ޤައުމީ ދުވަސް ފާހަގަކުރުމުގެ ޖަލްސާ މާލެއާއި އުތީމުގައި އޮންނާނެ: ދިވެހިބަހުގެ ވުޒާރާ

މިއަހަރުގެ ޤައުމީ ދުވަސް ފާހަގަކުރުމަށް ބާއްވާ ޖަލްސަ މާލެއާއި ހއ. އުތީމުގައި އޮންނާނެކަމަށް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ވިދާޅުވެއްޖެއެވެ.

ދިވެހިބަހާ ބެހޭ ވުޒާރާއިން ވިދާޅުވީ ޤައުމީ ދުވަހުގެ ރަސްމީ ޖަލްސާ އޮންނާނީ މާލޭގައިކަމަށެވެ. އަދި އެހެން އަހަރުތަކެކޭވެސް އެއްގޮތަށް ހއ. އުތީމުގައިވެސް ދުވަހުގެ ޚާއްޞަ ޖަލްސާ އޮންނާނެކަމަށް އެ ވުޒާރާއިން ވިދާޅުވިއެވެ.

މީގެ އިތުރުން މި ދުވަސް ފާހަގަކުރުމަށް ށ. އަތޮޅު ކައުންސިލުން އިސްނަގައިގެން އެ އަތޮޅު މާއުނގޫދޫގައި ހަރަކާތްތަކެއް ހިންގުމަށް ރާވާފައިވާކަމަށްވެސް ދިވެހިބަހުގެ ވުޒާރާއިން ވިދާޅުވިއެވެ. އެގޮތުން އެރަށިގައިވެސް ދުވަހުގެ ޚާއްޞަ ޖަލްސާއެއްގެ އިތުރުން ސަގާފީ ކުޅިވަރުތަކާއި، ދިވެހި ކެއުންތައް ހިމެނޭ ޖާފަތެއް އެ ރަށުގައި އޮންނާނެކަމަށް ދިވެހިބަހާބެހޭ ވުޒާރާއިން ވިދާޅުވެއެވެ. މާއުނގޫދޫގައި ބާއްވާ ހަރަކާތްތަކުގައި ދިވެހިބަހުގެ ވަޒީރު އާދަމް ނަޞީރު އިބްރާހިމް ބައިވެރިވެވަޑައިގަންނަވާ ގޮތަށްވަނީ ހަމަޖެހިފައެވެ.

ދިވެހިރާއްޖޭގެ ޤައުމީ ދުވަހަކީ ރަބީޢުލްއައްވަލްމަހުގެ 1 ވަނަ ދުވަހުއެވެ. މި ދުވަސް މިއަހަރު ދިމާވަނީ އަންނަ ސެޕްޓެމްބަރު މަހުގެ 4 ވަނަ ދުވަހާއެވެ.

ޤައުމީ ދުވަސް ފާހަގަކުރަނީ ޕޯޗުގީޒުންގެ އަޅުވެތިކަމުގެ ދަށުން ރާއްޖެ މިނިވަންވި ދުވަހާ ގުޅިގެންނެވެ. ޕޯޗުގީޒުންގެ ކިބައިން ރާއްޖެ މިނިވަންވީ 1573 ވަނަ އަހަރު، އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމާއި އިތުރު 5 ބޭކަލަކު އިސްވެކުރެއްވި ޖިހާދުގެ ސަބަބުންނެވެ.