ފަލަސްޠީނުގެ ޙައްޤުގައި ޢަރަބި ޤައުމުތަކުން އެކަށީގެންވާ މަސައްކަތެއް ނުކުރޭ: ރައީސް މަޢުމޫން

ފަލަސްޠީނުގެ ރައްޔިތުންނާއި ދެކޮޅަށް ޔަހޫދީން ދެމުންދާ ލާއިންސާނީ އަނިޔާތަކާއި ދެކޮޅަށް ޢަރަބި ޤައުމުތަކުން އެކަށީގެންވާ މަސައްކަތެއް ނުކުރާކަމަށް ކުރީގެ ރައީސް، މަޢުމޫން ޢަބްދުލްޤައްޔޫމް ވިދާޅުވެއްޖެއެވެ.

ސޯޝަލް މީޑިއާގައި އާއްމުކުރެއްވި ޕޯސްޓެއްގައި ރައީސް މަޢުމޫން ވިދާޅުވީ ކޮންމެ ދުވަހަކު ފަލަސްޠީނުގެ ކުށެއް ނެތް އެތައް ސަތޭކަ ބަޔަކު ޔަހޫދީން މަރަމުންގެންދާ ކަމަށެވެ. އަދި މިކަމާ ދެކޮޅަށް ޢަރަބި ޤައުމުތަކުގެ ލީޑަރުން އެއްވެސް ކަމެއްނުކޮށް ތިބީ ކުޅި ބަލަންކަމަށްވެސް ރައީސް މައުމޫން ވިދާޅުވިއެވެ.

ކޮންމެ ދުވަހަކު އެތައް ސަތޭކަ ކުށެއް ނެތް ޣައްޒާގެ އާންމުންނެއް އިސްރާއީލުން އެދަނީ ރަހުމެއްނެތި މަރަމުން. އަރަބި ލީޑަރުން އެތިބީ ކުޅިބަލަން. އެއްވެސް ކަމެއް ނުކުރޭ. ހިތާމައިގެ ކޮޅެއްނެތް.

— Maumoon Abdul Gayoom (@maumoonagayoom) August 10, 2024

ފަލަސްޠީނުގެ ރައްޔިތުންނާ ދެކޮޅަށް ހައްދުފަހަނަ އަޅާފައިވާ ޔަހޫދީން ދެމުންގެންދާ ޙަމަލާތައް ދުވަހަކަށްވުރެ ދުވަހެއް ދަނީ ވަރުގަދަ ކުރަމުންނެވެ. އެގޮތުން ޔަހޫދީ ސިފައިން ޣައްޒާ ސިޓީގެ މަދަރުސާއަކަށް ބޮންއަޅައި 100 އަށްވުރެ ގިނަ މީހުން މިއަދު ވަނީ ޝަހީދު ކޮށްލައިފައެވެ.

އެމީހުން ޝަހީދުކޮށްލާފައިވަނީ ގިނަ ޢަދަދެއްގެ ބަޔަކު ފަތިސް ނަމާދުގެ ޖަމާޢަތުގައި ބައިވެރިވެ, ނަމާދު ކުރަމުން ދިޔަ ވަގުތުގައެވެ. މިއީ އެތައް ހާސް ރެފިޔުޖީންނެއް ވަގުތީ ހިޔަލެއްގެ ގޮތުގައި ބޭނުންކުރަމުންދިޔަ މަދަރުސާއެކެވެ.

މިދިޔަ އަހަރުގެ އޮކްޓޫބަރު މަހުން ފެށިގެން ފަލަސްޠީނުގެ މުސްލިމް އަޚުންނާއި އުޚްތުންނަށް ޔަހޫދީން ދެމުންގެންދާ ޙަމަލާތަކުގައި މިހާތަނަށް 39,699 އަށްވުރެ ގިނަ މީހުން ޝަހީދުކޮށްލާފައިވާކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.