މަސްޖިދުލް އަޤްޞާއަށް ޔަހޫދީން ވަތް މައްސަލަ ދިވެހި ސަރުކާރުން ކުށްވެރިކޮށްފި
-
ޔަހޫދީން އަޤްޞާގެ ހުރުމަތް ކަނޑާލުމަކީ އަމާންކަން ޤާއިމްކުރުމަށް ހުރަސްއެޅޭކަމެއް
-
ދިވެހި ސަރުކާރުން އަބަދުވެސް ތިބޭނީ ފަލަސްޠީން ރައްޔިތުންނާއެކު
މުސްލިމުންގެ މުޤައްދަސް އެއްބިނާ ކަމަށްވާ އަލް-މަސްޖިދުލް އަޤްޞާއަށް އިސްރާޢީލުގެ ޔަހޫދީން ވަދެ، އެމިސްކިތުގެ ހުރުމަތް ކަނޑާލުމާ ގުޅިގެން ދިވެހި ސަރުކާރުން އެކަން ކުށްވެރިކޮށްފިއެވެ.
ދިވެހި ސަރުކާރުން ނެރުނު ބަޔާނެއްގައިވަނީ އަލް-މަސްޖިދުލް އަޤްޞާއަށް ޔަހޫދީން ވަދެގަތުމަކީ އެ މިސްކިތުގެ ޙުރުމަތް ކަނޑާލުންކަމަށް ވިދާޅުވެ އެކަން ހަރުކަށި އިބާރާތުން ކުށްވެރިކުރައްވާކަމަށެވެ.
އަދި ޔަހޫދީން ހިންގަމުންދާ މިފަދަ ޢަމަލުތަކަކީ އެސަރަހައްދުގެ ހަމަޖެހުމާއި އަމާންކަން ޤާއިމްކުރުމަށްކުރާ މަސައްކަތަށް ހުރަސްއެޅޭކަމެއް ކަމަށްވެސްވަނީ ވިދާޅުވެފައެވެ.
އަދި ދިވެހި ސަރުކާރުން އަބަދުވެސް ތިބޭނީ ފަލަސްޠީން ރައްޔިތުންނާއެކު ކަމަށް ވިދާޅުވެ އިސްރާޢީލުން ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ޤަތުލުޢާންމާ ދެކޮޅަށް ބައިނަލްއަޤުވާމީ ޖަމްޢިއްޔާތަކާއި ޤައުމުތަކުން މަސައްކަތްކުރުމަށް ދިވެހި ސަރުކާރުގެ ބަޔާނުގައިވަނީ ގޮވާލާފައެވެ.
އަލް-ޖަޒީރާއިން ރިޕޯޓުކޮށްފައިވާ ގޮތުގައި ބައިތުލްމަޤްދިސްއަށާއި އަޤްޞާ މިސްކިތަށް ޔަހޫދީން ވަދެގަނެފައިވަނީ އެމީހުންގެ ޢީދެއް ފާހަގަކުރުމަށެވެ.
މިދިޔަ އަހަރުގެ އޮކްޓޫބަރު މަހުން ފެށިގެން ފަލަސްޠީނުގެ މުސްލިމް އަޚުންނާއި އުޚްތުންނަށް ޔަހޫދީން ދެމުންގެންދާ ޙަމަލާތަކުގައި މިހާތަނަށް 39,699 އަށްވުރެ ގިނަ މީހުން ޝަހީދުކޮށްލާފައިވާކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.