ޕާކިންޒޯން ހަދަން މާފަންނު ސަހަރާ ހުސްކޮށްދޭނެ ފަރާތެއް ހޯދަނީ

ޕާކިން ޒޯން ތަރައްޤީކުރަން މާފަންނު ސަހަރާ ހުސްކޮށްދޭނެ ފަރާތެއް ހޯދުމަށް، މާލެ ސިޓީ ކައުންސިލުން އިޢުލާންކޮށްފިއެވެ.

މާލެއަށް ދިމާވެފައިވާ ޕާކިންގެ މައްސަލަތައް ހައްލުކުރުމަށް ދީނީގޮތުން އޮންނަ ހަމައާއި އުޞޫލުގެ ދަށުން މާލޭގައިހުރި ސަހަރާތައް ހުސްކޮށްގެން އެތަންތަނުގައި ޕާކިން ޒޯންތައް ތަރައްޤީކުރުމަށް މާލެ ސިޓީ ކައުންސިލުންވަނީ ނިންމަވާފައެވެ.

މާލެ ސިޓީ ކައުންސިލުން ކުރި އިޢުލާނުގައި ވަނީ މާފަންނު ސަހަރާ، އިސްލާމީ ކަންތައްތަކާބެހޭ ވުޒާރާގެ އުޞޫލާ އެއްގޮތަށް ހުސްކުރަން ބޭނުންވާ ކަމަށެވެ. އެހެންކަމުން ސަހަރާ ހުސްކުރުމުގެ މަސައްކަތް އަމިއްލަ ތަކެތީގައި ކުރާނެ ފަރާތެއް ބޭނުންވާ ކަމަށާއި ޝައުޤުވެރިވާ ފަރާތްތަކުން ބީލަން ހުށައެޅުމަށް ހުޅުވާލާ ކަމަށެވެ. މާފަންނު ސަހަރާގައި 36،153 އަކަފޫޓު ހުރެއެވެ.

ސިޓީ ކައުންސިލުން ވިދާޅުވީ މަސައްކަތް ކުރުމަށް ޝައުޤުވެރިވާ ފަރާތްތަކުން މަޢުލޫމާތު ސާފުކުރުމަށާއި އަގު ހުށައެޅުމަށް ސިޓީ ކައުންސިލްގެ ޕްރޮކިއުމަންޓް ސެކްޝަނަށް އާދެވޭނެ ކަމަށެވެ. އެގޮތުން މިމަހުގެ 14 ވަނަ ދުވަހުގެ 11:00 ޖަހާއިރު ސިޓީ ކައުންސިލަށް އައުމުން މަޢުލޫމާތު ސާފުކުރެވޭނެކަމަށާއި ބިޑު ހުށައެޅުން އޮންނާނީ މިމަހުގެ 20 ވަނަ ދުވަހުގެ 11:00 ޖަހާއިރުކަމަށް ސިޓީ ކައުންސިލުންކުރި އިޢުލާނުގައިވެއެވެ.

މީގެ ކުރިން މާލެ ސިޓީގެ މޭޔަރ އާދަމް ޢާޒިމް ވިދާޅުވެފައިވަނީ ޕާކިން ޒޯން ތަރައްޤީކުރުމަށް އެންމެ ފުރަތަމަ ހުސްކުރާނީ މާފަންނު ސަހަރާ ކަމަށެވެ. އަދި އަމާޒަކީ ކައުންސިލުން ކޮށްދެވެން ހުރި ހުރިހާ ކަމެއް ކޮށްދީ ޕާކިންގ ޢިމާރާތްތަކުގެ މަސައްކަތް އަވަސްކުރުންކަމަށްވެސް ޢާޒިމް ވިދާޅުވެފައިވެއެވެ.

މާލެ ތޮއްޖެހި މާލޭގައި ހިތްފަސޭހަ ކޮށްލަން ޕާކެއް ނެތުމާއި ޕާކު ކުރާނެ އެކަށޭނަ ޖާގަ ނެތުމަކީ މާލޭގައި ދިރިއުޅެމުންދާ ރައްޔިތުންގެ އޮތް ބޮޑު ކަންބޮޑުވުމެކެވެ. މި މައްސަލަ ދިމާވެފައިވަނީ މާލެއަކީ ކުރިން ރޭވި ތަރައްޤީކޮށްފައިވާ ސިޓީއެއްކަމަށް ނުވާތީ ކަމަށް ކަމާބެހޭ ފަރާތްތަކުން ބުނެއެވެ. މިހެންވެ މާލޭގައި ޕާކު އެޅުމާއި ޕާކިން ޒޯންތައް އެޅެން އޮތީ މިހާރު މާލޭގައި ހުރި ބިންތައް ހުސްކޮށްގެންނެވެ.

ދީނީ ޢިލްމުވެރިން ވިދާޅުވާ ގޮތުގައި ކޮންމެހެން ބޭނުންވެއްޖެ ޙާލަތެއްގައި ޤަބުރުސްތާނެއް ހުސްކުރުމަށްފަހު ތަނެއް އެޅިދާނެއެވެ. އެގޮތުން މާލެއަށް ބަލައިފިނަމަ މާލޭގައި ޖާގަ ނެތުމާއި ދުއްވާ ވެހިކަލްތަކުގެ އަދަދު ގިނަ ވުމުގެ ސަބަބުން ޤަބުރުސްތާނެއް ހުސްކުރުމަށްފަހު ޕާކިން ޒޯނެއް އެޅިދާނެކަމަށް ޢިލްމުވެރިން ވިދާޅުވެއެވެ.