހުޅުވުމަށް ބޭނުންކުރާ އެކްސެސް ޓެގް އެޑިވައިސްގައި ޖެއްސުމަށްފަހުއެވެ. މިފަދަ ޑިވައިސްތަކަކީ ފްލެޓުތަކުގެ ސަލާމަތީ ކަންކަން ކަށަވަރުކުރުމަށްޓަކައި ހަރުކުރާ އެއްޗެކެވެ.

ވިނަރެސް ފްލެޓުތަކަށް ވަންނަން ބޭނުންކުރާ އެކްސެސް ޓެގު ވިނަރެސް 10ގެ މެނޭޖްމަންޓް އޮފީހުން ދޫކުރާނެކަމަށާއި ވީހާވެސް އަވަހަކަށް އެޓެގު ނެގުމަށް އެޗްޑީސީންވަނީ އެދިފައެވެ. ކޮންމެ އެޕާޓްމަންޓަކަށް ހަވާލުކުރަން ހަމަޖެހިފައިވަނީ 5 ޓެގެވެ.

ވިނަރެސްގެ އެކްސެސް ކޮންޓްރޯލް ސިސްޓަމަކީ ޢިމާރާތުގައި ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ޤާއިމުކޮށްފައިވާ ޚިދުމަތެއްކަން ފާހަގަކުރަމުން އެޗްޑީސީން ބުނީ މި ޚިދުމަތް ދިނުމަށް ބޭނުންކުރާ ޑިވައިސްތަކަށް ގެއްލުންދިނުމަކީ ޚިދުމަތް ބޭނުންކުރާ މީހުންގެ ޙައްޤަށް އުނިކަން ލިބޭނެކަމެއް ކަމަށެވެ. އެހެންކަމުން މިޑިވައިސްތަކަށް ގެއްލުންދޭ ފަރާތްތަކާމެދު ފިޔަވަޅު އަޅާނެކަމަށްވެސް އެޗްޑީސީން ބުނެއެވެ.

ވިނަރެސް ޓަވަރުތަކުގެ ދޮރުތަކުގައި އެކްސެސް ކޮންޓްރޯލް ސިސްޓަމް ހަރުކޮށްފައިވަނީ މިދިޔަ ޖޫން މަހުގެ ތެރޭގައެވެ. ނަމަވެސް އެ ސިސްޓަމްތަަކަށް ބަޔަކު ގެއްލުން ދިނުމުން ޚިދުމަތް ވަނީ މެދުކެނޑިފައެވެ. އެހެންކަމުން އެ ސިސްޓަމްތައް މަރާމާތުކުރުމަށްފަހު އެޗްޑީސީން މިހާރު މިވަނީ އަލުން އެޚިދުމަތް ފޯރުކޮށްދޭން ތައްޔާރުވެފައެވެ.