ދިވެހި ޒުވާނުންގެ ޤައުމީ ލަފާދޭ ކޮމިޓީއަށް 15 މެންބަރުން އައްޔަންކޮށްފި

ދިވެހި ޒުވާނުންގެ ޤައުމީ ލަފާދޭ ކޮމިޓީއަށް 15 މެންބަރުން އައްޔަންކޮށްފިއެވެ. މެންބަރުން އައްޔަންކޮށްފައިވަނީ އެކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީ އިފްތިތާޙްކުރުމަށް ބޭއްވި ރަސްމިއްޔާތުގައި ކޮމިޓީއަށް އައްޔަންކުރެވުނު މެންބަރުންނަށް ފަތްކޮޅާއި ބެޖެއްވަނީ އަރުވާފައެވެ. ބެޖާއި ފަތްކޮޅު ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީގައި ހިމެނެނީ ރައީސުލްޖުމްހޫރިއްޔާ އައްޔަން ކުރައްވާ މެންބަރުންނާއި ޔުނިވަރސިޓީތަކުގެ ސްޓޫޑެންޓް ކައުންސިލްގެ ރައީސުންނާއި ޤައުމީ ލެވެލްގެ އެތުލީޓުންނެވެ. އަދި ޖަމްޢިއްޔާތައް ތަމްސީލް ކުރައްވާ މެންބަރުންނާއި ފަންނިއްޔާތާއި ފަންނުވެރިކަމުގެ ދާއިރާ ތަމްސީލުކުރައްވާ މެންބަރުންނާއި މަތީ ސާނަވީ ތައުލީމު ހާސިލްކުރަމުންދާ ދަރިވަރެއް ހިމެނެއެވެ. މީގެ އިތުރުން ޒުވާނުން ބާރުވެރިކުރުވުމާއި މަޢުލޫމާތާއި ފަންނާބެހޭ ވުޒާރާއިން އައްޔަންކުރާ މެންބަރުންވެސް ހިމެނެއެވެ.

މިކޮމިޓީގައި ޖުމްލަ 15 މެންބަރުން ހިމެނެއެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީގައި ހިމެނޭ 15 މެންބަރުންނަކީ:-

ދާއޫދު އަޙްމަދު:

ދާއޫދު އަޙްމަދަކީ ރައީސުލްޖުމްހޫރިއްޔާ އައްޔަންކުރައްވާ ކޮމިޓީއަށް 2 މެންބަރުންގެ ތެރެއިން މެންބަރެކެވެ.

ދާއޫދަކީ ދަތުރުފަތުރާއި މަދަނީ އުދުހުންތަކާބެހޭ ވަޒީރުގެ ނައިބެވެ. މީގެ އިތުރުން ވެރިކަންކުރާ ޕާޓީ، ޕީޕަލްސް ނެޝަނަލް ކޮންގްރެސް، ޕީއެންސީގެ މީޑިއާ ކޯޑިނޭޓަރަކީވެސް އޭނައެވެ.

ދާއޫދު ވަނީ މެލޭޝިޔާގެ ސަންވޭ ކޮލެޖުން ބިޒްނަސް އިން ބެޗްލަރސް ޑިގްރީ ޙާސިލްކޮށްފައެވެ.

ފާތިމަތު ނަޒާހާ ނަޒީމް:

ފާތިމަތު ނަޒާހާ ނަޒީމަކީވެސް ރައީސުލްޖުމްހޫރިއްޔާ ކޮމިޓީއަށް އައްޔަންކުރައްވާ 2 މެންބަރުންގެ ތެރެއިން މެންބަރެކެވެ. އޭނާ ޚާއްސަވަނީ މާކެޓިންގެ ދާއިރާއަށެވެ.

