ފޮރިން އިންވެސްޓްމަންޓުގެ ބިލު ހިމެނޭހެން 7 ބިލެއް ފާސްކޮށްފި

ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅުއްވާފައިވާ 7 ބިލެއް ރައްޔިތުންގެ މަޖިލީހުން ފާސްކުރައްވައިފިއެވެ. މި 7 ބިލަށް ވޯޓަށް އަހާފައިވަނީ ކޮމިޓީން އެ ބިލްތައް ދިރާސާކޮށް ނިންމިގޮތުގެ ރިޕޯޓު ހުށައެޅުމަށްފަހުއެވެ.

މަޖިލީހުން ފާސްކުރި 7 ބިލު

1- ފޮރިން އިންވެސްޓްމަންޓްގެ ބިލު
2- ވިޔަފާރި ރަޖިސްޓަރީކުރުމުގެ ޤާނޫނަށްށް އިޞްލާޙު ގެނައުމުގެ ބިލު
3- ދިވެހިރާއްޖޭގެ މާލީ ސެކިއުރިޓީޒްއާބެހޭ ޤާނޫނަށް އިޞްލާޙު ގެނައުމުގެ ބިލު
4- ޞިއްޙީ ޚިދުމަތް ދިނުމުގެ ޤާނޫނަށް އިޞްލާޙު ގެނައުމުގެ ބިލު
5- ދިވެހިރާއްޖޭގެ ޤާނޫނީ ފަންނުގެ ޤާނޫނަށް އިޞްލާޙު ގެނައުމުގެ ބިލު
6- ބިނާވެށި ޕްލޭންކުރުމާއި ހިންގުމުގެ ބިލު
7- ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު

މި ބިލުތަކުގެ ތެރެއިން ބިނާވެށި ޕްލޭންކުރުމާއި ހިންގުމުގެ ބިލާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލަށް އިދިކޮޅު އެއްވެސް މެންބަރަކު ވޯޓު ދެއްވާފައެއް ނުވެއެވެ. ބާކީ ފަސް ބިލު ފާސްވީ ވޯޓުގައި ބައިވެރިވެވަޑައިގެންނެވި 77 މެންބަރުންގެ އިއްތިފާޤުންނެވެ.

މި ބިލްތަކުގެތެރެއިން ފޮރިން އިންވެސްޓްމަންޓުގެ ބިލަކީ 45 އަހަރު ވެފައިވާ ފޮރިން އިންވެސްޓްމަންޓާބެހޭ ޤާނޫނަށް ގެނެވޭ ޒަމާނީ ބަދަލެކެވެ. މި ބިލުގެ މަޤްސަދަކީ ދިވެހި ރާއްޖޭގައި ބޭރުގެ ފަރާތްތަކަށް އިންވެސްޓް ކުރެވޭނެ ދާއިރާތައް ކަނޑައެޅުމުގެ އުސޫލުތަކާއި، އެފަދަ ފަރާތްތަކަށް ރާއްޖޭގައި އިންވެސްޓް ކުރުމުގެ ލައިސެންސް ދިނުމާއި، އެފަރާތްތަކަށް ޤާނޫނީ ރައްކާތެރިކަށް ކަށަވަރުކުރުމެވެ. މީގެ އިތުރުން އިންވެސްޓްމެންޓް ދައުލަތަށް ނެގުމާއި އެއަށް ބަދަލު ދިނުމަށް ހަރުދަނާ އުސޫލްތަކެއް ޤާއިމް ކުރުމަކީވެސް މީގެ މަޤްސަދުގެ ތެރޭގައި ހިމެނޭ ކަމެކެވެ.

ފޮރިން އިންވެސްޓްމަންޓުގެ ބިލާއެކު އިންވެސްޓްމަންޓުތަކަށް ޤާނޫނީ ރައްކާތެރިކަން ލިބި، ރާއްޖެއަށް އިންވެސްޓްމަންޓުތައް އިތުރުވާނެ ކަމަށް ރައްޔިތުންގެ މަޖިލީހުގެ މެންބަރުންވަނީ ވިދާޅުވެފައެވެ.

ބިލުތައް ފާސްކުރުމަށް ބޭއްވި ޖަލްސާ ނިންމަވާލައްވަމުން މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވީ މި ދައުރުގެ ތެރޭގައި ކުރެވުނު މަސައްކަތުގެ %82 މަސައްކަތް ނިމިފައިވާކަމަށެވެ.