ފެނަކައިގެ ދަރަނިން 800 މިލިޔަން ރުފިޔާ ދައްކައިފިން: މުޢާޒް

ފެނަކަ ކުންފުނިން އެކި ފަރާތްތަކަށް ދައްކަން ޖެހިފައިވާ ދަރަނީގެތެރެއިން މިހާތަނަށް 800 މިލިޔަން ރުފިޔާ ދައްކާފައިވާކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވެއްޖެއެވެ. މުޢާޒު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.

މިސަރުކާރު އާއިރު ފެނަކާގައި 4.3 ބިލިޔަން ރުފިޔާގެ ދަރަންޏެއް އޮތެވެ. އޭގެތެރޭގައި އެސްޓީއޯއަށް ދައްކަންޖެހޭ ގިނަ ޢަދަދެއްގެ ފައިސާއާއި އަމިއްލަ ވިޔަފާރިވެރިންނަށް ދައްކަންޖެހޭ ފައިސާވެސް ހިމެނެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވީ ފެނަކައިން އެކި ފަރާތްތަކަށް ދައްކަން ޖެހޭ ދަރަނީގެތެރެއިން މިހާތަނަށް 800 މިލިއަން ރުފިޔާ ދައްކާފައިވާކަމަށެވެ. މީގެތެރެއިން ހާއްސަ އިސްކަމެއް ދިނީ ކުދި ވިޔަފާރިތަކަށް ދައްކަން ޖެހޭ ފައިސާ ދައްކާ ޚަލާސްކުރުމަށްކަމަށް މުޢާޒް ވިދާޅުވިއެވެ. އެގޮތުން 280އަށްވުރެ ގިނަ ފަރާތްތަކަށް މިހާރު ފައިސާ ދައްކާފައިވާ ކަމަށްވެސް މުޢާޒް ވިދާޅުވިއެވެ.

"ޚާއްސަކޮށް އިސްކަމެއް މިދިނީ ރަށްރަށުގައި ތިބި ކުދި ކުދި ވެންޑަރުންނަށް ފައިސާ ދައްކަން، އޭގެތެރޭގައި އެބަ ހިމެނޭ ނާލު ބޯޓު ފަހަރާއި، ކެއުންބުއިމަށް ހިދުމަތްދޭ ބައެއް ތަންތަން. ކުރީގެ މެނޭޖްމަންޓުންކޮށްފައި ހުރި ޚަރަދުތަކުގެތެރެއިން ފައިސާ ނުދައްކާހުރި ޚަރަދުތައް،" މުޢާޒު މުޙައްމަދު ރަޝީދު ވިދާޅުވިއެވެ.

މުޢާޒު ވިދާޅުވީ ދަރަނީގެގޮތުގައި 800 މިލިއަން ރުފިޔާ ދައްކާފައިވާއިރު، އަދިވެސް ކުންފުނީގެ ދަރަނި ހުރީ 4.1 ބިލިޔަން ރުފިޔާގައި ކަމަށެވެ. މީގެ ސަބަބަކީ އެސްޓީއޯއަށް ދައްކަން ޖެހޭ ގިނަ ޢަދަދެއްގެ ފައިސާ ހުރުންކަމަށްވެސް މުޢާޒް ވިދާޅުވިއެވެ.

ފެނަކަ ކޯޕަރޭޝަނުގެ މެނޭޖިންގ ޑިރެކްޓަރު ވިދާޅުވީ، އެކުންފުނީގެ ބޮޑު ދަރަންޏެއް އޮތް އިރު، މިހާރު ހުރި ހުރިހާ ދަރަންޏެއް ދައްކާ ނިންމޭނެ ކަމަށް ލަފާކުރެވެނީ 2027ވަނަ އަހަރުގެތެރޭގައި ކަމަށެވެ.

"މިހާރު އޮތް ޕްލޭންގައި އޮތް ގޮތުން 2027ވަނަ އަހަރުގެ މެދު ތެރޭގައި ދަރަނި ދައްކާ ޚަލާސްކުރެވޭނެ. އަދި މިހާރު ޓްރާންސިޝަނެއްގައި މި އޮތީ އެސްޓީއޯގެ ދަށަށް ބަދަލުވުމުން. ފެނަކައިގެ ދަރަނި ދެއްކުމުގެ ކަންކަން މިއަށްވުރެ ފަސޭހަވެގެންދާނެ ކަމަށް އުއްމީދުކުރެވޭ،" މުޢާޒު ވިދާޅުވިއެވެ.

ފެނަކަ ކޯޕަރޭޝަން ލިމިޓެޑުގެ ހުރިހާ ހިއްސާއެއް، ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް، އެސް.ޓީ.އޯ އިން ގަނެ މިއަހަރުގެ ނިޔަލަށް އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. މިއާއެކު އެސްޓީއޯގެ ދަށަށް ފެނަކަ ބަދަލުކުރުމުގެ މަސައްކަތް މިހާރު ފަށާފައިވާކަމަށް އެސްޓީއޯއިން ބުނެއެވެ.

އެސްޓީއޯއިން ފެނަކައިގެން ހިންގުން ހަރުދަނާކޮށް ބޮޑެތި ބަދަލުތަކެއް ގެނައުމަށް ވަނީ ހަމަޖެހިފައެވެ. އަދި ފެނަކައިން ކުރިއަށް ގެންގޮސްފައިވާ މަޝްރޫޢުތަކަކީވެސް ދެމެހެއްޓެނިވި މަންފާ އޮތް މަޝްރޫޢުތަކަކަށްވާނަމަ ކުރިއަށް ގެންދަން އެސްޓީއޯއިން ވަނީ ނިންމާފައެވެ.

މިބަދަލާ ގުޅޭގޮތުން ފެނަކައިގެ މެނޭޖިންގ ޑިރެކްޓަރ މުޢާޒް މުހައްމަދު ރަޝީދު ވިދާޅުވީ މި ބަދަލުގެ ސަބަބުން ފެނަކައިން ތެލަށް ކުރަންޖެހޭ ޚަރަދު ވަރަށް ބޮޑަށް ކުޑަކުރެވި، ހިންގުން ހަރުދަނާވާނެކަމަށެވެ. އަދި ރައްޔިތުންނަށް ދެމުންދާ ޚިދުމަތް ނުހުއްޓި ދެވޭނެ ކަމަށްވެސް ފެނަކައިގެން މެނޭޖިން ޑިރެކްޓަރ މުޢާޒް މުޙައްމަދު ރަޝީދު ވިދާޅުވިއެވެ.