ނަޒާހާ މަސައްކަތްކުރަމުންދަނީ ޒުވާނުން ބާރުވެރިކުރުވުމާއި މަޢުލޫމާތާއި ފަންނާބެހޭ ވުޒާރާގެ ސީނިއަރ ޕޮލިޓިކަލް ޑިރެކްޓަރެއްގެ މަޤާމުގައެވެ. އޭނާވަނީ ތަފާތު މަޖައްލާތަށް ލިޔެފައެވެ. އެގޮތުން ހޮޓެލިއަރ މޯލްޑިވްސްއާއި ކޮރަލް ގްލާސްފަދަ ތަންތަނުގެ ކޮންޕެނީ ޚަބަރުތަކާއި މީޑިއާ ކޮންޓެންޓް އުފެއްދުމުގައި މަސައްކަތް ކޮށްފައިވެއެވެ. ނަޒާހާވަނީ ޤައުމީ ޔުނިވަރސިޓީން ބިޒްނަސްގެ ދާއިރާއިން ސެޓްފިކެޓް ލެވެލް-4 ޙާސިލްކޮށްފައެވެ.

އާމިނަތު ރަބާބު އިބްރާހިމް:

އާމިނަތު ރަބާބު އިބްރާހިމް ހިމެނެނީ ޤައުމީ ލެވެލްގެ އެތުލީޓުންގެ ތެރެއިން ކޮމިޓީއަށް އައްޔަންކުރާ 2 މެންބަރުންގެ ތެރޭގައެވެ. އޭނާ ޚާއްސަވަނީ ކުޅިވަރުގެ ދާއިރާއަށެވެ.

ރަބާބު މިހާރު މަސައްކަތްކުރަމުންދަނީ ސީރާ ސްޕޯޓްސް މޯލްޑިވްސް ޕްރައިވެޓް ލިމިޓެޑުގެ ސޭލްސް އެންޑް އެޑްމިން މެނޭޖަރެއްގެ ގޮތުގައެވެ. ރަބާބު ވަނީ ބިޒްނަސް މެނޭޖްމެންޓް ވިތް މާކެޓިންއިން ޑިގްރީ ޙާސިލްކޮށްފައެވެ.

އަބްދުﷲ ޒިޔާއު:

އަބްދުﷲ ޒިޔާއުވެސް ހިމެނެނީ ޤައުމީ ލެވެލްގެ އެތުލީޓުންގެ ތެރެއިން ކޮމިޓީއަށް އައްޔަންކުރާ 2 މެންބަރުންގެ ތެރޭގައެވެ. އޭނާ ޚާއްސަވަނީ ކުޅިވަރުގެ ދާއިރާއަށެވެ.

ޢަބްދުﷲ ޒިޔާއުއަކީ ޕްރެކްޓިކަލް އެޑިއުކޭޝަން، ޕީއީ ޓީޗަރެކެވެ. އޭނާ މިހާރު މަސައްކަތްކުރަމުންދަނީ ޣިޔާސުއްދީން ސްކޫލުގައި ޕީއީ ކިޔަވައިދެމުންނެވެ. އޭނާ ވަނީ ހޭންޑް ބޯލްއާއި ބާސްކެޓް ބޯލްގެ ކޯޗިން ސެޓްފިކެޓު ޙާސިލްކޮށްފައެވެ.

އައިޝަތު އަޝްނާ:

އައިޝަތު އަޝްނާއަކީ ފަންނިއްޔާތާއި ފަންނުވެރިކަމުގެ ދާއިރާއިން ކޮމިޓީއަށް އައްޔަންކުރާ 2 މެންބަރުންގެ ތެރޭގައި ހިމެނޭ މެންބަރެކެވެ. އޭނާ ޚާއްސަވަނީ އިންފޮމޭޝަން ޓެކްނޮލޮޖީގެ ދާއިރާއަށެވެ.

އަޝްނާ މިހާރު މަސައްކަތް ކުރަމުންދަނީ ރާއްޖެ އޮންލައިންގައި ސީނިއަރ އެގްޒެކެޓިވް ޓެކްނީޝަނެއްގެ ގޮތުގައެވެ. އަދި ކްލިކް ކޮލެޖުގައި ޕާޓް ޓައިމް ލެކްޗަރަރއެއްގެ ގޮތުގއިވެސް އަޝްނާދަނީ މަސައްކަތް ކުރަމުންނެވެ.

އަޝްނާ ވަނީ އިންފޮމޭޝަން ޓެކްނޮލޮޖީ މެނޭޖްމެންޓުން މާސްޓަރސް ޑިގްރީ ޙާސިލްކޮށްފައެވެ.

