ޕްރޮސެކިއުޓަރ ޖެނެރަލްގެ މަޤާމުން ޝަމީމް ވަކިކުރަން ކޮމިޓީން ފާސްކޮށްފި

ޕްރޮސެކިއުޓަރ ޖެނެރަލްގެ މަގާމުން ޙުސައިން ޝަމީމް ވަކިކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން ފާސްކޮށްފިއެވެ. ޕްރޮސެކިއުޓަރ ޖެނެރަލްގެ މަގާމުން ވަކިކުރުމަށް ހުށަހަޅާފައިވާ މައްސަލަައަށް ޖަވާބުދާރީވުމަށް ޙުސައިން ޝަމީމަށް މަޖިލީހުގެ ޖުޑީޝަރީ ކޮމިޓީން ވަނީ ފުރުޞަތު ދެއްވާފައެވެ. ކޮމިޓީގެ މި ބައްދަލުވުން މިއަދު ކުރިއަށްގެންދިޔައީ ސިއްރުކޮށްގެންނެވެ.

ޕްރޮސެކިއުޓަރ ޖެނެރަލްގެ މަގާމުން ޝަމީމް ވަކިކުރުމުގެ މައްސަލަ ރައްޔިތުންގެ މަޖިލީހަށް ހުށަހެޅުއްވީ، ހުޅުދޫ ދާއިރާގެ މެމްބަރު މުޙައްމަދު ޝާހިދެވެ.

ޕީޖީގެ މަޤާމުން ޝަމީމް ވަކިކުރުމަށް ކޮމިޓީއަށް ހުށައެޅި ސަބަބުތަކުގެ ތެރޭގައި ކުރީގެ ޓޫރިޒަމް މިނިސްޓަރު އަލީ ވަހީދަށް ކޮށްފައިވާ ޖިންސީ ކުށުގެ ދައުވާތައް ފައިލް ކުރުމާއި، މަގާމުގައި ދެމިހުރުމަށް ކުރީގެ ޔޫތު މިނިސްޓަރު އަޙްމަދު މަހުލޫފްގެ މައްސަލަ ފައިލް ކުރުން ހިމެނެއެވެ.

މީގެ އިތުރުން ސަފާރީއެއްގައި ބިދޭސީއަކު ރޭޕްކުރި ކަމަށް ބުނާ މައްސަލާގައި އެމްޑީޕީއާ ގުޅުން އޮންނަ ފަރާތެއް ހިމެނޭތީ އިސްތިއުނާފް ނުކުރުމާއި، މިލަންދޫ ދާއިރާގެ ކުރީގެ މެންބަރު ޢަލީ ރިޒާގެ މައްޗަށް ކުރި ހިއުމަން ޓްރެފިކިންގެ ދައުވާ އަނބުރާ ގެންދިއުންވެސް ޝަމީމް ވަކިކުރަން ހުށައެޅި ސަބަބުތަކުގެ ތެރޭގައި ހިމެނެއެވެ. އަދި ބަނގުރަލާ ގުޅޭ 77 މައްސަލައެއް އަނބުރާ ގެންދިޔުމާއި، އެއް ޖިންސުން ގުޅުން ހިންގުމާ ގުޅޭ މައްސަލަތަކެއް އަނބުރާ ގެންދިޔުމާއި، ވެންޓިލޭޓަރު މައްސަލާގައި ދައުވާ ނުކުރަން ނިންމުމުގެ އިތުރުން ޕީޖީ އޮފީހުގެ މުއައްޒަފުންނާ މެދުގައި ތަފާތު ކުރުންތައް ގެންގުޅުވެސް ޝަމީމް ވަކިކުރަން ހުށައެޅި ސަބަބުތަކުގެ ތެރޭގައި ހިމެނެއެވެ.

ޝަމީމްގެ ޕީޖީކަމުގެ ދައުރު މިއަހަރުގެ ޑިސެމްބަރު މަހު ހަމަވާނެއެވެ.