ރައީސް މުޢިއްޒުގެ ސަރުކާރަކީ އިސްލާމްދީނަށް ނަޞްރު ދިނުމުގައި ދެމި އޮންނާނެ ސަރުކާރެއް: ވަޒީރު ޝަހީމް

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން އިސްލާމްދީނަށް ނަޞްރު ދިނުމުގައި ދެމި އޮންނާނެކަމަށާއި، ދީނީ ކަންކަމުގައި ހާސިލުކުރާ ކާމިޔާބީތަކުގެ އެންމެ ބޮޑު ހިއްސާދާރަކީވެސް އެމަނިކުފާނުކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ދިވެހިރާއްޖޭގެ ދީނީ ޢިލްމުވެރިންގެ އަހަރީ ބައްދަލުވުން ފެށުމަށް ބޭއްވި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

އިސްލާމީ މަރުކަޒުގެ ޖަލްސާ ކުރާ މާލަމުގައި ކުރިއަށްދާ ދީނީ ޢިލްމުވެރިންގެ އަހަރީ ބައްދަލުވުމުގައި ވާހަކަދައްކަވަމުން އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވީ އިސްލާމް ދީނުގެ ޚިދުމަތް ދެމެހެއްޓުމަށްޓަކައި މަސައްކަތްކުރާ ކޮންމެ ފަރާތަކަށްވެސް އެހީތެރިކަން ފޯރުކޮށްދިނުމުގެ ބައިވެރިއެއްގެގޮތުގައި އިސްލާމީ ކަންތައްތަކާބެހޭ ވުޒާރާއިން މަސައްކަތްކުރާނެ ކަމުގެ ޔަޤީންކަން ދެއްވާކަމަށެވެ. އަދި އެ ވުޒާރާއިން މިހާރު ކުރިއަށް ގެންދާ ގިނަ ކަންކަމުގައި ދީނީ ޢިލްމުވެރިންގެ ފަރާތުން ލިބިވަޑައިގަންނަވާ އެހީތެރިކަން އެމަނިކުފާނު ފާހަގަކުރެއްވިއެވެ.

"އިސްލާމްދީނުގެ ޚިދުމަތް ދެމެހެއްޓުމަށްޓަކައި މަސައްކަތްކުރާ ކޮންމެ ބޭފުޅަކަށް އެހީތެރިކަން ދިނުމުގެ ބައިވެރިއެއްގެގޮތުގައި ދެމި އޮންނާނެ، އެއްވެސް ބޭފުޅެއްގެ ދީނީ ހިދުމަތަށް އުނިކަމެއް އަންނާނެ ކަމެއް މި ވުޒާރާއަކުން ނުކުރާނެ،" ވަޒީރު ވިދާޅުވިއެވެ.

ވަޒީރު ވިދާޅުވީ އިސްލާމީ ކަންތައްތަކާބެހޭ ވުޒާރާގެ ހުރިހާ ކާމިޔާބީއެއްގެ އެންމެ ބޮޑު ހިއްސާދާރަކީ ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒުކަމަށެވެ. އަދި މި ސަރުކާރަކީ އިސްލާމްދީނަށް ނަޞްރު ދިނުމުގައި ދެމި އޮންނާނެ ސަރުކާރެއްކަންވެސް އެމަނިކުފާނު ފާހަގަކުރެއްވިއެވެ.

"މި ދުވަސްވަރަކީ އިސްލާމް ދީނުގެ ޚިދުމަތް ރާއްޖޭގައި ފުޅާކުރުމަށް މީސްތަކުންނާއި ހަމައަށް ހިދާޔަތު ގެންގޮސްދިނުމަށް ހަޔާތުގައި ލިބޭނެ ވަރަށް ބޮޑު އަގުހުރި ރަނުގެ ފުރުސަތެއް، ރާއްޖޭގައި އިސްލާމްދީނުގެ ކަންތައްތަކަށް ނަސްރުދޭނެ ސަރުކާރެއް ގާއިމްވެފައި އޮތުން،" ވަޒީރު ވިދާޅުވިއެވެ.

ވަޒީރު ވަނީ އިސްމާލީ ކަންތައްތަކާބެހޭ ވުޒާރާއިން ކުރަމުންދާ މަސައްކަތްތަކާއި ގުޅޭ މައުލޫމާތު ހިއްސާކޮށްފައެވެ. އަދި މި މަޝްރޫޢުތަކާއި އެކު ޒުވާން ޖީލު އިސްލާމް ދީނުގެ ޝިއާރުގެ ކުރީ ސަފަކަށް ގެނައުމަށް ކުރެވޭ މުހިއްމު މަސައްކަތްތަކެއްގޮތުގައި ވަޒީރު ސިފަކުރެއްވިއެވެ.

މިއަހަރުގެ ދީނީ އިލްމުވެރިންގެ ބައްދަލުވުމުގައި ސަތޭކައަށް ވުރެ ގިނަ ޢިލްމުވެރިންވަނީ ބައިވެރިވެެއެވެ. މި ބައްދަލުވުމުގައި ގިނަ ކަންތައްތަކާ މެދު މަޝްވަރާކުރާނެއެވެ. އެގޮތުން ވުޒާރާގެ ދީނީ މަސައްކަތްކުރިއަށް ގެންދާނެ ގޮތްތަކާމެދު އިލްމުވެރިންގެ ލަފާ ހޯދާނެ ކަމަށާއި އަދި ޤައުމީ އިސްލާމީ ތަޞައްވުރަކާމެދު މަޝްވަރާކުރާނެކަމަށްވެސް އިސްލާމީ ކަންތައްތަކާއި ބެހޭ ވުޒާރާއިން މައުލޫމާތުދެއެވެ