ޤަވާއިދާއި ޚިލާފަށް ބޭނުންކުރާ އުޅަނދުތައް ވަގުތީގޮތުން ބޭއްވުމަށް ބިމެއް ހަމަޖައްސައިފި
-
އުޅަނދުތަކުގެ ރަޖިސްޓްރީ ރަނގަޅުކުރުމަށް 6 މަސް ދުވަހުގެ މުއްދަތެއް ދޭން ނިންމާފައިވޭ
-
ކަނޑައަޅާފައިވާ ބިމަށް އުޅަނދު ގެންދަން 40 ދުވަހުގެ މުއްދަތެއް ލިބޭނެ
މާލެއާއި ހުޅުމާލޭގައި ޤަވާއިދުތަކާއި އުސޫލުތަކާއި ޚިލާފަށް ބޭނުންކުރަމުންދާ އުޅަނދުތަކުގެ ރަޖިސްޓްރީއާ އެހެނިހެން ކަންކަން އިސްލާހުކުރަންދެން، ވަގުތީގޮތުން އެ އުޅަނދުތައް ބޭއްވުމަށް ބިމެއް ހަމަޖައްސައިފިއެވެ.
ޤަވާއިދުތަކާއި އުސޫލުތަކާއި ޚިލާފަށް ބޭނުންކުރަމުންދާ އުޅަނދުތައް ބޭއްވުމަށް ސަރުކާރުން ހަމަޖައްސާފައިވަނީ ހުޅުމާލޭގެ ފޭސް ދޭއްގެ ބިމެކެވެ.
މާލެ ސަރަހައްދުގައި ޕާކުކޮށްފައިވާ އުޅަނދުތަކުގެ ތެރޭގައި ރަޖިސްޓްރީނުކޮށް ހުރި އުޅަނދުތަކާއި އެހެން ޒޯންތަކަށް ރަޖިސްޓްރީކޮށްފައިވާ އުޅަނދުތައް ގިނަކަމަށް ކަމާބެހޭ ފަރާތްތަކުން ވިދާޅުވެއެވެ. ސަރުކާރުން މިހާރު މިވަނީ މިފަދަ އުޅަނދުތައް ގަވާއިދާ އެއްގޮތަށް ރަޖިސްޓްރީކުރުމަށް ނުވަތަ ރަޖިސްޓްރީކޮށްފައިވާ ޒޯނަށް އުޅަނދު ގެންދިއުމަށް 6 މަސް ދުވަހުގެ މުއްދަތެއް ދެއްވާފައެވެ.
ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން މިހާރު ވަނީ އެ މުއްދަތުގެ ތެރޭގައި އުޅަނދުތައް ބޭއްވުމަށް ހުޅުމާލޭގެ ދެވަނަ ފިޔަވަހީގެ އެމްއޭސީއެލް ފްލެޓާއި އިންވެގެން އޮންނަ ހުސް ބިމެއް ހަމަޖައްސަވައި، އެކަމާއި ގުޅޭ އެއްބަސްވުމުގައި އެޗްޑީސީއާއެކު ސޮއިކުރައްވާފައެވެ. އެއްބަސްވުމުގައި ދަތުރުފަތުރާއި މަދަނީ އުދުހުންތަކާބެހޭ ވުޒާރާގެ ފަރާތުން ސޮއިކުރެއްވީ ވަޒީރުގެ ނައިބު ޢަލީ ނިޝާނެވެ. އެޗްޑީސީގެ ފަރާތުން ސޮއިކުރެއްވީ ރިއަލް އެސްޓޭޓް މެނޭޖްމަންޓް ޑިރެކްޓަރ އަޙްމަދު ސަނީހް ޙަނީފެވެ.
މި އެއްބަސްވުމުގެ ދަށުން ކަނޑައެޅުނު ބިމުގައި ބޭއްވޭނީ ރަޖިސްޓްރީނުކޮށް މަގުމަތީގައި ބާއްވާފައި ހުރި އުޅަނދުތަކާއި މާލެ އަދި ހުޅުމާލޭގެ މަގުތަކުގައި ހުރި އޭ ޒޯން ފިޔަވައި އެހެން ޒޯންތަކަށް ރަޖިސްޓްރީކޮށްފައިވާ އުޅަނދުތައް އެކަނިކަމަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ވިދާޅުވެއެވެ. އަދި ވަގުތީގޮތުން އުޅަނދު ބޭއްވުމަށް ކަނޑައަޅާފައިވާ ސަަރަހައްދަށް އުޅަނދު ގެންދިއުމަށް 40 ދުވަހުގެ މުއްދަތެއް ލިބޭނެކަމަށްވެސް ވުޒާރާއިން ވިދާޅުވެއެވެ. ނަމަވެސް އެ މުއްދަތުގެ ތެރޭގައި ކަނޑައަޅާފައިވާ ސަރަހައްދަށް ނުގެންގޮސް މަގުމަތީގައި ބަހައްޓާފައި ހުންނަ އުޅަނދުތައް، ފުލުހުން ޓޯ ކުރާނެކަމަށްވެސް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ވިދާޅުވެއެވެ.