ތަރައްޤީވަމުން އަންނަ ޤައުމުތަކަށް ހަމަހަމަ އުސޫލުން، ޓެކްނޮލޮޖީގެ އިޖާދުތައް ލިބެންޖެހޭ: ޚާރިޖީ ވަޒީރު

ޤައުމުތަކުގެ ތަރައްޤީގެ ތަޞައްވަރު ހާސިލްކުރުމަށް ޓެކްނޮލޮޖީގެ އީޖާދުތައް ހަމަހަމަ އުސޫލެއްގެ މަތިން ދިވެހިރާއްޖެފަދަ ތަރައްޤީވަމުން އަންނަ ޤައުމުތަކަށް ފޯރާކަން ކަށަވަރުކުރަންޖެހޭކަމަށް ޚާރީޖީ ވަޒީރު މޫސާ ޒަމީރު ވިދާޅުވިއެވެ. ޚާރިޖީ ވަޒީރު މިހެން ވިދާޅުވީ އިންޑިއާ ސަރުކާރުން އޮންލައިންކޮށް ބޭއްވި ތިންވަނަ ވޮއިސް އޮފް ގްލޯބަލް ސައުތު ސަމިޓްގެ ޚާރިޖީ ވަޒީރުންގެ ބައްދަލުވުމުގައި ވާހަކަފުޅު ދައްކަވަމުންނެވެ.

"ޗާރޓިންގ އަ ނިއު ޕެރެޑައިމް ފޮރ ގްލޯބަލް ސައުތު" ގެ ޝިޢާރުގެ ދަށުން ކުރިއަށް ގެންދިޔަ މި ބައްދަލުވުމުގައި ވާހަކަފުޅު ދައްކަވަމުން ޚާރިޖީ ވަޒީރު މޫސާ ޒަމީރު ވިދާޅުވީ 2023 ވަނަ އަހަރު 'ގްރޫޕް އޮފް ޓުވެންޓީ' (ޖީ20)ގެ ރިޔާސަތުގައި އިންޑިއާއިން ފުރިހަމަ ދައުރެއް އަދާކޮށް އެޤައުމުގެ އިސްނެގުމުގެ މުހިންމު ކަންކަން ތަޢާރަފްކޮށްފައިވާ ކަމަށެވެ. އަދި މިކަންކަމުގެ ސަބަބުން ޖީ20ގެ މެމްބަރު ޤައުމުތަކުގެ އިތުރުން ޖީ20ގައި ނުހިމެނޭ، ގްލޯބަލް ސައުތުއަށް ނިސްބަތްވާ ޤައުމުތަކަށް މުހިންމު މަންފާތަކެއް ލިބުނުކަން ފާހަގަކުރައްވާ ޚާރިޖީ ވަޒީރު ވަނީ ޝުކުރު އަދާކުރައްވާފައެވެ.

ވަޒީރު މޫސާ ޒަމީރުގެ ވާހަކަފުޅުގައިވަނީ، ގްލޯބަލް ސައުތުގެ ޤައުމުތަކަށް މިހާރު ދިމާވަމުންދާ ގޮންޖެހުންތަކަށް އަލިއަޅުވާލައްވާ، އެގޮންޖެހުންތަކަށް ދާއިމީ ހައްލެއް ހޯދޭނީ، ވީ އެންމެ އަވަހަކަށް މޫސުމީ ބަދަލުތަކުގެ ސަބަބުން ކުރާ އަސަރުތަކަށާއި، ދަރަނި އިތުރުވުމުގެ މައްސަލައަށް މަލްޓިލެޓްރަލް ފްރޭމްވޯރކްތަށް އަދާހަމަކޮށްގެންކަމަށް ވިދާޅުވެފައެވެ.

މިއީ މޫސުމަށް އަންނަ ބަދަލުތަކުގެ ސަބަބުން ކުރާ ނޭދެވޭ އަސަރުތަކަށް ތަރައްޤީވަމުން އަންނަ ކުދި ޖަޒީރާ ޤައުމުތަކާއި، ގްލޯބަލް ސައުތުއާއި، މުޅި ދުނިޔެ ބޭނުންވާ ހައްލު ހޯދަންވީ ވަގުތުކަމުގައިވެސް ވަޒީރު ފާހަގަކުރެއްވިއެވެ. މީގެ އިތުރުން، ދިވެހިރާއްޖެފަދަ ޤައުމުތަކުގެ ތަރައްޤީގެ ތަސައްވުރު ހާސިލުކުރުމަށް ބޭނުންވާ ޓެކްނޮލޮޖީގެ އައު އީޖާދަތައް ހަމަހަމަ އުސޫލެއްގެ މަތިން ގްލޯބަލް ސައުތުގެ ޤައުމުތަކަށް ފޯރާކަން ކަށަވަރުކުރުމުގެ މުހިންމުކަން ޚާރިޖީ ވަޒީރު ފާހަގަކުރެއްވިއެވެ.

މި ބައްދަލުވުމުގައި ވާހަކަފުޅު ދައްކަވަމުން ދިވެހި ޚާރިޖީއްޔާއިންވަނީ ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލްކުރެވޭނީ ގްލޯބަލް ސައުތާއި އެނޫން ޤައުމުތަކުގެ މެދުގައި އޮންނަ ގުޅުން އިތުރަށް ހަރުދަނާކޮށްގެންކަން ފާހަގަކުރައްވާފައެވެ.

ވޮއިސް އޮފް ގްލޯބަލް ސައުތު ސަމިޓަކީ އިންޑިއާގެ ޖީ20ގެ ރިޔާސަތުގައި ޖީ20 ގައި ނުހިމެނޭ މެމްބަރު ޤައުމުތައް، ވަކިން ޚާއްސަކޮށް ގްލޯބަލް ސައުތަށް، ދިމާވަމުންދާ މައްސަލަތަކާ ގުޅޭގޮތުން އަޑުއުފުލުމަށް އިންޑިއާ ސަރުކާރުން ފެށި ހަރަކާތެކެވެ. އެހެން ފަހަރުތަކެކޭވެސް އެއްފަދައިން މި އަހަރުގެ ސަމިޓުވެސް އިފްތިތާހްކޮށްދެއްވާފައިވަނީ އިންޑިއާގެ ބޮޑު ވަޒީރު ނަރެންދްރަ މޯދީ އެވެ.

ޤައުމުތަކުގެ ޚާރިޖީ ވަޒީރުންގެ ސެޝަންގެ ރިޔާސަތު ބަލަހައްޓަވާފައިވަނީ އިންޑިއާގެ ޚާރިޖީވަޒީރު ޑރ. ސުބްރަމަނިއަމް ޖައިޝަންކަރެވެ. މި ބައްދަލުވުމުގައި ބްރޫނާއީ، ކެމްބޯޑިއާ، ކިއުބާ، އިރާގު، ލާއޯ ޕީޑީއާރު، ލެސޯތޯ، މެލޭޝިއާ، ޕެނަމާ، ޕަޕުއާ ނިއު ގިނީ، ސޮލޮމަން އައިލެންޑްސް، ތަޖިކިސްތާން، ތުރުކުމެނިސްތާން އަދި ޓޫވާލޫގެ ފޮރިން މިނިސްޓަރުން ބައިވެރިވެވަޑައިގެންނެވިއެވެ.