އިންޑިއާއާއެކު ބާއްވާ ވިޔަފާރީގެ ގުޅުންތައް ވަރުގަދަކުރުމަށް މަޝްވަރާކޮށްފި

ރާއްޖެއާއި އިންޑިއާއާ ދެމެދު އިޤްތިޞާދީ ގުޅުން އިތުރަށް ބަދަހިކުރުމާއި ގުޅޭގޮތުން މަޝްވަރާތަކެއް ބާއްވައިފިއެވެ.

ރަސްމީ ދަތުރުފުޅެއްގައި ރާއްޖެ ވަޑައިގެން އުޅުއްވާ އިންޑިއާގެ ޚާރިޖީ ވަޒީރު ޑރ.ސުބްރަމާނިއަމް ޖަޔަޝަންކަރާއެކު ބޭއްވި މި ބައްދަލުވުމުގައި އިޤްތިސާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު، މާލީ ވަޒީރު ޑރ. މުހައްމަދު ޝަފީޤް އަދި މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު މުނައްވަރު ބައިވެރިވެވަޑައިގެންނެވިއެވެ.

މި ބައްދަލުވުމުގައި، ދެ ޤައުމު ދެމެދުގައި އިޤްތިޞާދީ އަދި ވިޔަފާރީގެ ގުޅުން ބަދަހިކުރުމުގެ އިތުރުން ތަރައްޤީގެ މަޝްރޫޢުތައް ކުރިއަށް ގެންދިއުމުގައި މިހާރަށް ވުރެ ބޮޑަށް އެއްބާރުލުން ދިނުމާ ގުޅޭގޮތުންވެސް ވަނީ މަޝްވަރާކުރައްވާފައެވެ.

ރާއްޖެއާއި އިންޑިއާ ދެމެދު ވިޔަފާރީގެ ގުޅުން ބަދަހިކުރުމަށް މަޝްވަރާކޮށްފައިވާއިރު، އީއްޔެ ވަނީ ދެ ޤައުމުގެ ދެމުގައި އީ-ކޮމާސް ދާއިރާ ތަރައްގީކުރުމަށް ފަހުމުނާމާއެއްގައިވެސް ސޮއިކޮށްފައެވެ. މި ފަހުމުނާމާގެ ދަށުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ކްރިއޭޓަރ އިކޮނޮމީގެ ފުރުސަތުތައް ދިވެހިންނަށް ހޯދައިދިނުމަށް މަގުފަހިވެގެންދެއެވެ. އަދި އީ-ކޮމަރސްގެ ދާއިރާ ތަރައްގީ ކުރުމާއި، މާލީ ބާޒާރުގައި ބައިވެރިވުމުގެ ފުރުސަތުތައް އިތުރުކޮށް މާލީބާޒާރު އިތުރަށް ފުޅާ މި ފަހުމުނާމާގެ ސަބަބުން މަގުފަހިވެގެންދާނެ ކަމަށް ސަރުކާރުން ވަނީ ހާމަކޮށްފައެވެ.

އިޤްތިޞާދީ ވަޒީރު މުހައްމަދު ސަޢީދު ވަނީ ދާދި އަވަހަށް އިންޑީއާގެ ރުޕޭ ކާޑުވެސް ރާއްޖޭގައި ބޭނުން ކުރަން ފެށޭނެ ކަމަށް ވިދާޅުވެފައެވެ.

ވިޔަފާރީގެ ދައިރާގެ ގިނަ މަސައްކަތްތަކެއް އިންޑިއާއާއި ގުޅިގެން ފަށާފައިވާއިރު، އިންޑިއާގެ އެހީތެރިކަމާއެކު ތިލަމާލެ ބްރިޖް މަޝްރޫއު ފަދަ ޢުމްރާނީ ތަރައްޤީގެ ބޮޑެތި މަޝްރޫޢުތައް ކުރިއަށް ގެންދެއެވެ.