މާލެ އާއި ހުޅުމާލޭގެ ސީއެޗްއެސްއީއަށް ދަރިވަރުން ވައްދަން ހުޅުވާލައިފި

ސެންޓަރ ފޮރ ހަޔަރ ސެކަންޑްރީ އެޑިޔުކޭޝަން، ސީއެޗްއެސްއީގެ މާލޭއާއި ހުޅުމާލޭގައި ހުންނަ އިމާރާތުގައިވެސް ކިޔަވައިދޭން ނިންމައި އެ ސްކޫލަށް ދަރިވަރުން ވެއްދުމަށް ފޯމު ހުށަހެޅުމުހެ ފުރުޞަތު ހުޅުވާލައިފިއެވެ.

ހުޅުމާލޭގައި ސީއެޗްއެސްއީގެ އައު ޢިމާރާތެއް އެޅުމަށްފަހު މާލޭގައިހުރި ސީއެޗްއެސްއީގެ ޢިމާރާތުގައި ކިޔަވައިދިނުން ހުއްޓާލިއެވެ.

އަލުން މާލޭގައި ހުރި ޢިމާރާތުގައި ކިޔެވުން ފަށަން ނިންމާފައިވާކަން ތަޢުލީމީ ވުޒާރާއިން ހާމަކުރައްވާފައިވަނީ މިދިޔަ ޖޫން މަހުގެ 30 ވަނަ ދުވަހުއެވެ.

ތަޢުލީމީ ވުޒާރާއިން ވިދާޅުވީ ސީއެޗްއެސްއީގެ މާލޭއާއި ހުޅުމާލޭގައި ހުންނަ އިމާރާތުގެ ތެރެއިން އެ ދަރިވަރަކު ބޭނުން މަރުކަޒެއްގައި ކިޔެވޭ ގޮތަށް ދަރިވަރުން ވެއްދުމަށް ފޯމު ހުށައެޅުގެ ފުރުޞަތު މިހާރު ހުޅުވާލާފައިވާ ކަމަށެވެ. އަދި ދަރިވަރުން ވެއްދުމަށް ފުރަންޖެހޭ ފޯމު، ތަޢުލީމީ ވުޒާރާގެ ވެބްސައިޓުން ލިބެން ހުންނާނެކަމަށް އެ ވުޒާރާއިން ވިދާޅުވިއެވެ.

މާލޭގައިހުރި ޢިމާރާތުގައި އަލުން ކިޔަވައިދޭން ފެށުމަށް އެތަން މަރާމާތުކުރުމުހެ މަސައްކަތްތަކެއް ދަނީ ކުރަމުންނެވެ.

މީގެ ކުރިން ތަޢުލީމީ ވުޒާރާއިން ވިދާޅުވެފައިވަނީ މާލޭގައިހުރި ކުރީގެ ޢިމާރާތުގައިވެސް ކިޔަވައިދޭން ނިންމާފައިވަނީ އޯލެވެލް ނިންމާ ދަރިވަރުންގެ ޢަދަދު އިތުރުވަމުން އަންނާތީ، އޭލެވެލްއަށް ކިޔެވުމުގެ ފުރުޞަތު ވީހާވެސް ގިނަ ދަރިވަރުންނަށް ދިނުމަށްކަމަށެވެ. ސީއެޗްއެސްސީގެ ކުރީގެ އިމާރާތުގައި އަލުން އޭލެވަލް ކިޔަވައިދޭން ފެށިނަމަވެސް ހުޅުމާލޭގައި ހުންނަ ޢިމާރާތުގެ ކިޔަވައިދިނުމަށް އެއްވެސް ބަދަލެއް ނުގެންނާނެކަމަށް ތަޢުލީމީ ވުޒާރާއިން މީގެކުރިން ވިދާޅުވެފައިވެއެވެ.

ސެންޓަރ ފޮރ ހަޔަރ ސެކަންޑްރީ އެޑިއުކޭޝަނަކީ "ސައިންސް އެޑިއުކޭޝަން ސެންޓަރ"ގެ ނަމުގައި 3 ޖުލައި 1979 ގައި މަތީ ސާނަވީ ތަޢުލީމަށް ޚާއްސަކޮށްގެން ރާއްޖޭގައި ހުޅުވި އެންމެ ދުވަސްވީ ސްކޫލެވެ.

ސީއެޗްއެސްއީގެ ކިޔެވުން ހުޅުމާލެއަށް ބަދަލުކުރީ، ނިމުނު 2023ވަނަ އަހަރުގެ މެދުތެރޭގައެވެ.