ޚާރިޖީ ވަޒީރު ސައުދީއަށް ފުރާވަޑައިގެންފި

ޚާރިޖީ ވަޒީރު މޫސާ ޒަމީރު ސައުދީ ޢަރަބިއްޔާއަށް ފުރާވަޑައިގެންފިއެވެ،

މި ދަތުރުފުޅަކީ މިނިސްޓަރ އޮފް ފޮރިން އެފެއަރސް އޮފް ދަ ކިންގްޑަމް އޮފް ސައުދީ ޢަރަބިއްޔާ، ޕްރިންސް ފައިސަލް ބިން ފަރްހާން އަލް-ސަޢުދުގެ ދައުވަތަކަށް ކުރައްވާ ދަތުރުފުޅެކެވެ.

މި ދަތުރުފުޅުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާއްސަ ސިޓީފުޅެއް، ސަޢުދީ ވަލީއަހުދު އަދި ބޮޑުވަޒީރު، ޕްރިންސް މުޙައްމަދު ބިން ސަލްމާން ބިން ޢަބްދުލްއަޒީޒް އަލް-ސަޢުދު އަށް އެރުވުމަށް ހަމަޖެހިފައިވާކަމަށް ޚާރިޖީ ވުޒާރާއިން ވިދާޅުވެއެވެ.

ޚާރިޖީ ވަޒީރުގެ ދަތުރުފުޅުގެ ތެރެއިން، މަތީ ފެންވަރުގެ މުހިންމު މަޝްވަރާތަކެއް ބޭއްވުމަށް ވަނީ ހަމަޖެހިފައެވެ. އެގޮތުން ސައުދީ ސަރުކާރުގެ އިސް ފަރާތްތަކާ ސައުދީ ފަންޑުގެ އިސް ބޭފުޅުންނާވެސް ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުވުންތަކުގައި ދެ ޤައުމުގެ ގުޅުން ވަރުގަދަކުރުމާއި ކުރިމަގުގައި ދެ ޤައުމުގެ ލާބައަށް ގުޅިގެން މަސައްކަތް ކުރެވޭނެ ދާއިރާތަކުން މަޝްވަރާ ބައްދަލުވުންތައް ބާއްވާނެއެވެ.

ވަޒީރުގެ މި ދަތުރުފުޅުގައި ސައުދީގެ ރިޔާޛުގައި ދިރިއުޅޭ ދިވެހިންނާ ބައްދަލުކުރެއްވުމަށްވެސް ވަނީ ހަމަޖެހިފައެވެ.

ޚާރިޖީ ވަޒީރު މޫސާ ޒަމީރުގެ އިތުރުން މި ދަތުރުފުޅުގައި އެމްބެސެޑަރ އެޓް ލަރޖް އަޙުމަދު ނަސީރު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސިއެލްގެ މެނޭޖިން ޑިރެކްޓަރ އިބްރާޙިމް ޝަރީފް މުޙައްމަދު، ޖޮއިންޓް ސެކްރެޓަރީ ބަދޫރާ ސަޢީދު އަދި ޑިރެކްޓަރ ޖެނެރަލް އައިޝަތު ފަރީނާ ބައިވެރިވެވަޑައިގަންނަވައެވެ.

ޚަރިޖީ ވަޒީރުގެ މި ދަތުރުފުޅަކީ 4 ދުވަހުގެ ދަތުރުފުޅެކެވެ.

މިއަހަރަކީ ދިވެހިރާއްޖެއާއި ސައުދީޢަރަބިއްޔާއާއި ދެމެދު ސިޔާސީ ގުޅުން ޤާއިމުކުރިތާ 43 އަހަރު ފުރޭ އަހަރެވެ.