އަޙްމަދު ޢަމްރު:

އަޙްމަދު ޢަމްރަކީ ފަންނިއްޔާތާއި ފަންނުވެރިކަމުގެ ދާއިރާއިން ކޮމިޓީއަށް އައްޔަންކުރާ 2 މެންބަރުންގެ ތެރޭގައި ހިމެނޭ މެންބަރެކެވެ. އޭނާ ޚާއްސަވަނީ ޓެކްނޮލޮޖީގެ ދާއިރާއަށެވެ.

އަޙްމަދު ޢަމްރު މިހާރު މަސައްކަތްކުރަމުންދަނީ މޯލްޑިވްސް މަނިޓަރީ އޮތޯރިޓީގައި ފުލް ސްޓެކް ޑިވެލޮޕަރެއްގެ މަޤާމުގައެވެ. އޭނާ ވަނީ ކޮމްޕިޔުޓަރ ސައިންސްގެ ދާއިރާއިން ބެޗްލަރސް ޑިގްރީ ޙާސިލްކޮށްފައެވެ.

ފާތިމަތު ރާޢިއާ ޝަރީފް:

ފާތިމަތު ރާޢިއާ ޝަރީފަކީ ޒުވާނުން ބާރުވެރިކުރުވުމުގެ ދާއިރާއިން ހިލޭސާބަހަށް މަސައްކަތްކުރާ ޖަމްޢިއްޔާއެއް ނުވަތަ ސިވިލް ސޮސައިޓީއެއް ތަމްސީލުކުރާ 2 މެންބަރުންގެ ތެރެއިން އައްޔަންކޮށްފައިވާ މެންބަރެކެވެ.

ރާޢިއާ މިހާރު މަސައްކަތްކުރަނީ ހިލޭސާބަހަށް މަސައްކަތްކުރާ ޖަމިއްޔާއެއްކަމަށްވާ އިކޯ ކެއަރ މޯލްޑިވްސްގައެވެ. ރާޢިއާދަނީ އެ ޖަމްޢިއްޔާއިން ކުރިއަށްގެންދާ އެކި ޕްރޮޖެކްޓުތަކުގައި، ޕްރޮޖެކްޓު ކޯޑިނޭޓަރެއްގެ ގޮތުގައި މަސައްކަތްކުރަމުންނެވެ.

ނިމާލު ޙަމީދު:

ނިމާލު ޙަމީދަކީވެސް ޒުވާނުން ބާރުވެރިކުރުވުމުގެ ދާއިރާއިން ހިލޭސާބަހަށް މަސައްކަތްކުރާ ޖަމްޢިއްޔާއެއް ނުވަތަ ސިވިލް ސޮސައިޓީއެއް ތަމްސީލުކުރާ 2 މެންބަރުންގެ ތެރެއިން އައްޔަންކޮށްފައިވާ މެންބަރެކެވެ.

ނިމާލު ވަނީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިޔުނިޓީ އެމްޕަވަރމަންޓްގައި 2019 ވަނަ އަހަރުން ފެށިގެން 2023 ވަނަ އަހަރާ ހަމައަށް މަސައްކަތްކޮށްފައެވެ.

ޢަބްދުﷲ މާހިލް ޝަހީމް:

ޢަބްދުﷲ މާހިލް ޝަހީމަކީ ޒުވާނުން ބާރުވެރިކުރުމާއި މަޢުލޫމާތާއި ފަންނާބެހޭ ވުޒާރާއިން ކަނޑައަޅުއްވާ 4 ދާއިރާއަކުން އައްޔަންކުރާ 4 މެންބަރުންގެ ތެރެއިން އެކަކެވެ. އޭނާ ޚާއްސަވަނީ ޕޮލިޓިކްސް އެންޑް އިންޓަރނޭޝަނަލް ރިލޭޝަންސްގެ ދާއިރާއިންނެވެ.

