ފަތުރުވެރިކަން ސިންދަފާތުކުރުމުގެ ގިނަ މަސައްކަތްތައް އަންނަ އަހަރު ކުރެވޭނެ: ޝިއުރީ

ރާއްޖޭގެ ފަތުރުވެރިކަން ވަކި ބާވަތެއްގެ ފަތުރުވެރިކަމަށް ބަރޯސާވެފައި އޮންނަ އޮތުން ބަދަލުކޮށް ފަތުރުވެރިކަން ސިންދަފާތު ކުރުމުގެ މަސައްކަތް އަންނަ އަހަރު ފެށިގެންދާނެކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވެއްޖެއެވެ.

"ވެލްކަމް އިންޑިއާ" ރޯޑް ޝޯ ނިންމާލުމަށްފަހު ފަތުރުވެރިކަމާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި، ވާހަކަ ދައްކަވަމުން އެމްއެމްޕީއާރްސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވީ، ރާއްޖެއަކީ ޤުދުރަތީ މުއްސަނދިކަމެއް ލިބިފައިވާ ޤައުމެއްކަމަށެވެ.

ވޭތުވެދިޔަ 50 އަހަރުވެސް ފަތުރުވެރިކަން ބަރޯސާވެފައި އޮތީ، ޑައިވް މަންޒިލެއްގެ ގޮތުގައި ނުވަތަ ހަނީމޫން މަންޒިލެއްގެ ގޮތުގައި ނަމަވެސް ކުޅިވަރު ފަތުރުވެރިކަމާއި، ފިލްމީ ފަތުރުވެރިކަމާއި، އަދި ތަޢުލީމުގެ ފަތުރުވެރިކަން ރާއްޖެއަށް ތަޢާރަފްކޮށް ކުރިއަށް ގެންދެވޭނެކަމަށް އެމްއެމްޕީއާރްސީގެ މިހާރު މެނޭޖިންގ ޑިރެކްޓަރ ޝިއުރީ ޤަބޫލުކުރައްވައެވެ.

އެގޮތުން ރާއްޖޭގައި ސްޓަރ ވަރސް މީގެ ކުރިން ޝޫޓް ކޮށްފައިވާއިރު، އެފަދަ ފިލްމްތަކުގެ މަންޒަރުތައް ނަގާ މަންޒިލްތައް ބާލާލަންދާ ފަތުރުވެރިން ތިބޭ ކަމަށް ޝިއުރީ ފާހަގަކުރެއްވިއެވެ. މީގެ އިތުރުން ދުނިޔޭގެ ބޮޑެތި ކުޅިވަރު މުބާރާތްތައް ރާއްޖޭގައި ބޭއްވުމުގެ ފުރުޞަތުވެސް އޮތްކަން ފާހަގަކުރައްވައި ޝިއުރީ ވިދާޅުވީ ލޯ ސީޒަން ތަކުގައި ބޭރުގެ ޔުނިވާސިޓީތަކާއެކު އެއްބަސްވުންތަކެއް ހެދިއްޖެނަމަ އެތަނުގެ ދަރިވަރުން، ކޭމްޕްތަކާއި އެކްސްޗޭންޖް ޕްރޮގްރާމުތަކުގައި ގެނައުމުގެ ފުރުޞަތުވެސް އޮތް ކަމަށެވެ.

ފަތުރުވެރިކަން މިހާރަށްވުރެ ބޮޑަށް ފުޅާވާންޖެހޭކަން ފާހަގަކޮށް އެމްއެމްޕީއާރްސީން ވިދާޅުވީ، ރާއްޖޭގެ ފަތުރުވެރިކަމަށް އައު ކަންތައްތަކެއް ތަޢާރަފް ކުރެވި އައު މާކެޓުތަކަށް ދާންޖެހޭ ކަމަށެވެ. އަދި މިއީ ކުރެވިދާނެ ކަމެއްގެގޮތުގައި ޤަބޫލުކުރައްވާކަމަށް ވިދާޅުވެ އެމްއެމްޕީއާރުސީގެ އެމްޑީ ވަނީ އެމަސައްކަތް އަންނަ އަހަރު ފެށުމަށް ރާވަމުންދާކަން ހާމަކުރައްވާފައެވެ.

"އަޅުގަނޑުމެންގެ ވިސްނުން ކޮންމެވެސް ވަރަކަށް ފުޅާކުރަން ޖެހިފައި މިއޮތީ. އަޅުގަނޑުމެން މަޑުމަޑުން ވިސްނުން އެގޮތަށް ބަދަލު ކުރަމުން މިދަނީ. ބޮޑަށް މި ބެލެވެނީ އަންނަ އަހަރޭ މިކަންކަން ތަޢާރަފް ކުރެވޭނީ" ޝިއުރީ ވިދާޅުވިއެވެ.

ރާއްޖޭގެ ފަތުރުވެރިކަން ސިންދަފާތު ކުރުމުގެ މަސައްކަތް ފަށާފައިވާއިރު، ކުޅިވަރު ފަތުރުވެރިކަމާއި ގުޅޭ ޕްރޮޕޯސަލެއް މިހާރުވެސް ލިބިފައިވާ ކަމަށް ފަތުރުވެރިކަމާއިބެހޭ ވުޒާރާއިން ވަނީ ހާމަކޮށްފައެވެ. އަދި އެއާގުޅޭގޮތުން މަޝްވަރާ ކުރުމަށް ވަރަށް އަވަހަށް ކަމާއި ގުޅޭ ޓީމެއް ޒިޔާރަތްކުރާނެކަމަށް އެ ވުޒާރާއިން ހާމަކުރެއެވެ.

ރާއްޖޭގެ ފަތުރުވެރިކަން ސިންދަފާތު ކުރުމުގެ މަސައްކަތް އަންނަ އަހަރު ފަށަން ރާވާފައިވާއިރު، ސިނާޢަތުގެ ހުރިހާ ފަރާތްތަކާއި ގުޅިގެން މަސައްކަތް ކުރުމަށް ޚާއްސަ އިސްކަމެއް ދެއްވާކަމަށް އެމްއެމްޕީއާރްސީގެ މެނޭޖިންގް ޑިރެކްޓަރ ޝިއުރީ ވަނީ ވިދާޅުވެފައެވެ. އޭނާ ވިދާޅުވީ މިހާތަނަށް ސިނާޢަތުގަ ހުރި ކަންބޮޑުވުންތައް ދެނެގަތުމަށް ދިރާސާއެއް ކުރެވި އެކަމަށް މިހާރު އެމްއެމްޕީއާރްސީން މަސައްކަތްތަކެއް ކުރަމުންދާކަމަށެވެ.

ސަރުކާރުގެ އަމާޒަކީ މިއަހަރު ރާއްޖެއަށް ޒިޔާރަތް ކުރާ ފަތުރުވެރިންގެ އަދަދު 2 މިލިއަންއަށް އިތުރުކުރުމެވެ. އަދި މި 5 އަހަރު ނިމޭއިރު އަހަރަކު ފަސް މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒުހިފާފައެވެ.