އެމްޑީޕީ ސަރުކާރުން ގޯތި ދޫކުރީ ކަނޑަކުން ނޫން، ތިލަ ފަޅަކުން: ނާޒިލް

ނިމިދިޔަ އެމްޑީޕީ ސަރުކާރުގައި ގޯތި ދޫކޮށްފައިވަނީ، ކަނޑަކުން ނޫން ކަމަށާއި އެގޯތިތައް ދޫކުރީ ތިލަފަޅަކުންކަމަށް އެމްޑީޕީގެ ޕާލަމެންޓަރީ ގްރޫޕުގެ ލީޑަރު އިބްރާހީމް ނާޒިލް ވިދާޅުވެއްޖެއެވެ.ނާޒިލް މިހެން ވިދާޅުވެފައިމިވަނީ ނިމިދިޔަ ސަރުކާރުގައި ބިން ނުހިއްކާ ތަންތަނުން ގޯތި ދޫކޮށްފައިވާކަމަށްބުނެ ގިނަ ފާޑުކިޔުންތަކެއް އަމާޒުވެފައިވަނިކޮށެވެ.

އެމްޑީޕީގެ ޕާލަމެންޓަރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޕީޖީން ވަނީ ގެދޮރުވެރިކަމާއި ގުޅޭގޮތުން ހުރި ކަންބޮޑުވުންތައް ފާޅުކޮށްފައެވެ.

ނިމިދިޔަ އެމްޑީޕީގެ ސަރުކާރުގައި ގޯތި ދޭން ނިންމި ގެދޮރުވެރިޔާ ސްކީމާއި ގުޅޭގޮތުން ސަރުކާރުގެ އޮތް އެންމެ ބޮޑު އެއް ކަންބޮޑުވުމަކީ، ހިއްކައި ނުނިމިހުރި ތަންތަނުން ގޯތި ދީފައިވުމެވެ. އެކަމާއި ގުޅޭގޮތުން ރައްޔިތުންގެ މަޖިލީހުގައި ސުވާލުކުރުމުން ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު ވިދާޅުވީ ނުހިއްކައި އޮތްތަނަކުން ދޫކޮށްފައިވަނީ ގޯއްޗެއް ގޮތުގައި ނުބެލެވޭނެ ކަމަށެވެ. ރާއްޖޭގައި އެކުލަވާލާ ޢަމަލުކުރެވެމުން އަންނަ ޤާނޫނުތައްވެސް ބަޔާންކުރަނީ ގޯތި ދޫކުރެވޭނީ ބިމަކުންކަމަށެވެ.

މިކަމަށް އިޝާރާތް ކުރައްވާ އެމްޑީޕީގެ ޕީޖީ ލީޑަރު އިބްރާހީމް ނާޒިލް ވިދާޅުވީ ކަނޑުން އެއްވެސް ގޯއްޗެއް ދޫކޮށްފައި ނުވާ ކަމަށެވެ. އަދީ ގޯތި ދިނީ ތިލަފަޅަކުންކަމަށް ނާޒިލް ވިދާޅުވިއެވެ.

"ހަގީގަތުގައި ކަނޑުން އެންމެ ގޯއްޗެއްވެސް ދޫކުރެވިފައެއް ނެތް. ވަރަށް ތިލަފަޅެއް. ފަޅު ހިއްކުމުގެ މަސައްކަތުގެ ބޮޑުބައެއް އޭރު އެމްޑީޕީ ސަރުކާރު ނިމެމުން ދިޔައިރު ކުރަމުން ދިޔައީ." ނާޒިލް ވިދާޅުވިއެވެ.

ރައްޔިތުންގެ މަޖިލީހުގައި ގެދޮރުވެރިކަމާއި ބެހޭ ވަޒީރު ޑރ. ޢަލީ ހައިދަރު ވިދާޅުވީ ކުރީ ސަރުކާރުން ކަނޑުފަޅުތަކުން ގޯތި ދޫކޮށްފައި ހުރީ ޒިންމާދާރުކަން ކުޑަކޮށް ކަމަށެވެ. ނަމަވެސް އެ ފަޅުތައް ހިއްކުމުގެ މަސައްކަތް މި ސަރުކާރުން ކުރަމުން އަންނަ ކަމަށާއި އެގޮތުން، ގުޅިފަޅަށް އިތުރު 85 ހެކްޓަރުގެ ބިން ހިއްކަން ޖެހޭއިރު އެތަނުން ގޯތި ދޫކުރެވޭނީ އެ މަސައްކަތް ނިންމުމަށް ފަހު ކަމަށް ވަޒީރު ވިދާޅުވިއެވެ.