ޢަބްދުﷲ މާހިލަކީ އަންކަރަ މޯލްޑިވްސް ރިސޯޓުގެ ޑިރެކްޓަރެކެވެ. އަދި އޭނާއަކީ އަލް-މަދީނާ އިންވެސްޓްމަންޓްސްގެ ބޯޑު މެންބަރެކެވެ. މާހިލް ދަނީ ޕޮލިޓިކަލް ސައިންސްގެ ދާއިރާއިން ޑިގްރީ ޙާސިލްކުރަމުންނެވެ.

މީސަމް އިބްރާހިމް:

މީސަމް އިބްރާހިމަކީ ޒުވާނުން ބާރުވެރިކުރުމާއި މަޢުލޫމާތާއި ފަންނާބެހޭ ވުޒާރާއިން ކަނޑައަޅުއްވާ 4 ދާއިރާއަކުން އައްޔަންކުރާ 4 މެންބަރުންގެ ތެރެއިން އެކަކެވެ. އޭނާ ޚާއްސަވަނީ އެކައުންޓިންގ އެންޑް ފައިނޭންސްގެ ދާއިރާއިންނެވެ.

މީސަމް މިހާރު މަސައްކަތްކުރަމުންދަނީ މޯލްޑިވްސް ފައިނެންސް އެންޑް ލީސިން ކޮންޕެނީގައި ސީނިއަރ ރިސްކް އެންޑް ކޮމްޕްލައަންސް އެގްޒެކެޓިވްއެއްގެ ގޮތުގައެވެ. މީސަމްވަނީ ބިޒްނަސް ބޭންކިން އެންޑް ފައިނެންސްގެ ދާއިރާއިން ޑިގްރީ ޙާސިލްކޮށްފައެވެ. މިހާރު މީސަމްދަނީ ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ޙާސިލްކުރަމުންނެވެ.

މުޙައްމަދު ރައްޔާން މާހިރު:

މުޙައްމަދު ރައްޔާން މާހިރަކީ ޒުވާނުން ބާރުވެރިކުރުމާއި މަޢުލޫމާތާއި ފަންނާބެހޭ ވުޒާރާއިން ކަނޑައަޅުއްވާ 4 ދާއިރާއަކުން އައްޔަންކުރާ 4 މެންބަރުންގެ ތެރެއިން އެކަކެވެ. އޭނާ ޚާއްސަވަނީ ސިޔާސީ ދާއިރާއިންނެވެ.

ރައްޔާން ވަނީ މޯލްޑިވްސް އެއަރޕޯޓްސް ކޮންޕެނީގައި އެސިސްޓެންޓް ކާގޯ އޮފިސަރެއްގެ މަޤާމުގައި 2022 އިން 2023 އަށް މަސައްކަތް ކޮށްފައެވެ. އަދި އުރީދޫ މޯލްޑިވްސްގައި ކަސްޓަމަރ ކެއަރ ރެޕްރެޒެންޓޭޓިވްއެއްގެ އިތުރުން ކްރިސްޓަލް ކްރައުން ގެސްޓު ހައުސްގައި އެސިސްޓެންޓް މެނޭޖަރެއްގެ ގޮތުގައިވެސް ވަނީ މަސައްކަތްކޮށްފައެވެ.

ހުވައިނާ މުޙައްމަދު ނިހާދު:

ހުވައިނާ މުޙައްމަދު ނިހާދަކީ ޒުވާނުން ބާރުވެރިކުރުމާއި މަޢުލޫމާތާއި ފަންނާބެހޭ ވުޒާރާއިން ކަނޑައަޅުއްވާ 4 ދާއިރާއަކުން އައްޔަންކުރާ 4 މެންބަރުންގެ ތެރެއިން އެކަކެވެ. އޭނާ ޚާއްސަވަނީ މީޑިއާގެ ދާއިރާއިންނެވެ.

ހުވައިނާ މިހާރު މަސައްކަތްކުރަމުންދަނީ ސަންލޭންޑް ޖާނީސްގައި ސޭލްސް ސުޕަވައިޒަރެއްގެ މަޤާމުގައެވެ. ހުވައިނާއަކީ ޓެލެވިޜަން މޯލްޑިވްސްގައި ޕްރޮގުރާމު ހުށައަޅައިދޭ ޕްރެޒެންޓަރެއްވެސްމެއެވެ. ހުވައިނާ މިހާރު ގެންދަވަނީ ވިލާ ކޮލެޖުން ލޯއިން ބެޗްލަރސް ޑިގްރީ ޙާސިލްކުރަމުންނެވެ.

