ބިދޭސީންގެ ފީތައް ޤަވާއިދުން ދައްކާ ފަރާތްތަކަށް ލުއި ގޮތްތައް ހަމަޖައްސައިދޭނަން: ވަޒީރު

ބިދޭސީ މަސައްކަތްތެރިންގެ ފީތައް ޤަވާއިދުން ދައްކާނަމަ ބިދޭސީން ގެނައުމަށް ލުއި ގޮތްތަކެއް ފަހިކޮށްދެއްވާނެކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު އިޙްސާން މިހެން ވިދާޅުވީ ދިވެހިރާއްޖޭގައި ބިދޭސީންނަށް ވަޒީފާދޭ ފަރާތްތަކާއި، "އެކްސްޕެޓް ސިސްޓަމް" ބޭނުންކުރާ ފަރާތްތަކާއެކު ބޭއްވި ބައްދަލުކުރެއްވުމުގައެވެ.

ބިދޭސީންނަށް ވަޒީފާދޭ ފަރާތްތަކާއި، "އެކްސްޕެޓް ސިސްޓަމް" ބޭނުންކުރާ ފަރާތްތަކާއެކު ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ބޭއްވި ބައްދަލުވުމަކީ ބިދޭސީންގެ މައްސަލާގައި ހިޔާލާއި މަޝްވަރާ ހޯދުމަށް ބޭއްވި ބައްދަލުވުމެކެވެ.

މި ބައްދަލުވުމުގައި ބައިވެރިވި ފަރާތްތަކުން ވަނީ ބިދޭސީ މަސައްކަތްތެރިން ގެނައުން ސަރުކާރުން ހިފަހައްޓާފައިވާތީ އެކަމުގެ ކަންބޮޑުވުން ވަޒީރާއި ޙިއްސާކުރައްވާފައެވެ. އެ ކަންބޮޑުވުމާއި ގުޅޭގޮތުން ވަޒީރު އިޙްސާން ވިދާޅުވީ ބިދޭސީން ރާއްޖެއަށް ގެނައުން މިވަގުތު ހިފަހައްޓާފައިވަނީ ގިނަ އަދަދެއްގެ ފަރާތްތަކުން ބިދޭސީން ރާއްޖެ ގެނެސް އެމީހުންނާމެދު އިހުމާލުވާތީ ކަމަށެވެ.

ވަޒީރު ވިދާޅުވީ ބިދޭސީންނަށް ވަޒީފާ ދީގެން ގެންގުޅޭ މީހުންނާއި ކުންފުނިތަކުގެ އަދަދު 50000 އަށްވުރެ މައްޗަށް އަރާކަމަށާއި އޭގެ ތެރެއިން 90 އިންސައްތަ ނުވަތަ 45000 އަށްވުރެ ގިނަ ބަޔަކު ޤަވާއިދުން ފީ ނުދައްކާކަމަށެވެ،

ވަޒީރު ވިދާޅުވީ ގަވާއިދާއި ޚިލާފަށް އުޅޭ ބިދޭސީންގެ މައްސަލަ ޙައްލުކުރެވޭނީ، ބިދޭސީން ގެންނަ ފަރާތްތަކުން ޤަވާއިދުން ފީ ދައްކައިގެން ކަމަށެވެ.

ވަޒީރު ވިދާޅުވީ ސަރުކާރުގެ ވިސްނުމަކީ ބިދޭސީންނާއި ގުޅޭ ފީތައް ޤަވާއިދުން ނުދައްކާ ފަރާތްތައް ބްލެކް ލިސްޓުކޮށް، ބިދޭސީން ގެނައުމުގެ ހުއްދަ އެއްވެސް ވަރަކަށް އެ މީހުންނަށް ނުދިނުމަށްކަމަށެވެ. އަދި ޤަވާއިދުން ފައިސާ ދައްކާ ފަރާތްތަކަށް ބިދޭސީން ރާއްޖެއަށް ގެނައުމުގައި ލުއި ގޮތްތަކެއް އުސޫލުތަކުގެ ތެރެއިން ފަހިކޮށްދެއްވާނެކަމަށްވެސް ވަޒީރު ވިދާޅުވިއެވެ.

"އަޅުގަނޑުމެންގެ ވިސްނުމަކީ އެއްވެސް ހިފެހެއްޓުމެއްނެތި، ބިދޭސީން ގެންނަ ފަރާތުން ބޭނުންވާ އަދަދަކަށް، ބިދޭސީން ގެނެވޭ ގޮތް ހެދުން. އެކަމަކު އެއީ ގަވައިދުން ފައިސާ ދައްކާ ފަރާތްތަކަށް. އަޅުގަނޑުމެން ކަނޑައަޅާނީ ވަކި މިންގަނޑުތަކެއް. އެގޮތުން އިންޝުއަރެންސްއާއި ޞިއްޙީ ކަންކަމާއި ބަރާބަރަށް ފީތައް ދައްކާނަމަ، ބޭނުން އަދަދަކަށް ބިދޭސީ މަސައްކަތްތެރިން ގެނެވޭނެ." ވަޒީރު ވިދާޅުވިއެވެ.

ވަޒީރު ވިދާޅުވީ ސަރުކާރުގެ އަމާޒަކީ ކުރިއަށް އޮތް 3 އަަހަރުގެ ތެރޭގައި ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުން ކަމަށެވެ.

މި ބައްދަލުވުމުގައި ބައިވެރިވި ފަރާތްތަކުން ވަނީ އެމީހުންގެ ކަންބޮޑުވުންތައް ސަރުކާރުން އެއްސެވުމުން އެކަން ފާހަގަކޮށްފައެވެ. އަދި ބިދޭސީންގެ މައްސަލަ ހައްލުކުރަން ސަރުކާރުން ކުރައްވާ މަސައްކަތަށް އެ ފަރާތްތަކުން ވަނީ ތަޢުރީފުކޮށްފައެވެ.