ސަރުކާރުގެ ސިޔާސަތަކީ އަނިޔާގެ ޝިކާރައަކަށްވާ ކުދިން ދުރާލާ ސަލާމަތްކުރުން

ސަރުކާރުގެ ސިޔާސަތަކީ އަނިޔާގެ ޝިކާރައަކަށްވާ ކުދިން ދުރާލާ ދެނެގަނެ، އެކުދިން އަނިޔާއިން ސަލާމަތްކުރުންކަމަށް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ވިދާޅުވެއްޖެއެވެ.

އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއަށް ކޮންމެ މަހަކުވެސް ހުށައެޅޭ މައްސަލަތަކުގެ ތަފާސް ހިސާބުތަކުގައި އެންމެ ގިނައީ ކުޑަކުދިންނާ ގުޅޭގޮތުން ހުށައެޅޭ މައްސަލަތަކެވެ. އެހެންކަމުން ކުޑަކުދިންނާއި ގުޅޭގޮތުން ހުށައެޅޭ މައްސަލަތައް މަދުކުރުމަށް އެ ވުޒާރާއިން ދަނީ ގިނަ މަސައްކަތްތަކެއް ކުރައްވަމުންނެވެ.

ކުޑަކުދިންނާގުޅޭ މައްސަލަތައް މަދުކުރުމަށް ކުރެވޭ މަސައްކަތްތަކާ ބެހޭގޮތުން އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާގެ ސޯޝަލް ސާވިސް ކޯޑިނޭޓަރ ޢަބްދުﷲ އަޝްރަފް ވިދާޅުވީ ކުއްޖަކަށް މައްސަލައެއް ދިމާވުމުން އިޖުތިމާޢީ ވުޒާރާގެ ހެލްޕް ލައިނަށް ބައެއް ބެލެނިވެރިން ގުޅައި، އެ މަޢުލޫމާތު ދެމުންގެންދާ ކަމަށެވެ. އަދި ކުޑަކުދިންގެ ރައްކާތެރިކަމަށްޓަކައި އެޅިދާނެ ފިޔަވަޅުތައް އެ ފަރާތްތަކަށް ކިޔައިދޭކަމަށްވެސް އަޝްރަފް ވިދާޅުވިއެވެ.

އަޝްރަފް ވިދާޅުވީ ހެލްޕް ލައިން މެދުވެރިކޮށް މަޢުލޫމާތު ދިނުމުގެ އިތުރުން ކުޑަކުދިންގެ މައްސަލަތައް މަދުކުރުމަށް "އިޖުތިމާޢީ ބަދަހި މަދަދުވެރިންގެ ގުރޫޕުތައް" އަތޮޅުތަކުގައި އުފައްދައިގެން މަސައްކަތް ކުރަމުންދާ ކަމަށެވެ. އެގޮތުން އިބަމަގެ ނަމުގައި އުފައްދާފައިވާ މި ގުރޫޕުތަކުން މުޖުތަމަޢުގައި އަނިޔާގެ ޝިކާރައަކަށްވެދާނެ ކުޑަކުދިން ދެނެގަނެ، ވަގުތު އޮތްވާ އަނިޔާއިން އެކުދިން ސަލާމަތްކުރުމަށް މިހާރު މަސައްކަތް ކުރަމުންދާކަމަށް އަޝްރަފް ވިދާޅުވިއެވެ.

"އިބަމަ ޕްރޮގުރާމުގެ ދަށުން އަޅުގަނޑުމެން ހަދަނީ ގުރޫޕުތަކެއް ކޮންމެ ރަށެއްގައިވެސް. އެ ގުރޫޕުން ނާޒުކު ޙާލަތްތަކުގައި ތިބި ޢާއިލާތައް ދެނެގަނެ، އަނިޔާގެ ޝިކާރައަކަށްވެދާނެ ކުދިން ދެނެގަނެ، އެ ޢާއިލާތަކާއި ކުދިންނަށް ފަރުވާ ފޯރުކޮށްދެމުން ގެންދާނެ." އަޝްރަފް ވިދާޅުވިއެވެ.

ފުރަތަމަ 6 މަސް ދުވަހު ހުށައެޅުނު ބައެއް މައްސަލަތައް:

• ގެވެށި އަނިޔާގެ އަމަލެއް ކުއްޖަކަށް ދެއްކުން ނުވަތަ ފެނުމުގެ 125 މައްސަލަ
• ޖިސްމާނީ އަނިޔާގެ 119 މައްސަ
• ޖިންސީ ހާނިއްކައިގެ 119 މައްސަލަ
• އިހުމާލުގެ 111 މައްސަލަ
• ނަފްސާނީ ހާނިއްކައިގެ 37 މައްސަލަ

އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާގެ ތަފާސްހިސާބުތަކުން ދައްކާ ގޮތުން މިއަހަރުގެ ފުރަތަމަ 6 މަސް ދުވަހު 1341 މައްސަލައެއް އެ ވުޒާރާއަށް ހުށައަޅާފައިވެއެވެ. މީގެ ތެރެއިން 589 މައްސަލައަކީ ކުޑަކުދިންނަށްކުރާ އެކި ބާވަތުގެ އަނިޔާއާގުޅޭ މައްސަލަތަކެވެ. މިއީ ހުށައެޅުނު މައްސަލަަތަކުގެ 43 އިންސައްތައެވެ.

ކުޑަކުދިންނާ ގުޅޭގޮތުން ހުށައެޅޭ މައްސަލަތަކުގެ ތެރޭގައި ޖިސްމާނީ އަނިޔާއާއި ޖިންސީ ހާނިއްކައާއި ނަފްސާނީ ހާނިއްކައިގެ އިތުރުން އިހުމާލުގެ މައްސަލަތަކާއި ގެވެށި އަނިޔާގެ އަމަލެއް ކުއްޖަކަށް ދެއްކުން ނުވަތަ ފެނުން ހިމެނެއެވެ.