ޖައިޝް ޢަލީ ވަޙީދު:

ޖައިޝް ޢަލީ ވަޙީދަކީ ޔުނިވަރސިޓީގެ ސްޓޫޑެންޓް ޔޫނިއަންގެ ރައީސުންގެ ތެރެއިން އައްޔަންކުރާ 3 މެންބަރުންގެ ތެރެއިން އެކަކެވެ. ޖައިޝަކީ ދިވެހިރާއްޖޭގެ ޤައުމީ ޔުނިވަރސިޓީގެ ސްޓޫޑަންޓް ޔޫނިއަންގެ ރައީސެވެ.

ޖައިޝް ވަނީ ޤައުމީ ޔުނިވަރސިޓީން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ޙާސިލްކޮށްފައެވެ. އަދި އޭނާވަނީ އިންޓަރނޭޝަނަލް ހޮސްޕިޓަލިޓީ މެނޭޖްމެންޓްގެ ދާއިރާއިން ޑިގްރީވެސް ޙާސިލްކޮށްފައެވެ.

ޙުސައިން ޢަރްބާން ފަވާޒު:

ޙުސައިން ޢަރްބާން ފަވާޒަކީ ޔުނިވަރސިޓީގެ ސްޓޫޑެންޓް ޔޫނިއަންގެ ރައީސުންގެ ތެރެއިން އައްޔަންކުރާ 3 މެންބަރުންގެ ތެރެއިން އެކަކެވެ. ޢަރުބާނަކީ ދިވެހިރާއްޖޭގެ އިސްލާމީ ޔުނިވަރސިޓީގެ ސްޓޫޑަންޓް ޔޫނިއަންގެ ރައީސެވެ.

ޢަރުބާން މިހާރު މަސައްކަތްކުރަމުންދަނީ މޯލްޑިވްސް އެއަރޕޯޓްސް ކޮންޕެނީ ލިމިޓެޑްގައި ޑިވެލޮޕްމަންޓް އޮފިސަރުގެ މަޤާމުގައެވެ. ޢަރުބާން ވަނީ މީގެ ކުރިން ވަގުތު ނޫހުގައި ނޫސްވެރިއެއްގެ ގޮތުގައި މަސައްކަތްކޮށްފައެވެ.

ދަލޫފް އަޙްމަދު:

ދަލޫފް އަޙްމަދަކީ ޔުނިވަރސިޓީގެ ސްޓޫޑެންޓް ޔޫނިއަންގެ ރައީސުންގެ ތެރެއިން އައްޔަންކުރާ 3 މެންބަރުންގެ ތެރެއިން އެކަކެވެ. ދަލޫފަކީ ކްލިކް ކޮލެޖްގެ ސްޓޫޑަންޓް ޔޫނިއަންގެ ރައީސެވެ.

ދަލޫފްވަނީ ބެޗްލަރ އޮފް ކޮމްޕިޔުޓަރ ސައިންސް ކްލިކް ކޮލެޖުން ޙާސިލްކޮށްފައެވެ. އޭނާ ވަނީ އެކި ތަންތަނުގައި ސޮފްޓްވެއަރ ޑިވެލޮޕަރެއްގެ ގޮތުގައި މަސައްކަތް ކޮށްފައެވެ.

ދިވެހި ޒުވާނުންގެ ޤައުމީ ލަފާދޭ ކޮމިޓީއެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވުމަށް ނިންމަވާފައިވާ މައިގަނޑު މަޤުޞަދަކީ ޤައުމީ ކަންކަމުގައި ޒުވާނުންގެ ބައިވެރިވުން އިތުރުކުރުމާއި މަޝްވަރާއާއި ނިންމުންތައް ނިންމާއިރު ޒުވާނުން ދެކޭގޮތް ހާމަކުރެވޭނެ ގޮތް ފަހިކުރުމެވެ.