45 ރަށަކަށް ބޭނުންވާ ޖެނެރޭޓަރުތައް ހޯދުމުގެ މަސައްކަތް ދަނީ ކުރަމުން: ފެނަކަ އެމްޑީ މުޢާޒު

ކަރަންޓުގެ ހާލަތު ރަނގަޅުކުރުމަށްޓަކާ 45 ރަށަކަށް ބޭނުންވާ ޖެނެރޭޓަރުތައް ހޯދުމުގެ މަސައްކަތް ކުރަމުންދާކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވެއްޖެއެވެ.

މުޢާޒު މިހެން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުންނެވެ.

ފެނަކަ ކޯޕަރޭޝަނުން ކަރަންޓުގެ ޚިދުމަތް ދޭ ގިނަ ރަށްރަށުގައި މިއަހަރު ފެށިއިރު ހުރީ ޖެނެރޭޓަރުތަކުގެ ހާލަތު ރަނގަޅުކުރަންޖެހި ރަށްރަށުގެ ކެޕޭސިޓީ އިތުރުކުރަން ޖެހިފައެވެ. އަދި ވަރަށް ގިނަ ޖެނެރޭޓަންތަކެއް ހުރީ އޯވަރހޯލް ކުރަންޖެހިފައެވެ.

ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވީ، އެންމެ ހާލަތު ގޯސް ރަށްތަކަށް މިހާތަނަށް 47 ޖެންސެޓު ފޯރިކޮށްދީފައިވާކަމަށެވެ. އަދި މީގެއިތުރުންވެސް ހާލަތު ގޯސް ރަށްތައް އެބަހުރި ކަމަށާއި މިހާރު ތައްޔާރުވަމުންދަނީ އަންނަ ރަމަޟާންމަހަށް ތައްޔާރުވުމުގެގޮތުން އެރަށްތަކަށް ބޭނުންވާ ޖެނެރޭޓަރުތައް ހޯދުމުގެ މަސައްކަތްކަމަށް މުޢާޒު ވިދާޅުވިއެވެ.

"އަޅުގަނޑުމެން އެބައޮތް ޕްލޭނެއް ކަނޑައަޅާފައި، އިތުރު 45 ރަށަކަށް ބޭނުންވާ ޖެނެރޭޓަރު ހޯދައިގެން މިހާރު މަސައްކަތްކުރަމުން މިދަނީ އަންނަ ރަމަޟާންމަހަށް ތައްޔާރުވުމުގެގޮތުން ކޮންމެހެން ބޭނުންވާ 45 ވަރަކަށް ޖެނެރޭޓަރާއި އަދި މުހިއްމު ސްޕެއަރތައް އޯވަރ ހޯލްކުރުމަށް ބޭނުންވާ ސްޕެއަރތަކާއި އެކީގައި ހޯދުމުގެ މަސައްކަތްކުރަމުން މިދަނީ." މުޢާޒު ވިދާޅުވިއެވެ.

މުޢާޒު ވިދާޅުވީ އިންޖީނުގެތަކުގެ ހާލަތު ދަށްވެފައިވަނީ ބަރާބަރަށް މެއިންޓެއިނެންސްގެ މަސައްކަތްކޮށްފައިނެތުމުން ކަމަށެވެ. އަދި ކަރަންޓުގެ ޚިދުމަތް މިހާރަށްވުރެ ރަނގަޅުކުރުމަށްޓަކާ ރަށްރަށުގެ ކަރަންޓު ނެޓްވޯކް އަޕްގްރޭޑުކުރުމަށްވެސް ގިނަ މަސައްކަތްތަކެއް ކުރުމަށް ރާވާފައިވާ ކަމަށެވެ.

އެގޮތުން އެންމެ ހާލަތު ދަށް 15 ރަށުގައި މި މަސައްކަތް ވަރަށް އަވަހަށް ފެށިގެންދާނެ ކަމަށް މުޢާޒު ވިދާޅުވިއެވެ.

"15 ރަށުގެ ނެޓްވޯކް އަޕްގްރޭޑުކުރުމުގެ މަސައްކަތްކުރުމަށްވަނީ ރާވާފައި، އޭގެތެރޭގައި ތުޅާދޫ ހިންނަވަރު ފަދަ ރަށްތައް ހިމެނޭ، އެރަށްތަކުގެ އިތުރަށްވެސް ލިސްޓުތައް ތަރުތީބުކޮށްގެން މަސައްކަތްތައް ކުރަމުން މިދަނީ." މުޢާޒު ވިދާޅުވިއެވެ.

ރަށްރަށަށް އާއްމު ޚިދުމަތްތައް ނުވަތަ ޔުޓިލިޓީ ޚިދުމަތްތައް ދިނުމުގެ ބޮޑު ޒިންމާއެއް އަދާކުރަނީ ފެނަކަ ކޯޕަރޭޝަނުންނެވެ. ގާތްގަނޑަކަށް 150 އަށްވުރެ ގިނަ ރަށުގައި ކަރަންޓުގެ ޚިދުމަތް ފެނަކައިން ފޯރުކޮށްދެމުންދާއިރު، އެ ރަށްރަށުގައި ތަރައްޤީކުރާ ފެނާއި ނަރުދަމަގެ ނިޒާމުތައްވެސް ބެލެހެއްޓުން ޙަވާލުކުރަމުންދަނީ ފެނަކަ ކޯޕަރޭޝަނާއެކެވެ.