ކުޑަ އަގުގައި ޓޫރިޒަމްގެ ބޭނުމަށް ނަގާ ރަށެއްގެ މުއްދަތު އިތުރުކުރެވޭ އިސްލާހު މަޖިލީހުން ފާސްކޮށްފި

ކުޑަ އަގުގައި ޓޫރިޒަމްގެ ބޭނުމަށް ކުއްޔަށް ނަގާފައިވާ ރަށެއް ނުވަތަ ބިމެއްގެ މުއްދަތު އިތުރުކުރެވޭގޮތަށް ދިވެހިރާއްޖޭގެ ޓޫރިޒަމާ ބެހޭ ޤާނޫނަށް ގެނައި އިސްލާހު މަޖިލީހުން ފާސްކޮށްފިއެވެ.

ޓޫރިޒަމާ ބެހޭ ޤާނޫނަށް އިސްލާހު ގެނައުމުގެ ބިލު، ސަރުކާރުގެ ފަރާތުން މަޖިލީހަށް ހުށައެޅުއްވީ ދަނގެތި ދާއިރާގެ މެންބަރު ޢަބްދުﷲ ރަޝީދެވެ. މިބިލު ދިރާސާކުރުމަށްފަހު، ބިލު އޮތް ގޮތަށް މުޅި މަޖިލީހުގެ ކޮމިޓީން ފާސްކޮށްފައިވަނީ މިދިޔަ ބުރާސްފަތި ދުވަހުއެވެ.

މިއަދު ކުރިއަށްދިޔަ ޖަލްސާގައި މުޅި މަޖިލީހުގެ ކޮމިޓީން ބިލު ދިރާސާކޮށް ނިންމި ގޮތުގެ ރިޕޯޓުވަނީ ހުށައަޅާފައެވެ. އަދި މުޅި މަޖިލީހުގެ ކޮމިޓީން ބިލު ފާސްކުރިގޮތަށް، މަޖިލީހުން ފާސްކުރުމަށް އެހި ވޯޓުގައި، 76 މެންބަރުންވަނީ ބިލް ފާސްކުރަން ވޯޓުދެއްވާފައެވެ. ނުފެންނަކަމަށް އެއްވެސް މެންބަރަކު ވޯޓުދެއްވާފައެއް ނުވެއެވެ.

ޓޫރިޒަމާބެހޭ ޤާނޫނު މިހާރު އޮންނަ ގޮތުން ޓޫރިޒަމް ބޭނުމަށް ކުއްޔަށް ނަގާފައިވާ ރަށެއް ނުވަތަ ބިމެއްގެ މުއްދަތު އިތުރު ކުރާނަމަ އިތުރުކުރާ ކޮންމެ އަހަރަކަށް 200،000 ޑޮލަރު ދައްކައި، މުއްދަތު އިތުރު ކުރުމުގެ ފީގެ ގޮތުގައި އެއްފަހަރާ 10 މިލިއަން ޑޮލަރު ދައްކަން ޖަހެއެވެ.

ނަމަވެސް މިހާރު ޤާނޫނު އިސްލާހުކޮށްފައި އޮތްގޮތުން މި ބިލު ފާސްކޮށް، ޢަމަލުކުރަން ފަށާތާ 6 މަސް ދުވަހުގެ ތެރޭގައި މުއްދަތު އިތުރުކުރުމަށް އެދި ފައިސާ ދައްކަންޖެހޭނީ އެއްފަހަރާ ފައިސާ ދައްކަން އެއްބަސްވާނަމަ، މިހާރު ދައްކާ މިންވަރުގެ ދެބައިކުޅަ އެއްބައެވެ. އެއީ އިތުރުވާ ކޮންމެ އަހަރަކަށް 100،000 ޑޮލަރު ދެއްކުމާއެކު ކުއްޔައްނެގި މުއްދަތު އިތުރު ކުރުމުގެ ފީގެ ގޮތުގައި 5 މިލިއަން ޑޮލަރު ދެއްކުމެވެ.

ނަމަވެސް މި އިސްލާޙަށް ޢަމަލުކުރަން ފަށާ ތާރީޚުން ފެށިގެން 6 މަސް ދުވަސް ވޭތުވުމަށްފަހު، މުއްދަތު އިތުރުކުރަން ބޭނުންވާނަމަ، އިތުރުކުރާ ކޮންމެ އަހަރަކަށް 200،000 އެމެރިކާ ޑޮލަރު ދައްކަންޖެހޭނެއެވެ. އަދި މުއްދަތު އިތުރުކުރުމުގެ ފީއެއްގެ ގޮތުގައި 10،000،000 އެމެރިކާ ޑޮލަރު ދައްކަންޖެހޭނެއެވެ.

ދިވެހިރާއްޖޭގެ ޓޫރިޒަމާބެހޭ ޤާނޫނަށް ގެންނަ މި އިސްލާޙުގެ ބޭނުމެއްކަމަށް ބުނެފައިވަނީ އިންވެސްޓަރުންނަށް ޓޫރިޒަމް ބޭނުމަށް ނަގާފައިވާ ރަށެއް ނުވަތަ ރިސޯޓެއް ކުއްޔަށް ނަގާފައިވާ މުއްދަތު އިތުރު ކުރުމަށް ފަހި ފުރުޞަތެއް ހޯދައިދިނުން ކަމަށެވެ.

ދިވެހިރާއްޖޭގެ ޓޫރިޒަމާބެހޭ ޤާނޫނުގައި މިހާރު އޮންނަ ގޮތުން ޓޫރިސްޓް ރިޒޯޓެއް ނުވަތަ އިންޓަގްރޭޓަޑް ޓޫރިސްޓް ރިޒޯޓެއް ހެދުމަށް ދޫކުރާ ރަށްރަށާއި ބިންބިން ކުއްޔަށް ދޫކުރެވޭނީ ކުއްޔަށް ހިފާ ފަރާތާ ރަށް ނުވަތަ ބިން ހަވާލުކުރާ ތާރީޚުން ފެށިގެން ގިނަވެގެން މީލާދީ 50 (ފަންސާސް) އަހަރުދުވަހަށެވެ.